Yela 106 - mzwDBL

Korowii wer waa doa tɛ o nɛra

¹ Hé kpɛɛ Korowii! Hé kpɔ jam tɛ Korowii dɛkalkɛ o wer, o nyina waa dɛ nyin yaa ta jaɡa dɔe.

² Umee dɛ́ won baɡle wejena waa ɛa kɛɛ dɛ kpɛɛro kɛrɛdɛ nɔ?

³ Nɛra baa dɛ teŋɛ o Mmarare ta, ba waa toɡre saŋ bɛlbwa la, ba na som.

⁴ N Naa Korowii, he dɛ ba he nɛra chae yaa, lii n wa, he dɛ ba ba lɛɛ yaa, he cha n ɡe,

⁵ ásɛ n dɔ wedɛɛɡa he nɛra aa dɛ ba dɔe la ane, n ne ba bwa dɔ silɛɛ, ásɛ n ne he nɛra haa lee ba cheɡ la hɛɡre kohona.

⁶ Ya ɛ wechɔɡa kɛ ya naawa ken, ya ɛ nyubinikpeɡ dɛ koni.

⁷ Ya naawa fa ta hen Korowii nyokpowe-ɛɛla waa mun noɛ, ɡɛ saŋ baa lɔ Ijipt harɛ ta la. Ba soh nyina haa nyin ba la keraŋwɛnɛ bwa, dɛ ɛɛ deŋnekpeɡ Mposwɛm la ta.

⁸ Kɛ he lɛɛ ba ɡɛ haa baɡ ba nyoa la, dɛ baɡle ɡɛ haa dɔ kpeɡri kohona.

⁹ He kɔr Mposwɛm asɛ o hweeh, asɛ he tɔ he nɛra sie ba valɛ harɛpɛɛ ta kɛŋɔ, pua hɛŋle ɡbo harɛ ta ken dɛ ɛɡɛ le o baŋ.

¹⁰ He lɛɛ ba le ba dɔma nɔn ta, nɛra baa hah ba la nɔn ta,

¹¹ dɛ ɡel nee bɔle ba dɔma bwa nɛ, beŋkpoŋ kwaraa ta kae.

¹² Belaa he nɛra yarada waa haa baɡ ba nyoa la, dɛ ɡo yela kpɛɛre.

¹³ Kɛ ba soh waa haa ɛa tɛɛ ba buɡ la ta, ba ta bwara sɔɔhnɛ, dɛ no waa haa bol ba be.

¹⁴ Ba pɛla lawɛ kondikwa, asɛ dɛ daah hen Korowii na, pua hɛŋle ɡbo harɛ ta bela.

¹⁵ Anomanta, he tɛɛ ba kwaa baa soŋe la, dɛ berɛ kpɔ weechɔɡa ta ba nɛ.

¹⁶ Ba sie beɡre Mosis ne he bonɔɔ Arɔn haa lee ba cheɡ, ba do ɡoroŋ tɛɛ la nɛɛ pua hɛŋle ɡbo harɛ ta bela.

¹⁷ Belaa harɛ pere asɛ Datan le o bini, dɛ tɔ Abiram ne o haah ne bii nɛ.

¹⁸ Korowii ɡelɔ nii le nyundua, dɛ ba le nɛra baa teŋɛ ba nɛɛ la nɛ, dɛ fuh nyubinikpeɡ tena baa lɔ ba bini.

¹⁹ Ba kpɔ suuɡaswɛm ɛ nabale Sinai Bwejen ta, dɛɛ tomɔ kɛ voɡ ken.

²⁰ Ba kpɔ jirima baa kpɔ tɛ hen Korowii la, berɛ kaa tɛ kon o mar aa le nabale, waa dɛ chwe kpɔɡa.

²¹ Ba soh hen Korowii, haa cheɡɛ nyokpowe-ɛɛla ta, dɛ lɛɛ ba le Ijipt harɛ ta la wa.

²² Nyokpowaa haa ɛa Mposwɛm ta, ne ɔmewaa haa ɛa bela kan kohona.

²³ He baah diu dɛ fee ŋɔ hɛɛ chɔɡ baa, kɛ Mosis waa ɛ he bonɔɔ, he leo tɛ he te la soŋe, dɛ sɔɔh he bandia nyoa, he ta ban chɔɡɛ kpa.

