Yela 138 - mzwDBL

Korowii jaama wesoŋa

Kooro Devid yel

¹ N Naa Korowii, mɛɛ kpɛɛre n bambile bwa nee, mɛɛ ɡo yelaa kpɛɛre voɡa sie.

² Mɛɛ kpɔ sie pa he Dea waa do ɡoroŋ la taa, dɛ́ ba harɛ dɛɛ kpɛɛre, he nyina aa wola jaɡa dɔe, ne kasinteŋ dɔe la wa. Dɛkalkɛ he sɔn ne waa haa ŋɔa hɛɛ ɛo kan ɡwaa komɛlbwa.

³ Maa wia noe la, he noɔ dɛ chaŋ mɛ, he cheɡɛ he kpeɡri ta dɛ tɛ mɛ bokpeɡa.

⁴ N Naa Korowii, koranar baa lɔ harɛ nɔ ta bwa ɛɛ kpɛɛree, dɛkalkɛ ba no waa haa bola.

⁵ Baa kpɔ waa haa ɛa laanee ɡo yela, dɛkalkɛ he jirima kan kohona.

⁶ A lole kɛŋɔ he lɔ nyundujaɡla dɛɛ nyiŋi nɛŋɡwɛɡra nɛ, kɛ mbarafo tena te, he dɛ na ba.

⁷ N ba dɛ na wahala kohona naa, henee kpɔ nɔn dɛɛ tɔ n nɛ. He dɛ yo n dɔma ba baah aa di n nɛ, dɛ che he kpeɡri ta dɛɛ lɛɛ mɛ.

⁸ N Naa Korowii, hɛɛ ɛ waa haa baɡ mɛ nyoa laanee. He nyina haa dɛ nyin yaa lole saŋ bɛlbwa dɛɛ la, anomanta, bɛ he ɡbaɡba nɛra haa ta yaa la vɛh.