Yela 108 - mzwDBL

Chae wesoŋa dɛ́ yo dɔma

Kooro Devid yel

¹ N Naa Korowii, he nɛɛ mɛɛ hwɛɡɛ kohona, mɛɛ ɡo yelaa kpɛɛre n bambile bwa ne.

² Mɛɛ iruu che, dɛ́ kpɔ janjela ne kwaa bwa soo siwi lɔ yela! Mɛɛ feluu ir mɔɔ bɔr chaah.

³ N Naa Korowii, mɛɛ jaamee harɛre nɛra bwa binii, mɛɛ ɡo yelaa kpɛɛre nɛnlaa baahnee.

⁴ He nyina aa wola jaɡa dɔe kan dɛɛ tel nyundua, he wa aa dɔ kasinteŋ ɡe ɛɛ tel bela.

⁵ N Naa Korowii, ɡel ya na he kan haa doa nyundua, ásɛ he jirima tɔ harɛ nɔ ta bwa.

⁶ Lɛ yaa he kpeɡri ne dɛ́ no ya wesoŋa, ɡɛ aa ɛ he lɛ nɛra haa dɛ nyin ba la.

⁷ Korowii bol waa o Dea bela waa do ɡoroŋ la dɛ ŋɔ, “Mɛɛ yo bwɛjen Sɛkem tenaa dɛ́ pɔ ba nɛ, dɛ́ bɔne o ne Sukot Fɛlembɔjen bini tɛ n nɛra.

⁸ Gelead harɛ ne Manasɛ dea harɛ bwa ɛ n kwa, Efrem harɛ do kɛŋɔ n laa ɡbɛrɛ, asɛ Juda harɛ ɡe do kɛŋɔ n koodaŋɡbala.

⁹ Moab harɛ nɛra ɛ n bonɔɔna, ba do kɛ loɡ maa dɛ loo kwaa o bini ken, mɛɛ kpɔ n naŋɡawaa ta Edom harɛ ta. N dɛ moo, dɛkalkɛ n pɔ Filisti tena nɛ.”

¹⁰ N Naa Korowii, umee dɛ́ kpɔ mɛ jo bwɛjen baa ma danjwɛkpeɡ baro nɔ ta nɔ? Umee dɛ́ tɔ n sie kaa Edom ɔ?

¹¹ He deno berɛ habɔɔ kpo yaa kɛɛ? Haa ya laa tena sie tɔ ka yo ya dɔma kpa aa?

¹² Cha yaa ya won pɔ ya dɔma nɛ, nɛwɛnyini chae ɡɛ bɛlbwa naa, a bwa dɛ ɛ pɛɛpɛɛ.

¹³ Korowii ja ya nɛ aa, yaa yoo, dɛ́ pɔ ya dɔma nɛ. Wɛɛ tiɡri ya dɔmaa do harɛ.