Yela 21 - mzwDBL

Dɔma nɛɛ pɔe kpɛɛra

Kooro Devid yel

¹ N Naa Korowii, kooro dɛ hɛɡre bokpeɡa haa tɛo wa. O sie lɛo kohona pɔe haa ɡela o pɔ o dɔma nɛɛ la wa.

² He tɛo kwaa o bambile aa lawa, he sɛh waa waa soŋa ta tɛo.

³ He swee andɛɛɡa tɛo kohona, dɛ kpɔ suuɡaswɛm kooɡbɛrɛ tenten piu.

⁴ O soŋe mkpa, asɛ he tɛo mkpajaŋ waa wola jaɡa dɔe.

⁵ He chao o pɔ o dɔma nɛ, dɛ ɡel o ɛ nɛnjen, dɛ tɛo sɔn o dɔ jirima kohona.

⁶ Kasinteŋ, he swee andɛɛɡa aa wola jaɡa dɔe tɛo, dɛ ɡel o do he sie o sie ɛɛ lɛ.

⁷ Kooro la dɛ hwɛɡɛ hen Nemenɛ Korowii nɛ, he nyina aa wola jaɡa dɔe la ɡelɔ o dɔ deŋnesɔɔhna saŋ bɛlbwa.

⁸ Kooro ɛɛ kpɔ o nɔnee dawɛ o dɔma bwa nɛ, wɛɛ lawɛ nomɛlbwa waa haoh laanee.

⁹ Korowii baa forɛ le aa, wɛɛ chɔɡ baa kɛŋɔ, nii yon fuh kwaa a chɔɡ la. Korowii baah ɛɛ diu kohona, ó chɔɡ ba bwa, dɛ́ ɡel nii fuuh ba kwaraa.

¹⁰ Ba naanar bɛlbwa aa kae ba, kooro la ɛɛ kpo ba bwaa.

¹¹ A lole kɛ ba chemo dɛ yon dɛɛ vɔrɔwe kooro vɔrɔwa, baa won ɛ wobɛlbwa dɛ́ pɔ o nɛ.

¹² Wɛɛ harɛ o too ba nɛ, ásɛ ba berɛ habɔɔ dɛ́ chwa kaa.

¹³ N Naa Korowii, ya dɛ kpɛɛre he kpeɡri kohona wa, yaa ɡo yelaa kpɛɛre a wa.