Yela 119 - mzwDBL

Korowii Mmara la

¹ Nɛra ba we-ɛɛla aa toɡra, baa teŋɛ Korowii Mmarare ta la, ba na som.

² Nɛra baa dɛ nyin o waa dɛɛ teŋɛ a ta bambile bwa ne la, ba na som.

³ Baa wechɔɡa bɛlbwa ɛ, ba dɛ valɛ o ŋwɛnɛre waa baɡla la ta.

⁴ N Naa Korowii, he kpɔ he Mmarare tɛ yaa, dɛ ŋɔ yá kpɔ kasinteŋ dɛɛ teŋɛ a ta.

⁵ N dɛ nyin kɛ n waa fe dɔ kasinteŋ, mɛɛ teŋɛ he waa ta!

⁶ Dɛ n do sie dɛɛ teŋɛ he waa ta naa, sihiih aa men kpo bwa.

⁷ Dɛ n dɛ hweli he wa aa toɡra dɛɛ teŋɛ a ta naa, mɛɛ dɔ bambidɛɛɡee dɛɛ kpɛɛre.

⁸ Mɛɛ teŋɛ he Mmarare taa, bɛ men vɛh kwara.

Korowii Mmarare ta teŋa

⁹ Ɛrɛɛ bonɔɔ we-ɛɛla ɛɛ ba wona do wer he be nɔ? Nemenɛ wɛɛ teŋɛ he Mmarare ta.

¹⁰ N dɛ tomɛ n bambile bwa ne. Bɛ ɡel n vɛh waa haa do mɛ a ta la ta teŋa.

¹¹ N kpɔ he waa do n bambile bini, dɛ bɛ hen wechɔɡa ɛ.

¹² N Naa Korowii, n dɛ kpɛɛre, baɡ mɛ he Mmarare la.

¹³ Mɛɛ dɛɛ bol he waa haa kpɔa baɡ mɛ laanee nɛra be.

¹⁴ N sie dɛ lɛ he waa ta teŋa, ɡwaa kɛ maa dɔ kondɔɔh kohona.

¹⁵ N kpɔ he waa la do n nyu bini, dɛɛ kari a bwa.

¹⁶ N dɛ nyin he Mmarare la kohona, maa he waa laanee vɛh.

Korowii waa ta teŋa dɔ silɛɛ

¹⁷ Nyiŋi men maa ɛ he bonɔɔ nɛɛ kɛrɛdɛ, ásɛ n won so dɛɛ teŋɛ he waa haa baɡ mɛ la ta.

¹⁸ Pili n sie, ń won jemɛ he waa aa dɔ kasinteŋ he Mmarare ta la.

¹⁹ N ɛ hɔɔh harɛ nɔ ta, bɛ he waa haa do mɛ a ta la kpɔ sɔɔh mɛ.

²⁰ N bambile lawɔ kɛ mɛɛ teŋɛ he Mmarare la ta, saŋ bɛlbwa.

²¹ He dɛ kah mbarafo tena, dɛɛ taah nɛra baa vɛh he waa ta teŋa.

²² Lɛɛ mɛ le chɛɡa ne sihiih ta, dɛkalkɛ n dɛ teŋɛ he Mmarare ta.

²³ A lole kɛ nɛra baa dɛ di kpeɡri dɛ vɔrɔwe n vɔrɔwa, kɛ mɛɛ kpɔ he waa laanee do n nyu bini.

²⁴ He Mmarare laanee dɛɛ tɛ mɛ silɛɛ, anee dɛɛ ja mɛ.

Korowii Mmara ta teŋa siswɛm ne

²⁵ N cheɡɛ seo nyoa, ɡel he waa la tɛ mɛ bokpeɡfala, ɡɛ haa baɡ mɛ nyoa la.

²⁶ N bol n wenaale baɡle, asɛ he chaŋ mɛ, baɡ mɛ he ŋwɛnɛre.

²⁷ Cha mɛ ń won no he waa la mun, ásɛ mɛɛ lii he nyokpowe-ɛɛla la.

²⁸ N dɛ di suna kohona, tɛ mɛ bokpeɡa, ɡɛ haa baɡɛ nyoa la.

²⁹ Lee mɛ waa aa ɛ nyosone ta, he wa aa toɡra nomanta, chaɡ mɛ he Mmarare la.

