Yela 143 - mzwDBL

Chae wesoŋa

Kooro Devid yel

¹ N Naa Korowii, no n wesoŋa, che toɡra haa toɡra ta, dɛ́ na n sum. Chaŋ mɛ he kasinteŋ haa dɔa la ne.

² Bɛ men maa ɛ he bonɔɔ daah na, nomɛlbwa toole o waa toɡre he sie.

³ N dɔma ti mɛ, dɛ lɔ mɛ bil harɛ, dɛ ɡel n do biro ta, kɛŋɔ nɛra baa serewa kaa biɡri ken.

⁴ Anomanta, n hwɛɡa bwa tonɔ tonɛ, n bambile bwa chɔɡɔ.

⁵ N lii tɔpera aa baa kaa la, dɛ lii toma haa ɛa bwa naa, n dɛ na we-ɛɛla haa ɛa bwa.

⁶ N ɡɔɔ nɔɔra dɛ wi dɛɛ noe, n bambile lawɛ kɛŋɔ harɛ hole aa hiah nee ken.

⁷ N Naa Korowii, chaŋ mɛ warane, dɛkalkɛ n hwɛɡa bwa tonɔ. Bɛ sie laa kpɔ n nɛ, ɡɛ laa aa, mɛɛ doo kɛŋɔ nɛra baa serewa kaa lalabwɛɛ ken.

⁸ Dɛɛ lii mɛ he nyina aa wola jaɡa dɔe la chɔɔ bɛlbwa, dɛkalkɛ he nɛɛ n kpɔ n te dawɛ. Henee n wi dɛɛ no, baɡ mɛ ŋwɛnɛ maa kpɔ o ta.

⁹ N Naa Korowii, lɛɛ mɛ le n dɔma nɔn ta, dɛkalkɛ he bee n chwa baa sɔh.

¹⁰ Henee Korowii maa dɛ tomɛ. Baɡ mɛ mɛɛ ɛ waa haa dɛ nyin. Nyiŋi n nɛɛ kɛrɛdɛ, dɛ́ ɡel mɛɛ kpɔ ŋwɛnɛdɛɛɡe ta.

¹¹ N Naa Korowii, lɛɛ mɛ ɡɛ haa baɡ mɛ nyoa la, che he toɡra haa toɡra ta, dɛ́ lɛɛ mɛ le n wenaale ta.

¹² Koh nyina haa dɛ nyin mɛ la wa, dɛ́ kpoo n dɔma, dɛ́ chɔɡ nɛra baa dɛ fiɡ mɛ bwa, dɛkalkɛ n ɛ he bonɔɔ.