Yela 107 - mzwDBL

Yela tɔn nuete (Yela 107—150) Korowii wer waa doa kpɛɛra

¹ Hé kpɔ jam tɛ Korowii, dɛkalkɛ o waa wer, o nyina waa dɛ nyin yaa lole saŋ bɛlbwa dɛɛ la.

² He nɛra Korowii aa lɛ heyaa la, hé bol o kpɛɛra waa baɡle nɛra, dɛkalkɛ o lɛ heyaa le he dɔma nɔn ta,

³ dɛ lawɛ heyaa le harɛfala ta ba le wee leebɔr, dɛ́ ba kaa wee cholibɔr ne weekaŋle nyundua, dɛ́ ba kaa weekaŋle harɛbɔr.

⁴ Bane nyoɡre pua hɛŋle ɡbo harɛ ta bela, ba ta bwɛɛ bɛlbwa nae dɛ́ ka so o ta.

⁵ Lɔr ne nyɔɡre kpo ba, asɛ ba hwɛɡa bwa tonɛ.

⁶ Asɛ ba wahala nae bini la, ba wi no Korowii, asɛ o lɛɛ ba le suna baa dɛ di ta.

⁷ O tɔ ba sie dɛ kpɔ ba pa sie kaa bwɛjen baa ka so o ta.

⁸ A chɛ kɛ bá kpɔ jam tɛ Korowii, o nyina aa wola jaɡa dɔe, ne nyokpowaa waa ɛa tɛɛ ba la wa,

⁹ dɛkalkɛ o tɛ nɛra nyɔɡre aa dɛ kpo ba nee ba nyɔ, dɛ tɛ banɔ la lɔr aa dɛ kpo ba ɡe kondikondɛɛɡa ba di.

¹⁰ Dɛ ba bini bane soɡe biro tenten ta, ba do ba jɔɡrɔre dɛ laɡ ba do dea, ba bwara ɛɛ nyɛɡ,

¹¹ dɛkalkɛ ba ɛ Nemenɛ Korowii deŋnekpeɡ, dɛ vɛh waa waa baɡ ba ta teŋa.

¹² Anomanta, o do ba dɛ ɡel ba ɛ tomkpeɡa dɛ ba koh, ba ta nomɛlbwa dɔe o lɛɛ ba.

¹³ Asɛ ba wahala nae bini la, ba wi no Korowii, asɛ o lɛɛ ba le suna baa dɛ di ta.

¹⁴ O laɡ ba le biro tenten ta dɛ chaa jɔɡrɔre baa kpɔa do ba.

¹⁵ A chɛ kɛ bá kpɔ jam tɛ Korowii, o nyina aa wola jaɡa dɔe, ne o nyokpowaa waa ɛa tɛɛ ba la wa,

¹⁶ dɛkalkɛ o kuuɡi ayaawa ɡbeni, dɛ teŋni bune baa kpɔa kaɡra.

¹⁷ Deŋnekpeɡ we-ɛɛla ɡelɔ ba bini bane ɡɛn, ba wechɔɡa ɡel ba bwara ɛɛ nyɛɡ,

¹⁸ dɛ baa kondikwa kwaraa nyin dɛ na, dɛ so dɛɛ kpa seo.

¹⁹ Asɛ ba wahala nae bini la, ba wi no Korowii, asɛ o lɛɛ ba le suna baa dɛ di ta.

²⁰ O nyoa wobol chaah ba, dɛ lɛɛ ba le seo ta.

²¹ A chɛ kɛ bá kpɔ jam tɛ Korowii, o nyina aa wola jaɡa dɔe, ne o nyokpowaa waa ɛa tɛɛ ba la wa.

²² A chɛ kɛ bá kpo kwaa ba ɛ sarahare dɛ́ jam Korowii, dɛ́ kpɔ silɛɛ ɡo yela baɡle waa waa ɛa.

²³ Bane kpɔ stiimaere dɛɛ kpɔ mpo sie, dɛ kaa nyin ba nyoa kondikwa.

²⁴ Ba na waa Korowii aa ɛa, nyokpowaa waa ɛa mpore ta.

²⁵ O nyoa wobol ɡelɔ peukpeɡ ta, asɛ dɛ ir mpo nehɛma kohona.

²⁶ Nehɛma la ɡɔɔ stiimaere la kaa nyundua a ba le vil bini, dɛ ɡel nɛra baa lɔ a bini bambile teŋe.

²⁷ Ba valɔ dɛɛ yɛɛɡe kɛŋɔ sennyɔdɛɛra ken, ba ta hwɛɡa bɛlbwa dɔe.

²⁸ Asɛ ba wahala nae bini la, ba wi no Korowii, asɛ o lɛɛ ba le suna baa dɛ di ta.

²⁹ O ɡelɔ peukpeɡ la nyoa sɔɔh, asɛ nehɛma la ɡel lɔe.

³⁰ Nehɛma la nyoa aa sɔɔhna la, ba sie lɛo, asɛ o tɔ ba sie ba bela baa dɛ nyin ba chuɡe.

³¹ A chɛ kɛ bá kpɔ jam tɛ Korowii, o nyina aa wola jaɡa dɔe, ne o nyokpowaa waa ɛa tɛɛ ba la wa.

³² A chɛ kɛ bá bol ɡɛ o sɔn aa kana nɛnlaa baah, dɛ́ kpɛɛro bela ba nomonjena aa chema o Dea.

³³ O ɡelɔ nenabɔɔne hweeh pua hɛŋle ɡbo harɛ, buli ɡe ɡel pala,

³⁴ dɛ ɡel harɛ waa wera berɛ harɛ komɛlbwa aa wola won do wer o ta, nyubinikpeɡ tena ba fa aa soɡe bela la wa.

³⁵ O ɡelɔ pua hɛŋle ɡbo harɛ berɛ taama, asɛ nee ɛɛ palɛ harɛ waa hola ta.

³⁶ O tɛ nɛra lɔr aa dɛ kpo ba ŋwɛnɛ ba ba so bela, asɛ ba ma bwɛjen dɛ so o ta.

³⁷ Ba parɛ daa kooni, asɛ a nɔnɛ kɛrɛdɛ ba chaa.

³⁸ O swee ba andɛɛɡa ba dɔ bii kohona, ba nae ɡe ya kohona.

³⁹ Korowii nɛra dɔma aa fiɡ ba dɛ pɔ ba nɛɛ nomanta, a ɡelɔ ba nyoa sɔɔh baa di suna.

⁴⁰ Korowii siwi ta ba nɛra baa dɛ fiɡ ba la sui, a ɡel ba do pua hɛŋle ɡbo harɛ ta, bela ŋwɛnɛre aa wola toole dɛɛ ɡaaɡe.

⁴¹ Kɛ o lawɛ nɛŋɡwɛɡra le ba wenaale ta, dɛ ɡel ba bii warɛ kɛŋɔ peera ken.

⁴² Nɛra ba wa aa toɡra nao ba sie lɛ, kɛ nyubinikpeɡ tena te, ba helɔ.

⁴³ Nɛra baa jemɛ waa la, bá kpɔ ɡɛ waa nɔ do ba liire bini, dɛ́ lii Korowii nyina aa wola jaɡa dɔe la wa.