³⁰ N dɛ nyin kɛ n waa dɔ kasinteŋ, dɛ kpɔ n te dawɛ he waa ta.

³¹ N Naa Korowii, n lawɛ he Mmarare la kpoŋe kiŋkiŋ, bɛ ɡel sihiih kpo mɛ.

³² Mɛɛ swɛɛ siwii dɛɛ teŋɛ he webaɡla ta, dɛkalkɛŋɔ he cha mɛ, dɛ ɡel mɛɛ no waa mun kɛrɛdɛ.

Waa mun noe wesoŋa

³³ N Naa Korowii, baɡ mɛ he Mmarare la, ásɛ mɛɛ teŋɛ a ta saŋ bɛlbwa.

³⁴ Cha mɛ n won dɛɛ no waa mun, ásɛ mɛɛ teŋɛ he waa ta, n bambile bwa ne.

³⁵ Chaɡ mɛ he waa ŋwɛnɛre mɛɛ kpɔ a ta, dɛkalkɛ a taa mɛɛ dɔ silɛɛ.

³⁶ Gel mɛɛ nyin he waa ta teŋa ta, ɡwaa kɛŋɔ maa dɔ kwa.

³⁷ Bɛ ɡel n pɛla do kwaa aa wola tɔnɔ dɔe ta. Tɛ mɛ mkpa ɡɛ he waa la aa baɡla la.

³⁸ Tɛ men maa ɛ he bonɔɔ kon haa baɡ mɛ nyoa, ɡɛ haa baɡɛ nɛra baa dɛ ɔmɛ la.

³⁹ Lɛɛ mɛ le chɛɡa maa dɛ ɔmɛ kohona ta, dɛkalkɛ he waa dɔ nyokpoa.

⁴⁰ N dɛ nyin he waa la ta teŋa kohona. Che toɡra he wa aa toɡra ta dɛ tɛ mɛ mkpa.

Korowii waa la yaradae

⁴¹ N Naa Korowii, ɡel n na he nyina aa wola jaɡa dɔe la. Lɛɛ mɛ ɡɛ haa baɡɛ nyoa la.

⁴² Ásɛ n won chaŋe nɛra baa dɛ chɛɡ mɛ, dawa maa kpɔ n te dawɛ he waa ta nomanta.

⁴³ Gel n won kasinteŋ bola saŋ bɛlbwa, dɛkalkɛŋɔ n hwɛɡa bwa lɔ he waa la ta.

⁴⁴ Mɛɛ dɛɛ teŋɛ he Mmarare la taa, saŋ bɛlbwa dɛɛ la.

⁴⁵ Mɛɛ valɔɔ maa wola ɔmɛ, dɛkalkɛŋɔ n teŋɛ he Mmarare ta.

⁴⁶ Mɛɛ bol he waa koranar sie, sihiih aa wola men kpo.

⁴⁷ Maa dɛ nyin he Mmarare la nomanta, n sie dɛ lɛ a ta teŋa ta.

⁴⁸ N dɛ nyin he waa la dɛɛ duura, mɛɛ kpɔa do n nyu bini.

Yarada dɔe Korowii Mmara ta wa

⁴⁹ Lii men maa ɛ he bonɔɔ waa haa baɡ mɛ nyoa la. A ɡelɔ n dɔ hwɛɡa.

⁵⁰ Bolarawa maa dɔa dɛ le n wenaale bini laanee kɛŋɔ, he nyoa haa baɡ mɛ la ɡelɔ n dɔ mkpa.

⁵¹ Mbarafo tena aa n loro dii ɡel bwa, kɛ a ta ɡelɛ n laa n te kpɔ he Mmarare ta teŋa ta.

⁵² N Naa Korowii, n lii he Mmarare aa lole dɛ le saŋ la bwa wa aa, dɛ n dɔ bolarawa.

⁵³ N nao kɛ nɛnchɔɡa vɛh he Mmarare la ta teŋa aa, dɛ n baah diu.

⁵⁴ N soɡa tama harɛ nɔ ta nɔ, he waa laanee ber mɛ yela mɛɛ ɡo.

⁵⁵ N Naa Korowii, hale jwaana n dɛ lii he wa, dɛɛ teŋɛ he Mmarare ta.

