Yela 16 - mzwDBL

Hwɛɡa dɔe wesoŋa

Kooro Devid yel

¹ N Naa Korowii, kpɔ nɔn tɔ n nɛ, he nɛɛ n sie dawɛ kɛ mɛɛ dɔ n nyuu.

² N ŋɔ Korowii be ŋɔ, “Henee Korowii maa dɛ tomɛ. He habɔɔ, n ta kondɛɛɡe bɛlbwa dɔe.”

³ Korowii nɛra ba wa aa toɡra harɛ nɔ ta la, ba waa wer n be kɛrɛdɛ, asɛ n bwara ɛɛ sɔɔh mɛ ba waa taeh.

⁴ Nɛra baa dɛ tomɛ voɡa la nyin waa dɛɛ dawɛ ba nɛ. Maa ba nɛɛ ja kpoo kwaa tɛ ba voɡare bwa, maa ba voɡaree tomɛ bwa!

⁵ N Naa Korowii, henee n komɛlbwa, hen tɛ mɛ anɔ la maa dɛ nyin bwa, n kerekere waa bwa lɔ he nɔn ta.

⁶ He koŋkɛɛla haa tɛ mɛ wer kɛrɛdɛ! A wer ɡa.

⁷ Mɛɛ kpɛɛ Korowii, on dɛɛ ja mɛ. Jwaana kwara, n liire dɛ baɡ mɛ wa.

⁸ N dɛ na kɛŋɔ, n ne Korowii lole saŋ bɛlbwa. Maa ɔmɛ bwa, dɛkalkɛŋɔ o cheɡɛ n habɔɔ.

⁹ Anomanta, n sie lɛo mɛɛ jam hen Korowii, maa wobɛlbwa ɔmɛ kpa,

¹⁰ tɔe haa dɛ tɔ mɛ ɡbemɡbe, dɛɛ le seo ta la wa. Haa he Bidɛɛɡe waa soeh ba lalabwɛ, haa ɡel ó chɔ bɔɔ bini pɔh.

¹¹ Hɛɛ baɡ mɛ mkpa ŋwɛnɛɛ. N lɔ he sie naa, n sie dɛ lɛ, n bwara ɡe ɛɛ sɔɔh mɛ saŋ bɛlbwa.