Yela 146 - mzwDBL

Korowii waa ɛ ya Lɛɛ kpɛɛra

¹ Hé kpɛɛ Korowii! N wee, kpɛɛ Korowii!

² Mɛɛ kpɛɛro n soɡa bini bwaa, dɛ́ ɡo yela ɡe kpɛɛ Korowii maa dɛ tomɔ saŋ bɛlbwa.

³ Bɛ he te kpɔ dawɛ koranar kɛɛ sitɔɔ bɛlbwa nɛ, nɛwɛnyini bɛlbwa aa won lɛɛ.

⁴ Ba sewɔ aa, ba dɛ huɡ ba. Le awola tɔpere la, ba liire ne vɔrɔwa baa vɔrɔwa bwa dɛ ba a jaɡa.

⁵ Nomɛlbwa waa kpɔ hwɛɡa do Korowii Jekɔb aa tomɔ nɛɛ wɛɛ chao la, o na som.

⁶ Korowiirii ta nyundua ne harɛ, mpo ne kwaa aa lɔ a ta bwa. O dɛ teŋɛ o nyobaɡa ta saŋ bɛlbwa.

⁷ O bol nɛra baa dɛ fiɡ ba waa dɛɛ tɛɛ ba, nɛra lɔr aa dɛ kpo ba ɡe, o dɛ tɛɛ ba kondikwa. O ɡelɔ nɛra baa laɡ ba do dea ɛɛ di ba nyu,

⁸ dɛ ɡel nyoŋa berɛ dɛɛ na. O lawɛ nɛra baa chola dɛɛ ir, o dɛ nyin nɛra ba wa aa toɡra wa.

⁹ O kpɔ nɔn dɛɛ tɔ hɔɔhra baa soɡe ya harɛ ta nɛ, dɛɛ cha luhaahna ne bilalbii. Kɛ nɛnchɔɡa te, o dɛ chɔɡ vɔrɔwa baa dɛ vɔrɔwe.

¹⁰ Korowii waa dɛ di kora Saayɔn, ɛɛ di koraa saŋ bɛlbwa dɛɛ la. Hé kpɛɛ Korowii!