⁵⁶ Anee ɛ waa maa dɛ ɛ, dɛɛ teŋɛ he waa la ta tɔpere bɛlbwa.

Korowii Mmarare ta teŋa kasinteŋ ne

⁵⁷ N Naa Korowii, henee n komɛlbwa. N sɛoh kɛŋɔ mɛɛ teŋɛ he Mmarare la taa.

⁵⁸ N bambile bwa nee mɛɛ nyin he bɔr. Sune n nɛ, ɡɛ haa baɡ mɛ nyoa la.

⁵⁹ N nyiŋi ɡɛ n we-ɛɛla aa doa dɛ charɛ n liire, dɛ baa teŋɛ he waa la ta.

⁶⁰ Mɛɛ ɛ waranee maa wola hɛlɛ, dɛ́ɛ teŋɛ waa haa do mɛ a ta la.

⁶¹ Hale nɛnchɔɡa har mɛ bela kwaraa naa, maa he Mmarare laanee soh bwa.

⁶² Harambaŋa n yon ir dɛ́ɛ kpɛɛre, ɡɛ he waa la aa toɡra wa.

⁶³ N kpɔ nomɛlbwa waa dɛ tomɛ la ɛ n dam, nɛra baa dɛ teŋɛ he Mmarare ta bwa.

⁶⁴ N Naa Korowii, he nyina aa wola jaɡa dɔe su harɛ nɔ ta bwa. Baɡ mɛ he Mmarare la.

Korowii Mmarare wer aa doa

⁶⁵ N Naa Korowii, he teŋɛ he nyobaɡa ta, dɛ ɛ men maa ɛ he bonɔɔ nɔ wedɛɛɡa.

⁶⁶ Tɛ mɛ wejema ne liire, dawa maa kpɔ n te dawɛ he Mmarare ta la nomanta.

⁶⁷ Mɔɔ he tɛr n deŋne la, dɛ wechɔɡaa n ɛ, kɛ taraken te n dɛ teŋɛ waa haa do mɛ la ta.

⁶⁸ He waa wer, he wobɛlbwa ɡe wer, chaɡ mɛ he waa la.

⁶⁹ Mbarafo tena teŋe nyosone dawɛ n nɛ, kɛ n bambile bwa nee mɛɛ teŋɛ he Mmarare ta.

⁷⁰ Ba nyu bini kpeɡri, ba tea aa nɛn nɛɛ domɛ, kɛ he Mmarare la taa mɛɛ dɔ silɛɛ.

⁷¹ A wer kɛ maa dɔ deŋnetɛra, dɛkalkɛ a ɡelɔ n won hweli he waa la.

⁷² Mmarare haa kpɔa tɛ mɛ la ɡwaa mɛ harɛ nɔ ta suuɡa bwa, hale suuɡaswɛm ne suuɡapoŋa ta an tele.

Korowii Mmara kasinteŋ aa dɔa

⁷³ Henee ta mɛ, dɛ kpɔ nɔn tɔ n nɛ. Tɛ mɛ waa mun noe, ń kpɔ hweli he Mmarare la.

⁷⁴ Nɛra baa dɛ tomɛ la na mɛ naa, ba sie ɛɛ lɛo, dɛkalkɛ n kpɔ n te dawɛ he waa la ta.

⁷⁵ N Naa Korowii, n jemɔ kɛŋɔ he bole pae toɡrɔ, he che kasinteŋ ta dɛ tɛr n deŋne.

⁷⁶ Kpɔ he nyina aa wola jaɡa dɔe la larawe n bwara ɡɛ haa baɡɛ men maa ɛ he bonɔɔ nyoa la.

⁷⁷ Sune n nɛ, ásɛ n won so le, dɛkalkɛ n sie dɛ lɛ he Mmarare la ta teŋa ta.

⁷⁸ Gel sihiih kpo mbarafo tena, nyosone baa teŋa dɛɛ dawɛ n nɛ pɛɛpɛɛ wa, kɛ n te, mɛɛ dɛɛ lii he waa laanee.

⁷⁹ Gel nɛra baa dɛ tomɛ la berɛ ba n be, nɛra baa jemɛ he Mmarare la bwa.

