Yela 145 - mzwDBL

Korowii kpɛɛra yel

Kooro Devid yel

¹ N Naa Korowii maa dɛ tomɛ, ne n kooro, mɛɛ jaame saŋ bɛlbwaa dɛɛ la.

² Tɔpere bɛlbwaa mɛɛ ba he kpɛɛra. Mɛɛ kpɛɛre saŋ bɛlbwaa dɛɛ la.

³ N Naa Korowii, he kan dɛ chɛ kpɛɛra. He kan haa doa ɡwaa nɛwɛnyina liire ta.

⁴ Fini bii ɛɛ baɡle waa haa ɛa baɡle kerekere biirii, baa bol he wejena haa ɛa waa.

⁵ Baa bol he jirima, ne nyɛl ne kpeɡri haa doa waa. Mɛɛ lii nyokpowaa haa ɛa la waa.

⁶ Baa bol he kpeɡri ne he we-ɛɛla aa do ɔma kohona waa, ásɛ n bol he kan haa doa wa.

⁷ Baa bol he wer haa doa waa bwaa, dɛ́ ɡo yela kpɛɛ he suna haa dɛ sune nɛra nɛɛ kohona wa.

⁸ N Naa Korowii, he dɛ nyin yaa dɛ dɔ tedoma, he baah aa di warawara, he nyina aa wola jaɡa dɔe ɡe do kan.

⁹ He wer tɛ nomɛlbwa, dɛ dɔ tedoma tɛ kwaa haa taa bwa.

¹⁰ N Naa Korowii, kwaa haa taa bwa ɛɛ kpɛɛree, ásɛ he nɛra ba wa aa toɡra bwa ɡe kpɛɛre.

¹¹ Baa bol jirima he kora aa dɔa waa, dɛ́ bol kan haa doa wa,

¹² ásɛ nomɛlbwa jemɛ he wejena haa dɛ ɛ, ne jirima he kora aa dɔa wa.

¹³ He kora dii ta jaɡa dɔe, hɛɛ di koraa saŋ bɛlbwaa dɛɛ la. N Naa Korowii, he waa dɔ kasinteŋ hɛɛ teŋɛ he nyobaɡa ta, dɛ dɔ nyina tɛ kwaa haa taa bwa.

¹⁴ He lawɛ nɛra baa chola dɛɛ ir, dɛɛ cha banɔ la wenaale aa lɔ ba nɛ.

¹⁵ Kwaa haa taa bwa sie dawɛ he nɛ, hɛɛ tɛa kondikwaa saŋ aa chɛa ta.

¹⁶ He ta tea dɛɛ tɛa kohona, bɛlbwa dɔ ɡɛ waa dɛ nyin.

¹⁷ N Naa Korowii, waa haa dɛ ɛ bwa toɡrɔ, he dɛ nyin he kontaala bwa.

¹⁸ He bɛne banɔ la baa dɛ yerɛ bwa, nɛra baa dɛ yerɛ kasinteŋ ne la.

¹⁹ Nɛra baa dɛ ɔmɛ la, he dɛ tɛɛ ba ba konnyina, dɛ no ba wii dɛɛ lɛɛ ba.

²⁰ Nɛra baa dɛ nyin he waa la, he kpɔ nɔn dɛɛ tɔ ba nɛ, kɛ nɛnchɔɡa te, hɛɛ chɔɡ baa.

²¹ Mɛɛ kpɛɛ Korowii saŋ bɛlbwaa. Korowii kontaala bwa, hé kpɛɛ o sɔn waa do ɡoroŋ la, saŋ bɛlbwa dɛɛ la.