Yela 19 - mzwDBL

Korowii jirima waa dɔa

Kooro Devid yel

¹ Nyundua dɛ baɡle kɛrɛdɛ ɡɛ Korowii aa dɔ jirima, kwaa aa lɔ nyundua ɡe bwa ɛɛ chaɡle ɡɛ tenten, toma Korowii aa ɛa.

² Tɔpere bɛlbwaa aa na Korowii jirima, jwaana bɛlbwa ɡee aa na o wejema.

³ Aa waa bol, nɛraa a waa no.

⁴ Kɛ a webaɡla do kɛŋɔ wobol, dɛɛ tel harɛre bwa ta, asɛ a waa ɛɛ tel harɛ jaɡa bwa. Korowii kwaa bɔr nyundua bela tɛ wee,

⁵ o le bela dɛɛ ba kɛŋɔ, hanfale jaa sie aa lɛa, kɛɛ nɛn o sie aa beɡra wɛɛ ba chwae dɛ́ lɛ komɛl la ken.

⁶ Wee dɛ le nyundua baŋ bɛl, dɛ ɡale ba kaa baŋ bɛl. Komɛlbwa aa won laa on kpɔ le o nyɛɡre la ta.

⁷ Korowii Mmara wer, dɛɛ tɛ bokpeɡfale, Korowii waa waa dɛ do yaa a ta chɛ kɛ yá kpɔ ya te dɛɛ dawɛ a ta, a ɡelɔ banɔ la baa wola wobɛlbwa jemɛ la ɛɛ jemɛ wa.

⁸ Korowii Mmarare toɡrɔ, dɛɛ tɛ nɛn waa dɛ teŋɛ a ta silɛɛ. O waa waa dɛ do yaa a ta wer, dɛɛ pili nɛn sie.

⁹ Korowii ɔma wer ɡa, aa do lee saŋ bɛlbwa dɛɛ la. Korowii waa bola dɛ́ pa bole ɛ kasinteŋ dɛ toɡre.

¹⁰ O waa bola dɛ́ pa bole dɔ tɔnɔ, dɛ ɡwaa suuɡaswɛm tenten, a torodi dɛ ɡwaa tohno baa wola komɛlbwa a ta koore.

¹¹ A cheɡɛ a ta men maa ɛ he torome ɛɛ dɔ wejema, dɛɛ dɔ kembɔr a ta teŋa ta.

¹² Umee dɛ́ won jemɛ o ɡbaɡba wechɔɡa waa ɛaɔ? N Naa Korowii, lɛɛ mɛ le wechɔɡa maa wola jemɛ dɛ ɛ la ta.

¹³ Lɛɛ mɛ le wechɔɡa maa saahna ɛ ta, bɛ ɡel a lɛ n liire. Anee dɛ́ ɡel n waa do wer, ásɛ n dɔ n te le wechɔɡa ɛɛ ta.

¹⁴ N Naa Korowii, ɡel n nyoa wobol, ne n liire ɛɛ lɛ he sie, henee n Lɛɛ, dɛ do kɛ Bwetal maa chwaa kaa marɛ.