⁸⁰ Gel n bambile lawɛ he waa la, mɛɛ teŋɛ a ta kɛrɛdɛ, ásɛ sihiih bɛ men kpo.

Korowii nɛn lɛɛ wesoŋa

⁸¹ N Naa Korowii, n nyiŋi he siwi ta kɛ hɛɛ ba lɛɛ mɛɛ kahonɛ, n hwɛɡa bwa lɔ he waa la ta.

⁸² N nyiŋi waa haa baɡ mɛ nyoa la ŋwɛnɛ dɛ ba koh, dɛɛ bɔɔ ŋɔ, “Saŋ besoo hɛɛ ba n bwara larawa ɔ?”

⁸³ N do kɛ yakwajɛɡla, baa wola men kpɔe dɛɛ ɛ wobɛlbwa ken, kɛ n ta he Mmarare la soɛh.

⁸⁴ N kpae ka tel saŋ besoo? Bɛweeree hɛɛ ba n dɔma deŋne tɛra ɔ?

⁸⁵ Mbarafo tena baa wola he Mmarare ta teŋɛ kwi bɔɔne, dɛ́ kpɔ har mɛ bela.

⁸⁶ He Mmarare la wer, kɛ nɛn kpɔ o te dawɛ a ta kohona. Lɛɛ mɛ le nɛra baa hah mɛ pɛɛpɛɛ nɔn ta.

⁸⁷ A ka tama ba kpo mɛ, kɛ n ta he Mmarare ta teŋa ɡelɛ bwa.

⁸⁸ Che he nyina aa wola jaɡa dɔe la ta, dɛ́ kpɔ nɔn tɔ n nɛ, ásɛ mɛɛ teŋɛ he webaɡla bwa ta.

Yarada dɔe Korowii Mmara ta

⁸⁹ N Naa Korowii, he waa lole saŋ bɛlbwa, a cheɡɔ kiŋkiŋ nyundua.

⁹⁰ He kasinteŋ lole ka tel ya naanar baa teŋɛ dɔŋa nɛɛ bwa. Henee kpɔ harɛ cheɡ o chebɔr asɛ o do le.

⁹¹ He nyoa wobol nee he ta kwaa bwa, asɛ a do le ba le fini, dɛkalkɛ a bwa lɔ he lɔɡa.

⁹² Dɛ he waa ta laa n silɛɛ che naa, n fe sewɛ n wenaale ta.

⁹³ Maa he waa laanee vɛh bwa, dɛkalkɛŋɔ maa dɛ teŋɛ a ta waa he ɡel n so le.

⁹⁴ Lɛɛ mɛ, dɛkalkɛ henee dɔɔ mɛ, n takapɔ dɛɛ teŋɛ he waa la ta.

⁹⁵ Nɛnchɔɡa dɛ́ kpa kɛŋɔ bá kpo mɛ, kɛ ane a bwa, maa he Mmarare la ta teŋaa ɡel, mɛɛ dɛɛ liiraa.

⁹⁶ N nao kɛŋɔ wobɛlbwa dɔ a jaɡa, kɛ he Mmarare la te lole dɛɛ la.

Korowii Mmarare la nyina

⁹⁷ N Naa Korowii, n dɛ nyin he Mmarare la kɛrɛdɛ, tɔpere bɛlbwaa mɛɛ lii a wa.

⁹⁸ He Mmarare la lɔ n liire bini tɔpere bɛlbwa, dɛ ɡel n dɔ wejema, dɛ ɡwaa n dɔma.

⁹⁹ N dɛ no waa mun ɡwaa nɛra maa hweli waa le ba be, dɛkalkɛ he Mmarare la waa lɔ n nyu bini mɛɛ liira.

¹⁰⁰ N dɔ wejema dɛ ɡwaa nomonome baa hwɛɛhra, dɛkalkɛ n dɛ teŋɛ he Mmarare ta.

¹⁰¹ Maa dɛ nyin mɛɛ teŋɛ he waa ta nomanta, n laa n te kpɔ wechɔɡa ɛɛ ta.

¹⁰² N ta he Mmarare la vɛɛh, dɛkalkɛŋɔ henee baɡ mɛ wa.

¹⁰³ He waa la som n be kohona, a som dɛ ɡwaa tooh kwara.

