Yela 148 - mzwDBL

Korowii kontaala bwa, hé kpɛɛro!

¹ Hé kpɛɛ Korowii! He kpɛɛ Korowii le nyundua, kwaa haa lɔ o be nyundua la.

² Nyundua toroma, hé kpɛɛro, Korowii dɔm haa wara dɛ do o be nyundua bwa, hé kpɛɛro.

³ Wee ne korobie bwa, hé kpɛɛro, weweela aa dɛ chaah bwa, hé kpɛɛro.

⁴ Nyundujaɡla ne neerare aa lɔ bela bwa, hé kpɛɛro.

⁵ Á bwa kpɛɛ Korowii, dɛkalkɛ o nyoa wobol taa o che taa.

⁶ O nyoa wobol nee o cheɡa a chebɔra, a do le saŋ bɛlbwa, dɛ ɡel a do le ɡɛ dɛɛ la, aa wola won charɛ.

⁷ Harɛ nɔ ta kwaa ne mpo bini oljena ne mpo vile bwa, hé kpɛɛro.

⁸ Bwaala nyɛɡla ne dombwea, ne baama dɛ peukpeɡa aa dɛ no o be,

⁹ bwejena ne deŋɡarere, ne daa aa dɛ nɔnɛ, dɛ peleme daa bwa,

¹⁰ ne kpɔɡ bini ola ne nae, ne kwaa aa dɛ tuuɡi tea ta, ne kwaa aa dɛ huuh, dɛ jumbii bwa, hé kpɛɛ Korowii!

¹¹ Koranar ne harɛre nɛra bwa, nomonome ne sitɔɔla bwa,

¹² ne bonɔɔna ne toli, ne banjeni ne hanjeni, dɛ bechale ɡe bwa, hé kpɛɛ Korowii.

¹³ Hé bwa kpɛɛ Korowii, dɛkalkɛŋɔ o sɔn laanee kana ɡwaa sɔn bɛlbwa, o jirima ɡwaa nyundua ne harɛ.

¹⁴ O ɡelɔ o nɛra Israel tena ba waa aa toɡra, waa do o bambile ta kohona, ásɛ ba bwa kpɛɛro. Hé kpɛɛ Korowii!