Yela 140 - mzwDBL

Nɔn kpɔe dɛ́ tɔ nɛn nɛɛ wesoŋa

Kooro Devid yel

¹ N Naa Korowii, lɛɛ mɛ le nɛnchɔɡa nɔn ta, lɛɛ mɛ le naɡrenyine be.

² Saŋ bɛlbwaa baa vɔrɔwe wechɔɡa vɔrɔwa, dɛɛ ba waa aa dɛ ir nɛra bambile baa yo tɔpere bɛlbwa ne.

³ Ba nyoa wobol dɛ kpo kɛ tɛɡchɔɡa ken, dɛ do kɛŋɔ domkpuli aa choɡe nɛn.

⁴ N Naa Korowii, kpɔ nɔn tɔ n nɛɛ nyubinikpeɡ tena nɔn ta. Lɛɛ mɛ le naɡrenyine baa dɛ vɔrɔwe n chɔɡa vɔrɔwa be.

⁵ Mbarafo tena sɔɔh dɛ haɡre mɛ bela, ba kpɔa bil ŋwɛnɛ maa dɛ kpɔ o ta la ta, ásɛ dɛ dɔɔ mɛ lawɛ.

⁶ N ŋɔ n Naa Korowii be ŋɔ, “Henee Korowii maa dɛ tomɛ.” No n wii dɛ́ cha mɛ!

⁷ Nemenɛ Korowii, he kpeɡri dɛɛ che n habɔɔ, henee tɔ mɛ ɡbemɡbe laa ta,

⁸ bɛ ɡel nɛnchɔɡa dɔ ba tetoowa, bɛ ɡel ba vɔrɔwa baa dɛ vɔrɔwe maɡre, asɛ baa ɛ mbarafo a wa.

⁹ Bɛ ɡel n dɔma won pɔ n nɛ, ɡel ba aahra baa dɛ aah mɛ ɡure ba nyu ta.

¹⁰ Chure ninhɔla ta ba nɛ, ɡel ba taɡ ba do bɔluŋ bini baa wola won le kpa.

¹¹ Bɛ ɡel nɛra baa teŋe nyosone dɛɛ dawɛ nɛra nɛɛ waa maɡre tɛɛ ba. Gel waa pu naɡrenyine, dɛ́ chɔɡ ba.

¹² N jemɔ kɛŋɔ Korowii bol nyaara waa dɛɛ tɛɛ ba, dɛɛ lɛ ba nyoa.

¹³ Kasinteŋ, nɛra ba wa aa toɡra la ɛɛ kpɛɛree, baa do he siee.