Yela 116 - mzwDBL

Nomɛl Korowii aa lɛo le seo nyoa Korowii kpɛɛra

¹ N dɛ nyin Korowii wa, dɛkalkɛ o no n be, o no n wii dɛ sune n nɛ.

² N wio noo waa, o cheɡ deŋne dɛɛ no n be saŋ bɛlbwa.

³ Seo vɔɡ mɛ bil, lalbɔɔ weweele bɔle n nɛ n liire chɔɡ, ɔmee su n bwa.

⁴ Belaa n yerɛ Korowii ŋɔ, “N Naa Korowii, lɛɛ mɛ!”

⁵ Korowii waa toɡrɔ wɛɛ sune nɛn nɛ. Korowii yaa dɛ tomɔ dɔ tedoma.

⁶ Nɛra baa wola won cha ba te la, Korowii kpɔ nɔn dɛɛ tɔ ba nɛ. Gɛ saŋ maa lɔ sibeɡra ta la, o lɛɛ mɛ.

⁷ Anomanta, n liiro ŋɔ, N wee, ɡel he baah sɔɔh name, nyiŋa Korowii aa nyiŋi n nɛɛ la wa.

⁸ N Naa Korowii, he lee mɛ seo nyoa, dɛ fee n siniire, he ta ɡelɛ n lɔ na,

⁹ dɛ ɡel n won dɛɛ valɛ he sie weera harɛ nɔ ta.

¹⁰ N yaradae, hale n ŋɔ, “Weweele ta ɡelɛ n bwara ɛɛ sɔɔh mɛ.”

¹¹ N liire aa chɔɡa la, n ŋɔ, “Nomɛlbwa waa ta kasinteŋ dɔe!”

¹² Bɔkwaa mɛɛ ba wona kpɔ chiɡ hen Korowii wedɛɛɡa haa ɛa tɛ mɛ nɔ naa ta nɔ?

¹³ Mɛɛ ɛ sen sarahaa tɛɛ, dɛ jaame, lɛɛ haa lɛɛ mɛ la wa.

¹⁴ He nɛra warɔ dɛ cheme aa, belaa mɛɛ ba n nyobaɡa maa baɡɛ la chuɡra.

¹⁵ Korowii nɛra ba wa aa toɡra o be la waa hiaoh, ba seo ɡelɔ o loo ɛɛ ku.

¹⁶ N Naa Korowii, n ɛ he bonɔɔ kpela, n tomɛ ɡɛ n nya aa tomɛ. He lɛɛ mɛ le seo nyoa.

¹⁷ Mɛɛ kpo kwaa ɛ jam sarahaa tɛɛ, dɛ́ kpɔ n wesoŋa bil he sie.

¹⁸ He nɛra warɔ dɛ cheme aa, belaa mɛɛ ba n nyobaɡa maa baɡɛ la chuɡra,

¹⁹ he Dea waa lɔ Jerusalam la bini. Hé kpɛɛ Korowii!