Yela 111 - mzwDBL

Korowii kpɛɛra yel

¹ Hé kpɛɛ Korowii! Mɛɛ jam Korowii n bambile bwa nee, o nɛnlaa baa chema bini.

² Waa Korowii aa dɛ ɛ dɔ nyokpoa, nɛra ba sie aa dɛ lɛ a ta kpɔa do ba liire ta dɛɛ lii saŋ bɛlbwa.

³ Jirima ne nyanyini lɔ waa waa dɛ ɛ ta. O waa toɡrɔ saŋ bɛlbwa dɛɛ la.

⁴ O ɡelɔ yaa lii nyokpowaa waa ɛa, Korowii dɔ tedoma tɛ yaa dɛɛ na ya sum.

⁵ O dɛ tɛ banɔ la baa dɛ tomɔ kondikwa, waa o fɔo o ne baa fɔwa la waa soh saŋ bɛlbwa bwa.

⁶ O ɡelɔ o nɛra na o kpeɡri waa kpɔa dɛɛ ɛ toma, dɛ lɛ harɛre nɛra bane harɛre tɛɛ ba.

⁷ O waa waa dɛ ɛ bwa dɔ kasinteŋ dɛ toɡre. Waa waa dɛ do nɛra a ta bwa wer, baa hwɛɡɛ a ta.

⁸ A lole saŋ bɛlbwa dɛɛ la, Korowii cheɡɛ toɡra o wa aa toɡra ne kasinteŋ ta, dɛ kpɔ tɛ o nɛra.

⁹ O berɔ kwaa lɛ o nɛra, dɛ ɡel ba di ba nyu. O ne ba fɔwɛ fɔo waa do le saŋ bɛlbwa dɛɛ la. O sɔn do ɡoroŋ dɛ do ɔma kohona.

¹⁰ Korowii ɔmaa dɛɛ ba ɡela he dɔ wejema. Nɛra baa dɛ teŋɛ o waa ta la, o ɡelɔ baa no waa mun kohona. Onee chɛ kpɛɛra saŋ bɛlbwa dɛɛ la.