Yela 144 - mzwDBL

Kooro dɔma nɛɛ pɔe jaama

Kooro Devid yel

¹ N dɛ kpɛɛ Korowii, onee do kɛ Bwetal, n chwa baa marɔ. Onee chaɡ mɛ n jemɛ laa yoi.

² Onee Korowii waa do kɛ danjwɛjen, dɛɛ nyin n waa n chwa baa marɔ. Onee dɛɛ tɔ n nɛ, dɛɛ tɔ mɛ ɡbemɡbe, n chwa baa sɔh o lɔɡa. O ba harɛre nɛra ne harɛ, asɛ ba do n lɔɡa.

³ N Naa Korowii, nɛwɛnyina ɡee bɔkwa, hɛɛ lii ba waɔ? Ba ɡee bɔkwa, hɛɛ dawɛ ba waɔ?

⁴ Ba do kɛ nyoa peu, ba tɔpera do kɛ lileo ken, tama dɛ ba nyoɡrɔ.

⁵ N Naa Korowii, forɛ le nyundua, dɛ́ tu ba harɛ. Kpɔ nɔn leɡe bwejena, dɛ́ ɡel chuu le a ta.

⁶ Gel bwaala nyɛɡle, dɛ́ lɔ he dɔma peɡre. Ta he hɛma do ba bini, bá chwa kaa.

⁷ Le nyundua tɛr nɔn, dɛ́ lɛɛ mɛ le suna maa dɛ di nɔ ta. Lɛɛ mɛ nɛŋhɔɔhra baa dɛ yoo mɛ nɔn ta.

⁸ Nyosone ɡboo su ba nyoo, hale ba ŋwɛɛ dɛɛ ja ba nyosone ta.

⁹ N Naa Korowii, mɛɛ ɡo yelfalee tɛɛ, mɛɛ kpɔ janjelaa lɔ yela kpɛɛre.

¹⁰ Henee ɡela Israel koranar yo dɛɛ pɔ ba dɔma nɛ, dɛ lɛ he bonɔɔ Kooro Devid le seo nyoa.

¹¹ Lɛɛ mɛ le nɛŋhɔɔhra baa dɛ yoo mɛ nɔn ta, nyosone ɡboo su ba nyoo, hale ba ŋwɛɛ dɛɛ ja ba nyosone ta.

¹² Gel ya bibaala bonɔɔne saŋ do kɛŋɔ daa baa nyiŋi a ta kɛrɛdɛ, á kpeɡ dɛ́ do kpeɡri. Gel ya bihaahna ɡe do kɛŋɔ pilare baa paaɡa koodem, a ɡel o do o wer la.

¹³ Gel koo kondikwaare bwa soo siwi su ya dɔndɔŋre bini. Gel ya peera ya kaɡboŋa, hale kaɡboŋa fifi.

¹⁴ Gel ya nae loɡle, dɛ́ ya kohona dɛ bɛ a bii har dɛɛ ta. Bɛ ɡel wii ne suna dii do ya fɔɡbaahna.

¹⁵ Nɛra baa dɔ a ɡɛ waa nɔ la, ba na som. Nɛra baa dɛ tomɛ Korowii la, ba na som!