Yela 2 - mzwDBL

Kooro Korowii aa leo cheɡ tɛ o te

¹ Ɛrɛɛ harɛre nɛra baa wola Korowii tomɛ, lɛ ɡaeh, dɛɛ le jina dɛɛ koh ba te pɛɛ nɔɔ?

² Ba koranar kpɔ ba te, dɛ ir che dɛɛ vɔrɔwe Korowii ne o kooro waa leo la vɔrɔwa.

³ Ba ŋɔ, “Hé ɡel ya lɛ ya te le ba lɔɡa, ásɛ ba bɛ won di kpeɡri ya nɛ.”

⁴ Korowii soɡe o kookara ta nyundua dɛɛ mam ba, ba waa ɛ wesale o be.

⁵ O bol waa baɡ ba bandia kohona ne, dɛ aah ba ŋɔ,

⁶ “N cheɡ n kooro n deŋɡare waa do ɡoroŋ Saayɔn ta.”

⁷ Kooro la ŋɔ, “Mɛɛ bol waa Korowii aa bola la waa. O ŋɔ n be ŋɔ, ‘N Biee hen, fini n berɛ he Mɛɛ.

⁸ Soŋ mɛ, mɛɛ kpɔ harɛre bwaa tɛɛ.

⁹ Hɛɛ di kora ba nɛɛ kpeɡri ne, hɛɛ pɔ ba nɛɛ dɛ́ ɛɛ ba kɛŋɔ, ba yon paɡre vii burbur la ken.’ ”

¹⁰ Anomanta, koranar, hé hweli wa, harɛre nomonome, hɛ́ɛ nyiŋi kɛrɛdɛ.

¹¹ Hɛ́ɛ ɔmɛ Korowii dɛɛ tomɔ, hé charɛ he liire, dɛ́ ba he te ne harɛ.

¹² Hé kpɔ he te tɛ Korowii bie la, ásɛ o baah bɛ di dɛ́ chɔɡ heya. O baah won dii saŋ bɛlbwa. Nɛra baa chwaa kaa marɔ la bwa, ba na som.