Yela 135 - mzwDBL

Korowii kpɛɛra yel

¹ Hé kpɛɛ Korowii, he nɛra haa ɛ o bonɔɔna la, hé kpɛɛro,

² he nɛra haa dɛ tomɛ Korowii yaa dɛ tomɔ o Dea la.

³ Hé kpɛɛro, o wer waa doa wa, hé ɡo yela kpɛɛ o sɔn, dɛkalkɛ o wer.

⁴ O le Jekɔb luɡe tena, Israel tena baa ɛ o ɡbaɡba nɛra la tɛ o te.

⁵ N jemɔ kɛ Korowii yaa dɛ tomɔ nɔ kan. O kan ɡwaa voɡare bwa.

⁶ Gɛ waa dɛ nyin laanee wɛɛ ɛ nyundua ne harɛ, mpo ne o vile bwa ta.

⁷ O ɡelɔ baama aa dɛ nɛ bwaala ir dɛɛ le harɛ jaɡa, dɛ ɡel bwaala ɛɛ nɛ dɛɛ nyɛɡle, asɛ dɛ ɡel peu ta le bela waa lole.

⁸ O kpoo Ijipt harɛ nɛra biloɡla, ne kondɛɛra ɡe biloɡla.

⁹ O ɛ nyokpowaa Ijipt tena bini, dɛ tɛr Ijipt kooro ne o nomonome bwa deŋne.

¹⁰ O kpoo harɛre nɛra ɡalɡa, hale koranar baa dɔ kpeɡri.

¹¹ Banee, Amɔre tena Kooro Sihon ne Basan Kooro Ɔɡ, dɛ Keenan harɛ koranar bwa,

¹² asɛ dɛ kpɔ ba harɛre la tɛ o nɛra Israel tena a ɛ ba kwa.

¹³ N Naa Korowii, he sɔn haa dɔa la ɛɛ do lee saŋ bɛlbwa dɛɛ la. Naanar baa ka ba bwa ɛɛ dɛɛ lii he waa.

¹⁴ Korowii ɛɛ bol o nɛra waa tɛɛ ba ásɛ dɛ dɔ tedoma tɛ o bonɔɔna.

¹⁵ Suuɡapoŋa ne suuɡaswɛm nee ba ɛ harɛre la voɡare. Nɔɔra nee ba kwaara.

¹⁶ A dɔ nyoo, kɛ aa waa bol, dɛ dɔ sibie, kɛ aa na.

¹⁷ A dɔ deŋna, aa waa no, aa won hwee ɡe.

¹⁸ Nɛra baa kwaara ne nɛra baa kpɔ ba te dawɛ a nɛɛ bwa beŋkpoŋ.

¹⁹ Israel tena, hé kpɛɛ Korowii, hé nɛra haa ɛ o sɔfore ɡe kpɛɛro.

²⁰ Lewi dea tena, hé kpɛɛ Korowii, hé nɛra haa dɛ tomɔ bwa ɡe kpɛɛro.

²¹ Hé kpɛɛ Korowii waa lɔ o Dea bwɛjen Saayɔn, dɛ do Jerusalam waa ɛ o dem la. Hé kpɛɛ Korowii!