Yela 26 - mzwDBL

Nɛndɛɛɡe wesoŋa

Kooro Devid yel

¹ N Naa Korowii, nyiŋi n waa bini dɛ́ pa mɛ bole, dɛkalkɛ n waa toɡrɔ, he nɛɛ n den kpɔ n te dawɛ.

² N Naa Korowii, nyiŋi n bini, dɛ́ daah mɛ na dɛ́ pese n we-ɛɛla ne n liire.

³ He nyina aa wola jaɡa dɔe bwa laanee dɛɛ baɡle mɛ ŋwɛnɛ, he kasinteŋ ɡe ɛɛ tɔ n sie.

⁴ N ne nyosonteŋna aa darame kpɔ, n ne nɛnchɔɡa toole wobɛlbwa bini.

⁵ N hah wechɔɡ-ɛɛra bini joe, n ne nyubinikpeɡ tena aa so.

⁶ N Naa Korowii, n sarame nɔɔra, a baɡle kɛ n ta bolchɔɡe bɛlbwa dii, dɛ ka valɛ bar he saraha kon la dɛɛ tomɛ.

⁷ N ɡo yela kohona dɛɛ kpɛɛre, dɛɛ bol he nyokpowe-ɛɛla bwa wa.

⁸ N Naa Korowii, bela haa soɡa dɛ do n wer, bela he jirima aa lole la.

⁹ Bɛ pɛ chɔɡ n ne wechɔɡ-ɛɛra, bɛ men kpo ja nɛra baa dɛ kpoo nɛra nɛ,

¹⁰ ba bee wechɔɡa vɔrɔwa bwa le, dɛ ɡel baa yaɡ ba sen tɔpere bɛlbwa.

¹¹ Kɛ n te, n waa toɡrɔ, sune n nɛ, dɛ́ lɛɛ mɛ!

¹² N cheɡɛ bodɛɛɡe, nɛra ɡalɡa binii mɛɛ ba hen Korowii kpɛɛra.