Yela 27 - mzwDBL

Kpɛɛra wesoŋa

Kooro Devid yel

¹ Korowii do kɛ kandea dɛɛ chaah mɛ, dɛ ɛ n Lɛɛ, maa nomɛlbwa ɔmɛ. Korowiirii ɛ n Kpeɡnɛn n chwa kaa marɔ, maa ɔmɛ bwa.

² Dɛ nɛnchɔɡa balɔ ba lɔ tɔ n nɛ dɛɛ nyin bá kpo mɛ naa, baa lɔ naa dɛ́ choɡli.

³ Dɛ laa tena bar mɛ cheme aa, n bambile aa teŋe. Hale n dɔma ba dɛ yoo mɛ kwaraa naa, hen Korowii nɛɛ n hwɛɡa ta do.

⁴ N Naa Korowii, kombeŋkpoŋii n soŋe dɛɛ le he be, ɡɛ maa dɛ nyin laanee kɛŋɔ, ń so he Dea n soɡa bini bwa, dɛ́ nyiŋi ɡɛ he wa aa wera dɛ́ kooɡa, dɛ́ soŋe, he nyiŋi n nɛ.

⁵ Hɛɛ lɛɛ mɛɛ n wenaale tɔpere, dɛ́ kpɔ nɔn tɔ n nɛ he Dea dɛ́ laɡ mɛ sɔh bela, dɛ́ kpɔ n naa cheɡ bodɛɛɡe.

⁶ Anee dɛ́ ɡel n baŋa pa, n dɔma baa bar mɛ cheme la nɛ. Mɛɛ kpoo kwaa ɛ sarahare tɛɛ he Dea bela silɛɛ lɔŋɔre ne, dɛ́ ɡo yela kpɛɛre.

⁷ N Naa Korowii, n dɛ yerɛ naa, no n wii, na n sum, dɛ́ chaŋ mɛ!

⁸ He fa ŋɔ n be ŋɔ, “Ba dɛ ba tom mɛ,” asɛ n chaŋe ŋɔ, “N Naa Korowii, mɛɛ bao,

⁹ bɛ he te kpɔ sɔɔh mɛ.” Bɛ ɡel he baah di men maa ɛ he bonɔɔ nɛ. Henee dɛɛ cha mɛ, bɛ men vɛh, dɛ berɛ habɔɔ kpo mɛ. N Naa Korowii, henee n Lɛɛ.

¹⁰ Hale dɛ n mɛɛ ne n nya ɛɛ vɛɛh mɛ kwaraa naa, hen Korowii te ɛɛ nyiŋi n nɛɛ.

¹¹ N Naa Korowii, baɡ mɛ he ŋwɛnɛre, tɔ n sie, dɛ́ kpɔ mɛ kpɔ ŋwɛnɛdɛɛɡe ta, dɛkalkɛ n dɔma warɔ.

¹² Bɛ men ɡel tɛ n dɔma, ba teŋe nyosone dawɛ n nɛ, dɛ nyin mɛ naɡra, dɛɛ aah mɛ.

¹³ N dɔ hwɛɡa hen Korowii nɛɛ kɛŋɔ, mɛɛ soo, dɛ́ jemɛ he wedɛɛɡa haa dɛ ɛ.

¹⁴ A chɛ kɛ yá kpɔ ya te dawɛ hen Korowii nɛ, dɛ́ lawɛ bambile, dɛ́ che kiŋkiŋ, dɛ́ɛ nyiŋi he siwi ta.