Yela 25 - mzwDBL

Korowii nɔn kpɔe dɛ́ tɔ nɛn nɛɛ wesoŋa

Kooro Devid yel

¹ N Naa Korowii, he nɔn taa n kpɔ n nyu dɛɛ do,

² Korowii maa dɛ tomɛ, he nɛɛ n kpɔ n te dawɛ. Bɛ ɡel sihiih kpo mɛ, kɛɛ dɛ́ ɡel n dɔma pɔ n nɛ.

³ Nomɛlbwa toole dɛ kpɔ o te dawɛ he nɛ, he ɡel sihiih kpoo bwa, kɛ banɔ la baa vɛh he waa pɛɛpɛɛ la te, sihiih ɛɛ kpo baa.

⁴ N Naa Korowii, baɡ mɛ he ŋwɛnɛre, ásɛ n jemɛ dɛɛ kpɔ a ta.

⁵ Baɡ mɛ he kasinteŋ waa la mɛɛ teŋɛ a ta, dɛkalkɛ henee Korowii maa dɛ tomɛ, he ɛ n Lɛɛ, he nɛɛ mɛɛ hwɛɡɛ tɔpere bɛlbwa.

⁶ N Naa Korowii, lii he suna kohona, ne nyina aa wola jaɡa dɔe la wa, saŋ la bwaa a le, dɛ ba le fini.

⁷ N Naa Korowii, bɛ n bonɔɔne saŋ wechɔɡa, ne deŋnekpeɡ we-ɛɛla lii. Che he nyina aa wola jaɡa dɔe ta, dɛɛ lii n wa, dɛkalkɛ he waa wer.

⁸ Korowii wer, o waa toɡre, o dɛ baɡle wechɔɡ-ɛɛra ŋwɛnɛdɛɛɡe baa kpɔ o ta.

⁹ O cha nɛŋɡwɛɡra baa ɛ wa aa toɡra, dɛɛ baɡ ba o ŋwɛnɛre.

¹⁰ Korowii dɔ nyina, o waa dɔ kasinteŋ, wɛɛ tɔ nɛra baa dɛ teŋɛ fɔo o ne baa fɔwa la ta siee.

¹¹ N Naa Korowii, a lole kɛŋɔ n wechɔɡa kan te, koh he sɔnjen la wa dɛ́ kpɔ kɛ mɛ.

¹² Nɛra baa dɛ duu Korowii la, wɛɛ baɡ ba ŋwɛnɛɛ baa kpɔ o ta.

¹³ Korowii ɛɛ ɡeloo ba wobɛlbwa do wer tɛɛ ba saŋ bɛlbwa, ba naanar kpɔ harɛ la ɛ ba kapɛrɛ kon.

¹⁴ Nɛra baa dɛ duu Korowii la, o kpɔ ba ɛ o daamanar, o ɡelɔ o ne ba fɔo baa fɔwa la che kiŋkiŋ.

¹⁵ N sie dawɛ Korowii nɛɛ saŋ bɛlbwa kɛ ó cha mɛ, onee dɛ́ lɛɛ mɛ le wekpeɡa ta.

¹⁶ N Naa Korowii, berɛ sie n be, dɛ́ sune n nɛ, dɛkalkɛ n ɡwɛɡrɔ, n ta nomɛlbwa dɔe ó cha mɛ.

¹⁷ Laa waa aa dawɛ n nɛɛ kpɔ n nɛ, dɛ́ lɛɛ mɛ le n wenaale bwa ta.

¹⁸ Nyiŋi n suna dii ne n bonyɛɡa, dɛ́ kpɔ n wechɔɡa bwa kɛ mɛ.

¹⁹ Na n dɔma wara baa wara, dɛ hah mɛ kohona.

²⁰ Kpɔ nɔn tɔ n nɛɛ dɛ́ lɛɛ mɛ, bɛ ɡel sihiih kpo mɛ, henee n chwa baa marɛ.

²¹ N dɛ soŋe, ɡel kasinteŋ ne wedɛɛɡa ɛɛ tɔ n nɛ, he nɛɛ n kpɔ n te dawɛ.

²² N Naa Korowii, lɛ he nɛra Israel tena le ba wenaale bwa ta.