Yela 18 - mzwDBL

Dɔma nɛɛ pɔe yel

Kooro Devid yel

¹ N Naa Korowii, mɛɛ ta tea tɛɛ dɛ́ nyin he wa, henee n Kpeɡnɛn.

² N Naa Korowii, he do kɛŋɔ Bwetal, maa chwaa kaa marɛ, ne danjwɛkpeɡ hɛɛ lɛɛ mɛ. Korowii maa dɛ tomɛ, he do kɛŋɔ Bwetal, maa chwaa kaa marɛ. Henee dɛɛ tɔ mɛ ɡbemɡbe, dɛ ɛ n kpeɡnɛn.

³ N wio no hen Korowii waa chɛ kpɛɛra la, asɛ he lɛɛ mɛ le n dɔma nɔn ta.

⁴ Seo vɔɡ mɛ bil, asɛ nehɛma aa kpeɡa lɔ dɛɛ kpɔ n nɛ.

⁵ Seo bela bar mɛ cheme, lalbɔɔ hah nyoa dɛɛ kpaa mɛ.

⁶ N wahala bini n wio no hen Korowii ŋɔ hé lɛɛ mɛ, n wio no hen Korowii maa dɛ tomɛ ŋɔ, hé cha mɛ, he no n taa he Dea la bini, n wii la tel he be, asɛ he no.

⁷ Harɛ jiɡro dɛ yiiɡi, asɛ bwejena mune jiɡri. Korowii bandia waa a bwa ɛ ɡɛ.

⁸ Ninchuu le o mebɔɔne bini, ninlao aa dɛ chɔɡ kwaa le o nyoa, ninhɔla aa dɛ fuh kwaa ɡe ɛɛ le o nyoa.

⁹ O forɔ le nyundua ba harɛ, baama aa bira kpirkpir do o nakpale lɔɡa.

¹⁰ Kerobim taa o so dɛɛ ɡah, peu kena taa o kpɔ ba.

¹¹ O kpɔ biro bɔle o bwa, baama aa bira kpirkpir, tenɛ bwaala, dɛ baro cheme.

¹² Bɔr nyɛɡlɔ le baama la bini tɔ o sie, asɛ dombwea ne ninlao, ɛɛ le bela aa dɛ nyɛɡle la ta.

¹³ Nemenɛ Korowii bol waa nyundua, a do kɛŋɔ bwaala aa kɔra ken, asɛ ba no o taa bobɛlbwa.

¹⁴ O ta o hɛma, o dɔma peɡre, o ɡelɔ bwaala nyɛɡle kohona, ba chwa kaa.

¹⁵ N Naa Korowii, nyɛɡa haa nyɛɡ he dɔma nɛ, ne he bandia kohona nomanta, a ɡelɔ mpo vile bwa hweeh dɛ chɔ pɛɛ, harɛ mumpar ɡe chɔ pɛɛ.

¹⁶ He ha nɔn le nyundua dɛ laɡ mɛ, dɛ tɛr mɛ le vile bini.

¹⁷ He laɡ mɛ le n dɔma baa kpeɡa nɔn ta, nɛra baa hah mɛ, dɛ do kpeɡri ɡwaa mɛ.

¹⁸ Ba cheɡɛ n nɛɛ kɛ bá chɔɡ mɛ, ɡɛ saŋ maa lɔ wahala ta, kɛ hen Korowii, he cheɡɛ n habɔɔ.

¹⁹ He cha mɛ dɛ le n ne wekpeɡa ta, he lɛɛ mɛ, dɛkalkɛ he sie lɛ n nɛ.

²⁰ Korowii bɔ mɛ kem ɡɛ n wa aa toɡra, o swee andɛɛɡa tɛ mɛ, dɛkalkɛ wechɔɡa bɛlbwa toole n nɛ.

²¹ N teŋɛ Korowii waa ta, n ta wechɔɡa ɛɛ dɛ vɛoh.

²² N teŋɛ o Mmarare bwa ta, n ta waa waa do mɛ a ta la ta leɛ.

²³ O ta n bwara waa dɔe dɛ bol bwa, n laa n te kpɔ wechɔɡa ɛɛ ta.

²⁴ Korowii bɔ mɛ kem ɡɛ n wa aa toɡra, dɛkalkɛ wechɔɡa bɛlbwa toole n nɛɛ o be.

²⁵ N Naa Korowii, he waa dɔ kasinteŋ tɛ nɛn o tea aa toa, he waa wer kɛrɛdɛ dɛ tɛ nɛn, wechɔɡa bɛlbwa aa wola toole o nɛ.