¹⁰⁴ A taa n dɔ wejema dɛɛ le, anomanta, n hah wechɔɡa nɛra aa dɛ ɛ.

Korowii Mmara waa dɛ chaah bɔr kɛŋɔ kandea

¹⁰⁵ He waa la do kɛ kandea dɛ tɛ mɛ, dɛ ɛ nii dɛɛ chaah mɛ ŋwɛnɛ, bela bwa maa kpɔ.

¹⁰⁶ N ŋwɛɛrɔ kɛrɛdɛ kɛŋɔ mɛɛ teŋɛ he Mmarare aa toɡra la taa.

¹⁰⁷ N Naa Korowii, n na wahala kohona, tɛ mɛ bokpeɡfala ɡɛ haa baɡ mɛ nyoa la.

¹⁰⁸ N Naa Korowii, no n jaama maa dɛ jaame nɔ, dɛ́ chaɡ mɛ he Mmarare la.

¹⁰⁹ Saŋ bɛlbwa n cheɡɛ seo nyoa, n ta he waa soɛh bwa.

¹¹⁰ Nɛnchɔɡa har mɛ bel, kɛ n ta habɔɔ berɛ kpo he Mmarare la bwa.

¹¹¹ He Mmarare la do kɛ kwaa a yoɡ aa kpeɡa tɛ mɛ saŋ bɛlbwa ken, anee dɛɛ tɛ mɛ silɛɛ.

¹¹² N bambile lawɔ kɛ mɛɛ teŋɛ he waa la taa, ka tel tɔpere maa sewɛ.

Bosɔɔhna aa lɔ Korowii Mmara ta

¹¹³ N hah nɛra baa wola bambile bwa kpɔe dɛɛ tomɛ, kɛ n te dɛ nyin he Mmara la.

¹¹⁴ Henee n chwa baa marɛ hɛɛ tɔ mɛ ɡbemɡbe, n kpɔ n hwɛɡa bwa do he waa la ta.

¹¹⁵ Hé le n nɛɛ kaa, wechɔɡ-ɛɛra, ásɛ n won dɛɛ teŋɛ waa Korowii maa dɛ tomɔ aa do mɛ ta!

¹¹⁶ Tɛ mɛ bokpeɡa ásɛ n won so le, ɡɛ haa baɡ mɛ nyoa la. Bɛ ɡel n hwɛɡa ta pɛɛ.

¹¹⁷ Laɡ mɛ kpoŋe, dɛ́ lɛɛ mɛ, ásɛ n cheɡ deŋne dɛɛ no waa he Mmarare la aa dɛ baɡle.

¹¹⁸ Haa nɛra baa vɛh he Mmarare ta teŋa nyin, dɛkalkɛ ba nyosone vɔrɔwa bwa ɛ pɛɛpɛɛ.

¹¹⁹ Nɛnchɔɡa do kɛŋɔ haahra he siwi ta, anomanta, n sie dɛ lɛ he webaɡla ta.

¹²⁰ He ɔma ɡelɔ n bwara ɛɛ chel, n dɛ ɔmɛ he Mmarare la.

Korowii Mmarare ne a ta teŋa

¹²¹ N ɛ wa aa toɡra dɛ do wer, bɛ men ɡel tɛ n dɔma.

¹²² Nyiŋi men maa ɛ he bonɔɔ nɛɛ kɛrɛdɛ, bɛ men ɡel tɛ mbarafo tena bá fiɡ mɛ.

¹²³ N nyiŋi he siwi ta dɛ ba koh kɛ hɛɛ ba lɛɛ mɛɛ, dɛɛ nyiŋi nyoa haa baɡ mɛ ŋɔ, hɛɛ ba lɛɛ mɛɛ la.

¹²⁴ Kpɔ he nyina aa wola jaɡa dɔe la nyin mɛ, dɛ́ chaɡ mɛ he Mmarare la.

¹²⁵ Tɛ men maa ɛ he bonɔɔ nɔ waa mun noe, ásɛ n won no he waa la mun.

¹²⁶ N Naa Korowii, saŋ telo kɛ he ir nyu ne, dɛkalkɛ nɛra vɛh he Mmarare la ta teŋa.

