Yela 109 - mzwDBL

Nɛn waa lɔ wenaale ta wobol

Kooro Devid yel

¹ N Naa Korowii maa dɛ kpɛɛre, ir nyu ne, bɛ nyoa tɔ,

² dɛkalkɛ nyubinikpeɡ tena ne nyosonteŋna dɛ yoo mɛ, ba teŋe nyosone bol waa dɛɛ yaɡ mɛ.

³ Haeh wobol ɡboo ba bol dɛɛ yaɡ mɛ, dɛɛ yoo mɛ pɛɛpɛɛ.

⁴ Ba kpɔ haeh chiɡ darame naa ta, kɛ n te, hen Korowiirii n soŋe dɛɛ tɛɛ ba.

⁵ Ba kpɔ wechɔɡa dɛɛ bɔ mɛ wedɛɛɡa kem, dɛ kpɔ haeh bɔ mɛ nyina kem.

⁶ N Naa Korowii, le nɛnchɔɡe waa bol n dɔm waa dɛ́ pao bole, ɡel o dɔm ɡbaɡba che o nɛ.

⁷ Gel ba bol o waa ó di bolchɔɡe, ɡel o wesoŋa kwaraa berɛ wechɔɡa tɛo.

⁸ Gel o tɔpera waa di do boraa ken, ásɛ nɛnfale di nomonome waa dɛ di la.

⁹ Gel o bii berɛ bilalbii, ásɛ o haah ɛ luhaah.

¹⁰ Gel o bii ɡaaɡe dɛɛ soŋe kwa, ɡel ba doŋ ba le dimɡbeeni baa lɔ a ta la ta.

¹¹ Gel nɛra waa di ba kema pa o kondɔɔh bwa kaa, dɛ́ ɡel hɔɔhra pa komɛlbwa waa koah dɛ dɔ.

¹² Bɛ ɡel nomɛlbwa ɛɛ sune o nɛ, dɛ́ ɛo wedɛɛɡa kɛɛ dɛ́ na o bilalbii la sum.

¹³ Gel o naanar bwa serewe, dɛ́ ɡel o sɔn nyoɡre naanar baa ka ba bwa bini.

¹⁴ N Naa Korowii, lii o naawa wechɔɡa o sie. Bɛ o nya wechɔɡa kpɔ kɛo bwa.

¹⁵ N Naa Korowiirii dɛ́ lii ba wechɔɡa saŋ bɛlbwa, dɛ́ ɡel nomɛlbwa bɛ ba waa lii harɛ nɔ ta kpa.

¹⁶ Dɛkalkɛ dɛ waa wedɛɛɡa lii, dɛ o dɛ kpoo dɛɛ do nyaara ne nɛŋɡwɛɡra, dɛ banɔ la ba bambile aa chɔɡa hɔhɔrɔwa.

¹⁷ N dɔm la dɛ nyin nɛra taahna, ɡel o taahna ɡure o nyu ta. O hah sweera dɛ tɛ o dɔŋ, bɛ ɡel nomɛlbwa swee tɛ o ɡe.

¹⁸ O kpɔ nɛra taahna berɛ batakaare dɛɛ do. Gel o nɛra taahna sɔɔ kɛŋɔ ne, dɛ́ jooɡe o hoɡa bini kɛŋɔ no.

¹⁹ Gel a do kɛŋɔ baa kpɔ batakaare fɔrɔwo, kɛŋɔ baa kpɔ kiriso vɔwɔ saŋ bɛlbwa ken!

²⁰ N Naa Korowii, tɛr n dɔm deŋne n wa, tɛr nɛra baa dɛ bol n bwara wechɔɡa la deŋne.

²¹ Kɛ hen, Nemenɛ Korowii, che he sɔn ta dɛ́ cha mɛ. Lɛɛ mɛ he wer ne he nyina haa dɔa la wa,

²² dɛkalkɛ n ɛ nyaa dɛ ɛ nɛŋɡwɛɡre, asɛ n bambile bwa ɛɛ wee mɛ.

²³ N dɛ ba nyoɡra kɛŋɔ bɔr aa joa dɛɛ bir ken. N do kɛŋɔ hɔɔhre peu aa kpɔ mɛ ka ta.

²⁴ Nyoa vɔwa ɡelɔ n natuune ɛɛ sa, n ɡwaŋɛ ka hoɡa.

²⁵ Ba na mɛ naa, ba dɛ muɡli n baah, dɛɛ viiɡi ba nyuune.

²⁶ N Naa Korowii maa dɛ tomɛ, cha mɛ, koh he nyina aa wola jaɡa dɔe bwa la waa dɛ́ lɛɛ mɛ.

²⁷ N Naa Korowii, ɡel n dɔma jemɛ kɛŋɔ henee lɛɛ mɛ.

²⁸ Baa taah mɛɛ, kɛ hɛɛ swee mɛ andɛɛɡaa. Ba dɛ yoo mɛ naa, hɛɛ ɡeloo sihiih kpo ba, ásɛ men maa ɛ he bonɔɔ nɔ sie lɛ.

²⁹ Gel sihiih kpo n dɔma kohona, dɛ́ bɔle ba nɛɛ kɛŋɔ batakaarejaŋ ken.

³⁰ Mɛɛ jam Korowii kohonaa, dɛ́ kpɛɛro nɛnlaa bini,

³¹ dɛkalkɛ o dɛ che nyaara habɔɔ, dɛ lɛɛ ba dɛɛ le nɛra baa kpoo ba nɔn ta.