Yela 115 - mzwDBL

Korowii o ɡbo wa aa dɔ kasinteŋ

¹ N Naa Korowii, he nyina aa wola jaɡa dɔe, ne he kasinteŋ nomanta, he ɡbosoroo chɛ kɛ yá kpɔ jirima tɛ, ya te laa.

² Ɛrɛɛ harɛre nɛra ɛɛ bɔɔ yaa ŋɔ, “Leperaa Korowii haa dɛ tomɔ la dɔɔ nɔɔ?”

³ Korowii yaa dɛ tomɔ la lɔ nyundua, waa aa too o tea laanee wɛɛ ɛ.

⁴ Suuɡapoŋa ne suuɡaswɛm nee ba ɛ ba voɡare, nɛwɛnyinii kpɔ nɔɔra ɛa.

⁵ A dɔ nyoo, aa won bol wa, dɛ dɔ sibie, aa na.

⁶ A dɔ deŋna, aa waa no, dɛ dɔ mee, aa sɔɔh no.

⁷ A dɔ nɔɔra, aa won kpɔ ɛ wobɛlbwa, dɛ dɔ nakpale, aa won valɛ, aa won do ɡbɔɡa bɛlbwa ɡe.

⁸ Nɛra baa kwaara ne nɛra baa kpɔ ba te dawɛ a nɛɛ bwa ɛɛ ɛ beŋkpoŋii.

⁹ Israel tena, hé kpɔ he te dawɛ Korowii nɛ, onee dɛɛ cha heya, dɛɛ tɔ heyaa ɡbemɡbe.

¹⁰ Korowii sɔfore, hé kpɔ he te dawɛ Korowii nɛ, onee dɛɛ cha heya, dɛɛ tɔ heyaa ɡbemɡbe.

¹¹ Nɛra haa dɛ tomɛ Korowii, hé kpɔ he te dawɛ o nɛ, onee dɛɛ cha heya, dɛɛ tɔ heyaa ɡbemɡbe.

¹² Korowii ɛɛ lii ya waa, dɛ swee yaa andɛɛɡa. Wɛɛ swee andɛɛɡaa tɛ Israel tena ne o sɔfore bwa.

¹³ Wɛɛ swee andɛɛɡaa tɛ nɛra baa dɛ tomɔ, nɛnjena ne nɛmpɛɛne bwa.

¹⁴ Korowii ɡel hé ya, he ne he bii bwa.

¹⁵ Korowii waa ta nyundua ne harɛ la, swee heya andɛɛɡa.

¹⁶ Korowii kpɔ nyundua ɛ o dobɔr, dɛ kpɔ harɛ nɔ tɛ ya nɛwɛnyina.

¹⁷ Nɛn sewaa, waa won kpɛɛ Korowii, nomɛlbwa aa won kpɛɛro lalabwɛɛ kpa.

¹⁸ Kɛ yan ya taa soɡe le nɔ te, yaa kpɛɛroo le fini ne saŋ bɛlbwa dɛɛ la. Hé kpɛɛ Korowii!