Yela 20 - mzwDBL

Dɔma nɛɛ pɔe wesoŋa

Kooro Devid yel

¹ N Naa Korowii, no he wii he wahala ta, Kórowii Jekɔb aa tomɔ la, kpɔ nɔn tɔ he nɛ!

² Ó che o Dea bela dɛ́ chae, ó tɛɛ kpeɡri le Saayɔn Bwejen ta.

³ Ó lii sarahare haa tɛo bwa, ásɛ dɛ lɛ sarahare haa fuah tɛo la.

⁴ Ó tɛɛ komɛlbwa he bambile aa lawa, dɛ́ ɡel waa haa dɛ maɡle bwa do wer tɛɛ.

⁵ Ásɛ ya kpɔ silɛɛ moo, pɔe haa pɔ ya dɔma nɛɛ la wa, dɛ́ ir ya fraŋkaare, Korowii yaa dɛ tomɛ sɔn ta. Kórowii no he wesoŋa bwa.

⁶ Name, n jemɔ kɛŋɔ Korowii dɛ tɛ nɛn waa leo kɛ kooro kpeɡri, wɛɛ pɔ o dɔma nɛ. O dɛ sɛh o be nyundua bela waa do ɡoroŋ la, dɛ che o kpeɡri ta, dɛ ɡel o yo dɛɛ le.

⁷ Nɛra bane dɛ hwɛɡɛ kwaa aa do kɛŋɔ torɔɡore ta, bane ɡee hwɛɡɛ ba jaɡre nɛ, kɛ ya te, Korowii yaa dɛ tomɔ la nɛɛ yaa hwɛɡɛ.

⁸ A ɡɛ nɛra nɔ ɛɛ lɔ naa, dɛ́ choɡli, kɛ ya te ɛɛ iruu, dɛ́ che kiŋkiŋ.

⁹ N Naa Korowii, cha kooro ó pɔ o dɔma nɛ! Dɛ ya wio noe naa, no ya be!