Yela 149 - mzwDBL

Korowii kpɛɛra yel

¹ Hé kpɛɛ Korowii! Hé ɡo yelfale tɛ Korowii! Hé kpɛɛro bela o nɛra ba wa aa toɡra aa wara dɛ cheme!

² Israel tena, hé ɡel he sie lɛ he hɛɡre, Korowii waa ta heyaa la wa. Saayɔn tena, hé hɛɡre he kooro wa!

³ Hé ɡo yela kpɛɛro dɛɛ sa, hé lɔ ɡboŋri ne janjela kpɛɛro.

⁴ Korowii sie dɛ lɛ o nɛra nɛ, dɛɛ cha nɛra baa dɛ pwɛr ba te, dɛ ɡel baa pɔ ba dɔma nɛ.

⁵ Korowii nɛra ba wa aa toɡra la hɛɡre, dɛ́ ɡo silɛɛ yela jwaana bwa, pɔe baa pɔ ba dɔma nɛɛ wa.

⁶ Bá do lɔŋɔre dɛɛ kpɛɛ Korowii, dɛ́ kpoŋe tokobijen sie anɛ te waa nyɛɡa,

⁷ dɛ́ pɔ harɛre nɛra nɛɛ, dɛ́ tɛr ba deŋne.

⁸ Bá vɔrɔwe ba koranar jɔɡrɔre ne, dɛ́ do kwaa ba nomonjena nakpale.

⁹ Bá tɛr harɛre nɛra la deŋne, ɡɛ Korowii aa bola la. Korowii nɛra ba wa aa toɡra bwa jirimaa la. Hé kpɛɛ Korowii!