²⁶ Nɛn o tea aa toa la, onee he dɔ tepoŋ tɛ, kɛ he dɔ wejema ɡwaa nɛn waa dɔ baradeɛre.

²⁷ He dɛ lɛ nɛra baa pwɛra, kɛ mbarafo tena te, he dɛ ba ba ne harɛ.

²⁸ N Naa Korowii, henee ɡela bɔr chaah n sie mɛɛ na, he ɡelɔ n le biro ta ba bochaah ta.

²⁹ He tɛ mɛ kpeɡri n won yo n dɔma, dɛ cha mɛ n jah ɡale ba danjwɛjen baa maa bar ba bwɛ.

³⁰ Korowii te, o ŋwɛnɛre bwa wer, o waa bwa toɡrɔ. O do kɛŋɔ ɡbemɡbe, dɛɛ tɛ nɛn waa chwaa baa marɔ.

³¹ Ya Naa Korowii habɔɔ, bɛlbwa toole. O ɡboo ɛ Bwetal dɛ́ won tɔ ya nɛ.

³² Korowii tɛ mɛ bokpeɡa, dɛ ɡel n ŋwɛnɛ do wer mɛɛ kpɔ o ta.

³³ O ɡelɔ n nakpala do kɛŋɔ welo kwaa ken, dɛ ɡel n won bwejena dor cheɡa.

³⁴ O baɡ mɛ n won laa yoi, asɛ n won to waa do kpeɡri tae.

³⁵ N Naa Korowii, he tɔ mɛ ɡbemɡbe dɛ lɛɛ mɛ, nyiŋa haa dɛ nyiŋi n nɛɛ la ɡelɔ n do kpeɡri, asɛ he kpeɡri ɡel n dɔ n te.

³⁶ He kwaa ŋwɛnɛ o do paɡri tɛ mɛ, ásɛ n bɛ naa lɔ.

³⁷ N ti n dɔma dɛ ka puu ba, n kpoo ba mɔɔ dɛ laa berɛ.

³⁸ N lɔ ba bil, baa wola won ir kpa ba serewe chɔ n sie.

³⁹ He tɛ mɛ bokpeɡa n won laa yoi, dɛ sɔɔh n dɔma nyoa n pɔ ba nɛ.

⁴⁰ He ɡelɔ n dɔma berɛ habɔɔ, dɛ chwa le n sie, asɛ nɛra baa hah mɛ la, n kpoo ba.

⁴¹ Ba wio dɛɛ nyin lɛɛ, kɛ nomɛlbwa toole, ba wio no hen Korowii, he ta ban chaŋɛ.

⁴² N nam ba, ba ɛ kɛŋɔ tutuɡ peu aa taa dɛɛ kaa ane ken, dɛ sa ba nɛɛ kɛŋɔ, fɔɡbaah kpechɛɡre.

⁴³ He lɛɛ mɛ le nɛra baa cheɡɛ n nɛɛ bini, dɛ ɡel mɛɛ di kora harɛre nɛra nɛ, nɛra maa wola ban jemɛ laanee dɛɛ tom mɛ.

⁴⁴ Baa dena no n waa ba no n be, nɛŋhɔɔhra pwɛr ba te dɛ baa ɡuŋi n sie.

⁴⁵ Ba hwɛɡa bwa tonɔ, ba kpɔ bochela le ba dekpeɡa bini dɛɛ ba.

⁴⁶ Korowii lole kɛrɛdɛ! Korowii waa do kɛ Bwetal la, hé kpɛɛro! Onee n chwa kaa marɛ. Hé ɡel Korowii waa dɛ lɛɛ mɛ la sɔn le.

⁴⁷ Korowiirii tɔ n wel tɛ mɛ, o kpɔ harɛre nɛra do n nɔn ta.

⁴⁸ N Naa Korowii, he lɛɛ mɛ le n dɔma bini. He laɡ mɛ le nɛra baa cheɡɛ n nɛɛ bini, he lɛɛ mɛ le nɛnchɔɡa nɔn ta.

⁴⁹ Anomanta, mɛɛ kpɛɛre harɛre nɛra bwa bee, mɛɛ yerɛ he sɔnee, dɛ́ ɡo yela kpɛɛre.

⁵⁰ Kɛŋɔ haa tɛ he kooro kpeɡri kohona, o pɔ o dɔma nɛ, dɛ teŋɛ dɛɛ nyin nɛn haa leo, ó ɛ Devid ne o naanar kon, saŋ bɛlbwa dɛɛ la la.