²⁴ A habɔɔ, ba vɛoh kɛ baa jo harɛpare ondɛɛɡe la taa, dɛkalkɛŋɔ ba ta he waa haa baɡ ba nyoa la yaradae.

²⁵ Ba soɡe ba tɛnte deene bini dɛɛ naɡre wa, ba ta he waa la ta teŋɛ.

²⁶ Anomanta, he ŋwɛɛrɔ baɡ ba ŋɔ, hɛɛ ɡeloo bá serewe pua hɛŋle ɡbo harɛ ta,

²⁷ dɛ́ lɔ ba naanar peɡre nɛra baa wola hen Korowii tomɛ bini, ásɛ ba serewe harɛfala ta.

²⁸ Baa tel Peɔ la, ba kpɔ ba te ka do voɡ Baal lɔɡa dɛɛ tomɔ, dɛɛ di saraha kwaa baa ɛa tɛ voɡa aa wola mkpa dɔe.

²⁹ Ba we-ɛɛla ɡelɔ hen Korowii baah di, asɛ he ɡel weechɔɡa ba le ba nɛ.

³⁰ Kɛ Fenehas iro, dɛ tɛr nɛra baa di a bolchɔɡe la deŋne, asɛ hen Korowii ɡel weechɔɡa la nyoa sɔɔh.

³¹ Nɛra lii waa waa ɛa la kɛŋɔ waa aa toɡra, a chɔ le baa liira saŋ bɛlbwa dɛɛ la.

³² Ba ɡelɔ hen Korowii baah di ba nɛɛ bule waa lɔ Mɛreba la ta, a kpɔ sibeɡra ta Mosis nɛ.

³³ Ba ɛ hen Korowii Doma deŋnekpeɡ, anomanta, Mosis piɡro bol waa o fe aa wola liire tɛɛ ba.

³⁴ Ba ta nɛra baa wola hen tomɛ kpoorɛ ɡɛ haa do ba la,

³⁵ kɛ ba sɛoh ba bii ɛɛ kpɔ dɔŋa, a che a ta, ba kpɔ ba voɡa toma da la.

³⁶ He nɛra tomɛ ba voɡa la, asɛ a ɛ bela dɛ laɡ ba.

³⁷ Ba kpoo ba bibaala ne bihaahna ɛ sarahare tɛ Keenan voɡa.

³⁸ Ba kpoo bii baa wola wechɔɡa bɛlbwa ɛɛ pɛɛpɛɛ, dɛ ɛ sarahare tɛ voɡa aa lɔ Keenan, asɛ ba chal kpɔ doŋa kah harɛ la.

³⁹ A cheɡɛ ba we-ɛɛla ta, ba kpɔ doŋa kah ba te, ba waa ta kasinteŋ dɔe tɛ hen Korowii.

⁴⁰ Anomanta, he baah di he nɛra nɛɛ kohona, asɛ he ki ba we-ɛɛla.

⁴¹ He vɛɛh ba tɛ nɛra baa wola hen Korowii tomɛ la, asɛ ba do ba lɔɡa dɛɛ tom ba.

⁴² Ba dɔma fiɡ ba dɛ ɡel ba do ba lɔɡa.

⁴³ Keraŋwɛnɛ bwaa he lɛ he nɛra, kɛ dɛ ba sie ta lɔ lwɛmkpeɡ we-ɛɛla ta, a kaa ba ne wechɔɡa kohona ta.

⁴⁴ Kɛ baa lɔ wenaale ta la, he chaŋ ba dɛ no ba suna baa dɛ di.

⁴⁵ He koh ba waa dɛ lii fɔo he ne baa fɔwa la, dɛ che he nyina waa kana la ta, dɛ charɛ he liire.

⁴⁶ He ɡelɔ nɛra baa dɛ fiɡ ba la bwa berɛ na ba sum.

⁴⁷ N Naa Korowii yaa dɛ tomɛ, lɛ yaa dɛ́ berɛ lawɛ yaa le harɛre ta ba, ásɛ ya kpɔ jam tɛɛ dɛ́ kpɛɛ he sɔn waa do ɡoroŋ la.

⁴⁸ Hé kpɛɛ Korowii Israel tena aa dɛ tomɔ, hé kpɛɛro saŋ bɛlbwa dɛɛ la. Gel nɛra bwa ŋɔ, “Aamen.” Hé kpɛɛ Korowii!