Yela 28 - mzwDBL

Chae wesoŋa

Kooro Devid yel

¹ N Naa Korowii haa do kɛ Bwetal dɛ che n habɔɔ, henee n wi dɛɛ yerɛ. No n wii maa dɛ wi nɔ! He laa deŋna kpɔ n be naa, mɛɛ doo kɛŋɔ nɛra baa serewa ka chɔ lalabwɛɛ ken.

² No n wii maa wia dɛɛ noe nɔ, dɛ́ cha mɛ, sune n nɛ, dɛ́ no n wii, maa ɡɔɔ nɔɔra nyundua chaɡɛ he Dea dɛ́ soŋe, bela waa do ɡoroŋ la.

³ Bɛ pɛ pa n ne nyubinikpeɡ tena bolchɔɡe, nɛra baa dɛ ɛ wechɔɡa la, ba nyoa wobol som ba bala be, kɛ dɛ dɔ liichɔɡa ba nyu bini la.

⁴ Tɛr ba deŋne ba we-ɛɛla, ne ba wechɔɡa baa ɛa wa. Bɔ ba kem ba we-ɛɛla baa ɛa bwa wa, ɡɛ aa chɛa.

⁵ Ba siwi aa waa Korowii aa ɛa tɔɡɛ, kɛɛ kwaa waa taa bwa. Anomanta, wɛɛ tɛr ba deŋnee, dɛ́ chɔɡ ba kwaraa!

⁶ Hé ɡel ya kpɛɛ Korowii, dɛkalkɛ o sune n nɛɛ dɛ no n wii.

⁷ Korowiirii dɛɛ tɔ mɛ ɡbemɡbe dɛ ɛ n Kpeɡnɛn, o nɛɛ n kpɔ n te dawɛ, wɛɛ cha mɛ. N dɛ hɛɡre n bambile bini, mɛɛ ɡo silɛɛ yelaa kpɛɛro.

⁸ Korowii kpɔ nɔn dɛɛ tɔ o nɛra nɛ, dɛɛ tɛɛ ba bokpeɡa, o do kɛ danjwɛkpeɡ, dɛɛ lɛ kooro waa leo cheɡ.

⁹ N Naa Korowii, ba lɛ he nɛra, dɛ́ swee andɛɛɡa tɛɛ ba. Nyiŋi ba nɛ kɛŋɔ peteɡre kaa saŋ waa wola jaɡa dɔe.