Yela 139 - mzwDBL

Korowii wejema ne nɔn kpɔe dɛ́ tɔ nɛra nɛ

Kooro Devid yel

¹ N Naa Korowii, he pese mɛ kɛrɛdɛ, dɛ jemɛ n wobɛlbwa.

² He jemɛ n harɛ soɡa ne n ira dɛ che bwa bini, n ne he baah jaŋne kwaraa naa, he jemɛ n nyu bini liire bwa.

³ Dɛ n chɔɔ kɛɛ n iro dɛ valɛ dɛɛ kaa laa, he te jemɛ anɔ la maa dɛ ɛ bwa.

⁴ Mɔɔ n pili nyoa dɛ́ bol waa la, dɛ he jemɛ waa maa bol bwa.

⁵ He lɔ n sie dɛ do n habɔɔ, dɛ kpɔ nɔn dɛɛ tɔ n nɛɛ he kpeɡri ne.

⁶ Gɛ haa jemɛ n waa la kpo n nyoa kohona, maa wone dɛɛ no a mun.

⁷ Leperaa n kpɔ haa wola men na nɔ? Ɛrɛɛ mɛɛ ba wona chwa le he sie nɔ?

⁸ N la nyundua aa, he lɔ bela, n kaa chɔ lalabwɛɛ kwaraa naa, he lɔ bela.

⁹ N iro kaa bojaŋ wee leebɔr, kɛɛ dɛ ka so bojaŋ wee cholibɔr kwaraa naa,

¹⁰ he lɔ bela dɛ tɔ n sie he kpeɡri ne dɛɛ cha mɛ.

¹¹ N ŋɔ ń ka sɔh biro ta ó tɔ n nɛ, kɛɛ bɔr waa chaahna bar mɛ la bir tɔ n nɛ, kɛŋɔ jwaana aa,

¹² biro ta komɛl waa won tɔ waa ta he be, jwaana do kɛŋɔ webaŋa he be, dɛkalkɛ biro ne bochaah bwa beŋkpoŋ.

¹³ Henee ta n bwa, dɛ ta mɛ pɛ n nya tea bini.

¹⁴ N dɛ kpɛɛre, he we-ɛɛla haa cheɡɛ a ta dɛ ta mɛ la bwa ɔma, dɛ dɔ nyokpoa kohona. N jemɛ a bwa kɛrɛdɛ ken.

¹⁵ Haa ta n hoɡa dɛɛ pɛ kɛrɛdɛ ken n nya tea bini n sɔh bela dɛɛ kpeɡ la, dɛ he jemɛ n wa.

¹⁶ He na ɡɛ maa doa mɔɔ ba lol mɛ. He chwerɛ tɔpera maa di harɛ ta do he tɔn bini mɔɔ a bɛlbwa pa mun.

¹⁷ N Naa Korowii, he liire kan maa wola won jemɛ! A kan, a ɡwaa n liire!

¹⁸ N ŋɔ n kura aa, a ɡwaa mpo nyoa hɛŋle. N chɔɔ dɛ har kwaraa naa, n ne henee ta.

¹⁹ N Naa Korowii, n dɛ nyin kɛ he fe aa kpoo nyubinikpeɡ tena! N dɛ nyin nɛra baa dɛ kpoo nɛra fee ɡel mɛ, ásɛ n bwara sɔɔh mɛ.

²⁰ Ba dɛ bol he bwara wechɔɡe, dɛ bol waa dɛɛ chɔɡ he sɔn.

²¹ N Naa Korowii, n hah nɛra baa haeh! N kii nɛra ba deŋne aa kpeɡa baa jo he nɛ!

²² N hah ba kɛrɛdɛ, dɛ kpɔ ba ɛ n dɔma.

²³ N Naa Korowii, pese mɛ kɛrɛdɛ, dɛ́ jemɛ n liire, daah mɛ na, dɛ́ jemɛ n nyu bini.

²⁴ Nyiŋi dɛ na kɛ wechɔɡa ane lɔ n bini, dɛɛ tɔ n sie ŋwɛnɛdɛɛɡe ta, saŋ bɛlbwa.