Yela 22 - mzwDBL

Weweele wii ne Korowii kpɛɛra

Kooro Devid yel

¹ N Naa Korowii! N Naa Korowii! Ɛrɛɛ he chwa mɛ nɔɔ? N do lɔŋɔ sum ne ŋɔ hé cha mɛ, kɛ maa wobɛlbwa na.

² N Naa Korowii, n wio dɛɛ noe chɔɔ haa men chaŋe, dɛ wi dɛɛ noe jwaana, kɛ n bwara aa men sɔɔh.

³ N jemɔ kɛ he ɛ Korowii Waa Do Goroŋ dɛɛ di kora, henee Israel tena ɛɛ kpɛɛ.

⁴ He nɛɛ ya naawa hwɛɡɛ, ba kpɔ ba te dawɛ he nɛ, asɛ he lɛɛ ba.

⁵ Ba wio noe, asɛ he lɛɛ ba le siswɛm ta, ba kpɔ ba te dawɛ he nɛ, he ta ɡelɛ a ɛ pɛɛ.

⁶ N ta nɛn ɛɛ kpa, n do kɛ sɔɡlɔ, nɛra baa hah mɛ, dɛɛ nyiŋi n nyubaah.

⁷ Nɛra na mɛ naa, ba dɛ chɛɡ mɛ, dɛ di n loro dɛɛ viiɡi ba nyuune.

⁸ Ba ŋɔ, “He kpɔ he te dawɛ Korowii nɛ, ɛrɛɛ waa wola hen lɛɛ yɔ? Dɛ Korowii dɛ nyini naa, ɛrɛɛ waa wola hen chae yɔ?”

⁹ Hen Korowiirii ɡela ba lol mɛ, n taa ɛ bechasɔɔhna dɛɛ ɔr la, he nyiŋi n nɛ, dɛ tɛ mɛ bosɔɔhna.

¹⁰ Awola baa lol mɛ bwaa n le kpɔ n te dawɛ he nɛ, he ɛ Korowii maa dɛ tomɛ saŋ bɛlbwa.

¹¹ Bɛ ɡel n ne he baah do jaŋne! Waa puu mɛ tonɛ, nomɛlbwa toole dɛ́ cha mɛ.

¹² Dɔma warɔ dɛ bar mɛ cheme, kɛŋɔ Basan harɛ nabala a bwara aa kpeɡa ken.

¹³ Ba hah nyoo kɛŋɔ nyujentena, dɛɛ kɔɡre, dɛ́ toɡri n ola.

¹⁴ N bokpeɡa tonɔ kɛŋɔ, baa fuɡe nee ta harɛ ken, asɛ n hoɡa bwa soɡre, n bambile chɔɡ, n ta hwɛɡa bɛlbwa dɔe kpa.

¹⁵ N ta bokpeɡa dɔe kɛŋɔ kaŋli ken, n nyondoŋe marɛ n nyoa, hé ɡel mɛ ń sewɛ ka chɔ lalabwɛ.

¹⁶ N dɔma bar mɛ cheme, kɛŋɔ nyootena aa wara dɛ tɔ mɛ do baah ta, dɛɛ toɡri n nɔɔra ne nakpale.

¹⁷ N ka hoɡa ɡbo, n dɔma nyiŋ mɛ dɛɛ mamɛ.

¹⁸ Ba ta chacha n laala wa, dɛ bɔna kpɔ.

¹⁹ N Naa Korowii, bɛ ɡel n ne he baah do jaŋne! Henee n kpeɡri, ba warane dɛ́ ba lɛɛ mɛ.

²⁰ Lɛɛ mɛ le tokobi seo nyoa. Lɛɛ mɛ le n dɔma baa do kɛŋɔ nyootena nɔ nɔn ta.

²¹ Lɛɛ mɛ n dɔma baa do kɛ nyujentena nɔ nɔn ta, lɛɛ mɛ le n dɔma baa do kɛ, nabala nyeɡlare nɔ nyoa.

²² Mɛɛ bol he waa haa ɛa n nɛra bee, mɛɛ kpɛɛree ba chema binii.

²³ “He banɔ haa dɛ ɔmɛ Korowii la, hé kpɛɛro! Jekɔb naanar, hé kpɔ duure tɛo! Israel tena, hé tomɔ!

²⁴ Korowii aa nyaara vɛh ba wenaale ta, waa habɔɔ berɛ dɛɛ kpo ba, ba wio noo waa, o dɛ cha ba.”

²⁵ Mɛɛ kpɛɛre nɛnlaa tenten baahnee, nɛra baa dɛ tomɛ siee mɛɛ ba kwaa kpoora ɛ saraha tɛɛ, ɡɛ maa baɡɛ nyoa la.

²⁶ Nyaara ɛɛ di kwaa vaɡɛ ɡɛ baa dɛ nyin, nɛra baa dɛ tomɛ Korowii ɛɛ kpɛɛroo. Kórowii ɡel bá dɔ silɛɛ saŋ bɛlbwa dɛɛ la!

²⁷ Harɛre nɛra bwa ɛɛ lii Korowii waa dɛ́ kpɛɛro, baa le harɛ jaɡa bwaa, dɛ́ ba o be, harɛre nɛra bwa ba ɡuŋi o sie.

²⁸ N Naa Korowii ɛ kooro, dɛɛ di kora harɛre nɛra bwa nɛ.

²⁹ Nɛra baa dɛ ɛ mbarafo bwa ɛɛ ba tomɔɔ, nɛwɛnyina bwa ɛɛ ba ɡuŋuu.

³⁰ Naanar baa ka ba bwa ɛɛ tomɛ Korowii, dɛ́ bol o waa baɡle ba biirere ne ba naanar.

³¹ Bii baa wola ban lolɛ mɔɔ kwaraa ɛɛ ba noo kɛŋɔ, “Korowii lɛ o nɛra.”