Yela 17 - mzwDBL

Nɛn o wa aa toɡra Wesoŋa

Kooro Devid yel

¹ N Naa Korowii, no nɛn n wa aa toɡra nɔ wesoŋa, no n wii maa dɛ wi nɔ. Ken deŋne dɛ́ no n wesoŋa, nyosone laa mɛɛ teŋe.

² Hɛɛ bol n waa tɛ mɛ, henee jemɛ waa aa wera.

³ He jemɛ n bambile bini wa, he ba n be jwaana, dɛ nyiŋi n waa bini, dɛ pese mɛ kɛrɛdɛ, he ta wechɔɡa nae n nɛ, n ɛ n liire kɛ, wechɔɡa aa n nyoa le.

⁴ Wobochɔɡaa n nyoa le, ɡɛ bane aa dɛ bol la, n no he Korowii waa la. N ta naɡra we-ɛɛla bane aa dɛ ɛ la ta teŋɛ.

⁵ He ŋwɛnɛ taa mɛɛ valɛ saŋ bɛlbwa, n ta kee le o ta bwa.

⁶ N Naa Korowii, n wio dɛɛ noe, n jemɔ kɛ hɛɛ chaŋ mɛɛ, cheɡ deŋne, dɛ́ no n wesoŋa.

⁷ Baɡle he nyokpoa nyina waa do kan la, ásɛ n chwa le n dɔma be ba marɛ.

⁸ Tɔ mɛ ɡbemɡbe kɛŋɔ, haa dɛ tɔ n siwinyiŋi ta la, kpɔ mɛ sɔh he kena lɔɡre kɛŋɔ, jal yon lawɛ o bii do lɔɡa la ken.

⁹ Lɛɛ mɛ le nyubinikpeɡ tena baa dɛ nyin ba yoo mɛ nɔn ta, n dɔma baa bar mɛ, dɛɛ nyin n kpoe la be.

¹⁰ Baa nɛn sum na, mbarafo wobolee baa bol.

¹¹ Ba bar mɛ cheme, bobɛlbwa maa kpɔ la, dɛ ba lole, dɛɛ nyin ŋwɛnɛ baa kpɔ, dɛ́ taɡ mɛ ɡo.

¹² Ba do kɛŋɔ nyujente lɔr aa dɛ kpoo, wɛɛ nyin ol dɛ́ lawɛ, dɛɛ nyin mɛ dɛ́ toɡri n ola.

¹³ N Naa Korowii, ir nyu ne, puu ba, dɛ́ ba ba ne harɛ, kpɔ he tokobi, dɛ́ lɛɛ mɛ le nyubinikpeɡ tena nɔn ta.

¹⁴ N Naa Korowii, che he kpeɡri ta, dɛ́ lɛɛ mɛ le nɛra baa dɔ harɛ nɔ ta liire, dɛɛ nyin ba soɡa bini kwaa la nɔn ta. Banɔ la haa dɛ nyin ba waa la dɔ kondikwaa kohona, ba bii dɔ ane di dɛ́ vaɡɛ, ásɛ ane ka ba naanar ɡe ba dɔ.

¹⁵ N waa aa toɡra nomanta, mɛɛ nae, n chɔɔ ir aa, n sie ɛɛ lɛo kohona, ń na ɡɛ haa doa.