Yela 24 - mzwDBL

Koojen la wa

Kooro Devid yel

¹ Korowiirii dɔ harɛ nɔ ne komɛlbwa aa lɔ o ta, hale nɛwɛnyina bwa sekwara.

² Onee pa harɛ mun o chɔŋɛ nee sie, dɛ ɡel kwaa aa lawɔ kpoŋe che viljena ta.

³ Umee dɔ ŋwɛnɛ dɛ́ teeh kaa Korowii Dea, bela waa do ɡoroŋ ba le cheɡ dɛɛ tomɔ la ta nɔ?

⁴ Nɛn o we-ɛɛla aa wera, o tea to waa wola voɡa tomɛ, kɛɛ dɛɛ ŋwɛɛ saɡasaɡa.

⁵ Gɛ te laanee Korowii ɛɛ ba andɛɛɡa sweera tɛ dɛ́ lɛo, dɛ́ pao bole.

⁶ Gɛ nɛraa dɛɛ nyin Korowii be bala, Korowii Jekɔb aa tomɔ la be.

⁷ Hé ya doonyojena la kohona, hé ya saŋ la doonyoo la, ásɛ Koojen waa dɔ jirima la ba jo.

⁸ Umee Koojen waa dɔ jirima kohona nɔɔ? Onee Korowii waa dɔ kpeɡri, dɛ do kan, dɛ ɛ banyoo laa yoi ta la.

⁹ Hé ya doonyojena la kohona, hé ya saŋ la doonyoo la, ásɛ Koojen waa dɔ jirima la ba jo.

¹⁰ Umee Koojen waa dɔ jirima kohona nɔɔ? Nemenɛ Korowiirii, onee Kooro waa dɔ jirima kohona la!