Yela 118 - mzwDBL

Korowii jaama wesoŋa

¹ Hé kpɔ jam tɛ Korowii, dɛkalkɛ o waa wer. O nyina waa dɛ nyin yaa lole saŋ bɛlbwa dɛɛ la.

² Israel tena, hé ŋɔ, “O nyina waa dɛ nyin yaa lole saŋ bɛlbwa dɛɛ la.”

³ Arɔn naanar, hé ŋɔ, “O nyina waa dɛ nyin yaa lole saŋ bɛlbwa dɛɛ la.”

⁴ He banɔ la bwa haa dɛ tomɛ Korowii, hé ŋɔ, “O nyina waa dɛ nyin yaa lole saŋ bɛlbwa dɛɛ la.”

⁵ Maa lɔ weweele ta la, n wio no Korowii, asɛ o chaŋ mɛ dɛ lɛɛ mɛ.

⁶ Korowii ja n nɛ, maa ɔmɛ. Ɛrɛɛ nɛwɛnyini ɛɛ ba wona ɛɛ mɛ nɔ?

⁷ Korowii ja n nɛɛ dɛɛ cha mɛ, anomanta, mɛɛ won pɔ n dɔma nɛ.

⁸ A wer kohona kɛ nɛn kpɔ o te do Korowii lɔɡa, ɡwaa kɛŋɔ waa kpɔ o te dawɛ nɛwɛnyini nɛ.

⁹ A wer kohona kɛ nɛn kpɔ o te do Korowii lɔɡa, ɡwaa kɛŋɔ waa kpɔ o te dawɛ harɛ nɔ ta nomonjena nɛ.

¹⁰ Harɛre nɛra baa wola Korowii tomɛ bwa bar mɛ cheme, kɛ Korowii cheɡɛ n habɔɔ dɛ ɡel n pɔ ba nɛ.

¹¹ Ba bar mɛ cheme, kɛ Korowii cheɡɛ n habɔɔ, dɛ ɡel n pɔ ba nɛ.

¹² Ba warɔ bar mɛ cheme, kɛŋɔ toohna ken, kɛ ba serewɔ wɔrɔbe nɛ, kɛŋɔ nii aa le sɔɔhne baah ken, asɛ Korowii che n habɔɔ, dɛ ɡel n pɔ ba nɛ.

¹³ Ba baa yoo mɛ, a ka tama ba fee pɔ n nɛ, kɛ Korowii cha mɛ.

¹⁴ N bokpeɡa maa dɔa ne n kpeɡri bwa le Korowii be, onee nɛn waa dɛ lɛɛ mɛ.

¹⁵ Hé no nɛra ba wa aa toɡra silɛɛ moola aa dɛ le ba tɛnte deene bini, pɔe baa pɔ ba dɔma nɛɛ la wa. Ba ŋɔ, “Korowii kpeɡri, o won wekpeɡa kohona ɛɛ.

¹⁶ O kpeɡri ɡelɔ ya pɔ ya dɔma nɛ, o won wekpeɡa kohona ɛɛ.”

¹⁷ Maa sewa ba, mɛɛ so lee dɛ́ baɡle waa Korowii aa ɛa.

¹⁸ Korowii tɛr n deŋne kohona, kɛ o ta ɡelɛ n sewɛ.

¹⁹ Hé pili Korowii Dea doonyoo tɛ mɛ, bela nɛra ba wa aa toɡra aa cheɡa dɛɛ jo la, ásɛ n jo kpɔ jam ka tɛ Korowii.

²⁰ Korowii Dea doonyoa laanee la, o taa nɛra ba wa aa toɡra che dɛɛ jo.

²¹ N Naa Korowii, mɛɛ kpɔ jamee tɛɛ, dɛkalkɛ he no n be dɛ lɛɛ mɛ.

²² Bwe la mamaala aa vɛoh dɛ liiru konsala laanee bera ba lawɛ dea la kpoŋe la.

²³ Korowiirii ɡela a ɛ ɡɛ, asɛ a ɛ yaa nyokpowa.

²⁴ Finii ɛ tɔpere yaa kpɔa dɛɛ lii awola Korowii aa pɔ o dɔma nɛ. Hé ɡel ya sie lɛ, yaa hɛɡre a wa.

²⁵ N Naa Korowii, ba lɛ yaa, ɡel ya wobɛlbwa chiɡ yaa kɛrɛdɛ.

²⁶ Korowii swee naate waa valɛ o sɔn ta dɛɛ ba nɔ andɛɛɡa. Ya cheɡɛ Korowii Dea dɛɛ sweere andɛɛɡa.

²⁷ Korowii beŋkpoŋ ɡboo lole, on sune ya nɛɛ dɛ lɛ yaa. Hé pa he tɔpejen dii la mun, dɛ́ kpoŋe bambie daa, dɛ́ ka valɛ bar kwaa aa do kɛ nyeɡlare, dɛ do Korowii saraha on la bɔr la.

²⁸ Henee Korowii maa dɛ tomɛ, n kpɔ jam dɛɛ tɛɛ, mɛɛ bol he kan haa doa waa.

²⁹ Hé kpɔ jam tɛ Korowii, dɛkalkɛ o waa wer. O nyina waa dɛ nyin yaa lole saŋ bɛlbwa dɛɛ la.