¹²⁷ N dɛ nyin he Mmarare haa dɛ do mɛ a ta la ɡwaa suuɡaswɛm, hale suuɡaswɛm tenten bɛlbwa,

¹²⁸ anomanta, n dɛ teŋɛ he webaɡla ta, dɛ hah waa aa wola were te bɛlbwa.

Korowii Mmara ta teŋa nyina

¹²⁹ He webaɡla waa dɔ nyokpoa, anomanta, n dɛ teŋɛ a ta n bambile bwa ne.

¹³⁰ He waa la baɡla ɡelɔ nɛra liire bini ɛɛ chaah, dɛɛ tɛ nɛra baa wola wobɛlbwa jemɛ wejema.

¹³¹ N pɛla lawɛ he Mmarare kohona, n sie beɡrɔ kɛ ń jemɛ waa aa dɛ baɡle.

¹³² Berɛ sie n be, dɛ́ na n sum, ɡɛ haa dɛ ɛ nɛra baa dɛ nyini bwa la.

¹³³ Bɛ ɡel n lɔ na, ɡɛ haa baɡɛ nyoa la, dɛ bɛ ɡel wechɔɡa ɡwaa n nɛ.

¹³⁴ Lɛɛ mɛ nɛra baa dɛ fiɡ mɛ nɔn ta, ásɛ n won dɛɛ teŋɛ he Mmarare la ta.

¹³⁵ Nyiŋi men maa ɛ he bonɔɔ nɛ, dɛ́ chaɡ mɛ he waa la.

¹³⁶ N sinii dɛ yɔɔ mɛ kɛŋɔ nenapale ken, dɛkalkɛ nɛra aa he Mmarare ta teŋɛ.

Korowii Mmara la kasinteŋ waa dɔa

¹³⁷ N Naa Korowii, he waa toɡrɔ, he Mmarare ɡe do wer.

¹³⁸ He Mmarare bwa wer dɛ toɡre, a chɛ kɛ yá kpɔ ya te dawɛ a ta.

¹³⁹ N baah dɛ fuh kohona kɛŋɔ nii ken, dɛkalkɛ n dɔma laa sie kpɔ he webaɡla ta.

¹⁴⁰ He nyoa haa baɡa ɛ kasinteŋ. Men maa ɛ he bonɔɔ sie dɛ lɛ a ta.

¹⁴¹ A lole kɛŋɔ n toole wobɛlbwa bini te, kɛ maa he webaɡla la soh.

¹⁴² He toɡra haa toɡra ta jaɡa dɔe, asɛ he Mmara ɡe dɔ kasinteŋ.

¹⁴³ Wenaale ne suna su n bwa, kɛ he waa laanee dɛɛ tɛ mɛ silɛɛ.

¹⁴⁴ He webaɡla toɡrɔ saŋ bɛlbwa. Tɛ mɛ waa mun noe, ásɛ n won so le.

Korowii nɛn lɛɛ wesoŋa

¹⁴⁵ N Naa Korowii, n dɛ yerɛ n bambile bwa ne. Sɛh n be, mɛɛ teŋɛ he Mmarare taa.

¹⁴⁶ N wio dɛɛ yerɛ. Lɛɛ mɛ, ásɛ mɛɛ teŋɛ he Mmarare ta.

¹⁴⁷ Mɔɔ wee aa le chɔmbibii la, dɛ n wio noe kɛ he cha mɛ. N kpɔ n hwɛɡa do he waa la ta.

¹⁴⁸ He Mmarare la waa lɔ n nyubini. Jwaana bwaa mɛɛ lii a wa, maa dom chɔ.

¹⁴⁹ N Naa Korowii, che he nyina aa wola jaɡa dɔe bwa ta, dɛ́ chaŋ mɛ. Sune n nɛɛ dɛ́ lɛɛ mɛ.

¹⁵⁰ Nyubinikpeɡ tena baa teŋɛ n nɛɛ puu mɛ tonɛ, baa he Mmarare ta teŋɛ.

¹⁵¹ Kɛ hen Korowii, he ja n nɛ, he Mmarare bwa ɡe ɛ kasinteŋ.

¹⁵² Saŋ la bwaa he waa la do le n hwela, a lole saŋ bɛlbwa dɛɛ la.

