Yela 141 - mzwDBL

Jɔmɔra wesoŋa

Kooro Devid yel

¹ N Naa Korowii, n dɛ yerɛ, ba dɛ́ ba lɛɛ mɛ warane. No n wii maa dɛ wi, dɛ́ no n be.

² No n wesoŋa kɛŋɔ daawiile baa dɛ fuah a sɔɔh do som. Lɛ n nɔɔra maa ɡɔɔra dɛɛ soŋe nɔ, ɡɛ haa dɛ lɛ jɔmɔr saraha la.

³ N Naa Korowii, cha mɛ, mɛɛ nyiŋi wobol aa dɛ le n nyoaa.

⁴ Laa n bambile kpɔ wechɔɡa ɛɛ ta, bɛ ɡel n ja wechɔɡ-ɛɛra nɛɛ dɛɛ ɛ wechɔɡa, kɛɛ n ne ba pɛ nɔn di ba silɛɛ kondikwa.

⁵ Gel nɛn o wa aa toɡra kah mɛ dɛ́ toɡ mɛ, nyina waa dɛ nyin mɛ wa. Maa duure bɛlbwa nyin wechɔɡ-ɛɛra be, dɛkalkɛ saŋ bɛlbwaa mɛɛ soŋe Korowii ŋɔ ó chɔɡ ba wobɛlbwa.

⁶ Baa ba che bwejena dor dɛ́ taɡɛ wechɔɡ-ɛɛra sitɔɔla ta harɛ la, anee dɛ́ ɡel ba jemɛ kɛŋɔ n waa la ɛ kasinteŋ.

⁷ Baa boloo ŋɔ, “Gɛ ba yon buɡli harɛ la, ɡɛɛ ya hoɡa lɔ peɡre lalbɔɔ nyoa.”

⁸ Kɛ hen Nemenɛ Korowii nɛɛ mɛɛ hwɛɡɛ, henee n chwa baa marɛ, bɛ ɡel n sewɛ.

⁹ Lɛɛ mɛ le bela baa har mɛ ta, wechɔɡ-ɛɛra bela nɔɔ n ŋɔ nɔ.

¹⁰ Gel ba ɡbaɡba lee bela baa hara ta, ásɛ n te valɛ ba kaa sɔnɔnɔɔ ken.