Yela 147 - mzwDBL

Nemenɛ Korowii kpɛɛra

¹ Hé kpɛɛ Korowii! A wer kɛ yá ɡo yela kpɛɛ Korowii yaa dɛ tomɔ, a dɔ silɛɛ dɛ chɛ kɛ yá kpɛɛro.

² Korowii berɔ kwaa ma Jerusalam, dɛ lawɛ Israel tena baa laɡ ba kaa harɛfala ta la ba.

³ O ɡelɔ nɛra ba bambile aa chɔɡa dɔ bolarawa, dɛ vɔrɔwe ba ŋwɛra.

⁴ Onee ta weweela dɛ jemɛ a nyoa, dɛ pa bɛlbwa sɔn.

⁵ Korowii yaa dɛ tomɔ kan, dɛɛ di kpeɡri kohona, o wejema ɡe ta jaɡa dɔe.

⁶ O dɛ cha nɛŋɡwɛɡra, kɛ nɛnchɔɡa te, o dɛ lɔ ba harɛ.

⁷ Hé ɡo yela kpɛɛ Korowii, hé kpɔ janjela lɔ yela tɛ Korowii yaa dɛ tomɔ.

⁸ Onee kpɔ baama tɔ nyundua bwa, dɛ ɡel bwaala ɛɛ nɛ harɛ ta, kpɔɡa ɡe ɛɛ moɡɛ deŋɡarere ta.

⁹ Onee dɛɛ tɛ ola kondikwa, dɛɛ tɛ ɡaahɡaah bii lɔr aa dɛ kpoa kondikwa aa di.

¹⁰ O sie aa jaɡre a bwara aa kpeɡa, kɛɛ banyoola nɛɛ lɛ,

¹¹ o sie dɛ lɛ nɛra baa dɛ ɔmɔ, ne nɛra baa kpɔ ba te dawɛ o nɛ, ne o nyina aa wola jaɡa dɔe la ta.

¹² Nɛra haa lɔ Jerusalam, hé kpɛɛ Korowii. Saayɔn tena, hé kpɛɛ Korowii haa dɛ tomɔ!

¹³ Onee ɡela bune baa kpɔa dɛɛ karɛ he ɡbeni do kpeɡri, dɛ swee andɛɛɡa dɛɛ tɛ he nɛra baa soɡe he bini.

¹⁴ Onee tɛ heyaa deŋnesɔɔhna he harɛ jwɛhre ta, asɛ dɛ tɛ heyaa mea aa do wer.

¹⁵ O bol waa harɛ nɔ ta tena be naa, ba dɛ ɛa wɔrɔbe nɛ.

¹⁶ O nɛ dombwea perɛ kɛŋɔ baa paɡri bombo, dɛ ɡel mɛn ta kɛŋɔ tɔɔ ken.

¹⁷ O ɡelɔ dombwea lee kɛŋɔ bwea ken. Umee dɛ́ won che dombwea la sɔne nyoa ɔ?

¹⁸ O bol waa asɛ dombwea la mwɛɛ, dɛ ta peu a nee la palɛ.

¹⁹ O pili o Mmarare ne o waa bini chaɡle Jekɔb naanar baa ɛ o nɛra Israel tena la.

²⁰ O ta anɔ ɛɛ tɛ harɛ bɛlbwa nɛra, baa o Mmarare jemɛ. Hé kpɛɛ Korowii!