Chae wesoŋa

¹⁵³ Nyiŋi wahala maa dɛ na, ásɛ dɛ lɛɛ mɛ, dɛkalkɛ n ta he Mmara la vɛɛh.

¹⁵⁴ Bol n waa tɛ mɛ, dɛ́ lɛɛ mɛ. Kpɔ nɔn tɔ n nɛ, ɡɛ haa baɡ mɛ nyoa la.

¹⁵⁵ Haa nɛnchɔɡa lɛɛ ba, dɛkalkɛŋɔ baa he Mmarare la kpɔe dɛɛ ɛ waane.

¹⁵⁶ Kɛ hen Korowii, he tedoma haa dɔa kan, sune n nɛ, dɛ́ lɛɛ mɛ.

¹⁵⁷ N dɔma warɔ, ba ɛ nɛnchɔɡa dɛɛ fiɡ mɛ, kɛ n ta sie laa kpɔ he Mmarare ta.

¹⁵⁸ Maa nɛra baa wola hen yarada la nyin, dɛkalkɛ baa he Mmarare ta teŋɛ.

¹⁵⁹ N Naa Korowii, na ɡɛ maa dɛ nyin he webaɡla, che he nyina aa wola jaɡa dɔe bwa ta, dɛ́ kpɔ nɔn tɔ n nɛ.

¹⁶⁰ He waa bwa ɛ kasinteŋ, he Mmarare la toɡre, dɛ do le saŋ bɛlbwa.

Korowii nyina ne o Mmarare ta teŋa kasinteŋ ne

¹⁶¹ N dɔma baa kpeɡa dɛ yoo mɛ pɛɛpɛɛ, kɛ he waa laanee mɛɛ ɔmɛ.

¹⁶² N sie lɛo mɛɛ hɛɡre he nyobaɡa la ta, kɛŋɔ nomɛl waa kpaah komɛl o yoɡ aa kpeɡa ken.

¹⁶³ N ki waa aa ɛ nyosone kwaraa, kɛ he Mmarare la te, n dɛ nyina.

¹⁶⁴ N dɛ kpɛɛre kera anuanɛ tɔpere bɛlbwa, dɛkalkɛ he waa la toɡrɔ.

¹⁶⁵ Nɛra baa dɛ nyin he Mmarare la, dɛ dɔ deŋnesɔɔhna kohona, komɛlbwa aa won ɡel ba lɔ na.

¹⁶⁶ N Naa Korowii, n dɛ kpae kɛ he ba lɛɛ mɛ. N dɛ teŋɛ he waa haa do mɛ la ta.

¹⁶⁷ N dɛ nyin he Mmarare la n bambile bwa ne, dɛɛ teŋɛ a ta.

¹⁶⁸ N dɛ teŋɛ he webaɡla, ne he Mmarare bwa ta. He te jemɛ n waa bwa maa dɛ ɛ.

Chae wesoŋa

¹⁶⁹ N Naa Korowii, no n wii maa wia dɛɛ noe nɔ, dɛ́ tɛ mɛ waa mun noe liire, ɡɛ he waa la aa dɛ baɡle la.

¹⁷⁰ No n wesoŋa, dɛ́ lɛɛ mɛ ɡɛ haa baɡ mɛ nyoa la.

¹⁷¹ Mɛɛ kpɛɛre saŋ bɛlbwaa, dɛkalkɛ he dɛ baɡ mɛ he Mmarare.

¹⁷² Mɛɛ ɡo he waa la yelaa, dɛkalkɛ he waa haa do mɛ a ta la toɡrɔ.

¹⁷³ Maa dɛ teŋɛ he webaɡla ta nomanta, kpɔ nɔn dɛɛ tɔ n nɛɛ saŋ bɛlbwa.

¹⁷⁴ N Naa Korowii, n sie dawɛ he nɛɛ kɛ he lɛɛ mɛ, he Mmarare laanee dɛɛ tɛ mɛ silɛɛ.

¹⁷⁵ Gel n dɔ mkpa, ásɛ dɛ won kpɛɛre, ɡel he Mmarare la cha mɛ.

¹⁷⁶ Men maa ɛ he bonɔɔ do kɛŋɔ pee waa nyoɡra ken. Ba ɡaaɡe n bɔr, dɛkalkɛŋɔ n ta he Mmarare la vɛɛh.