Yela 105 - mzwDBL

Korowii ne o nɛra

¹ Hé jam Korowii dɛ́ yerɛ o sɔn, hé ɡel harɛre nɛra bwa jemɛ waa waa ɛa.

² Hé ɡo yela kpɛɛro, dɛ́ bol o nyokpowe-ɛɛla wa.

³ Hé ɡel he sie lɛ o sɔn waa do ɡoroŋ la ta, nɛra haa dɛ tomɔ, hé ɡel he sie lɛ.

⁴ Hɛ́ɛ soŋe Korowii dɛ́ na o kpeɡri, dɛ́ɛ tomɔ saŋ bɛlbwa.

⁵ Hé lii o nyokpowaa waa ɛa, o wejena ne o waa aa dɔ kasinteŋ la wa,

⁶ he Abraham naanar, haa ɛ Jekɔb bibaala waa le heyaa tɛ o te la.

⁷ Onee Korowii yaa dɛ tomɛ, o bol harɛ nɔ ta nɛra waa dɛɛ pa bole.

⁸ Wɛɛ lii o fɔo la waa saŋ bɛlbwaa, o nyoa waa baɡɛ naanar kaɡboŋa baa ka ba la bwa.

⁹ Wɛɛ teŋɛ fɔo o ne ya naa Abraham aa fɔwa, ne nyoa waa baɡɛ Aesek la taa.

¹⁰ Korowii ne Jekɔb fɔwɛ fɔo, o do le saŋ bɛlbwa dɛɛ la.

¹¹ O ŋɔ, “He ne he naanaree mɛɛ ba Keenan harɛ kpɔe tɛ, ó ɛ he kapɛrɛ kon.”

¹² Gɛ saŋ dɛ Korowii nɛra aa kanɛ, dɛ ɛ hɔɔhra do Keenan harɛ ta.

¹³ Dɛ harɛre taa ba do dɛɛ ɡaaɡe. Ba le harɛ bɛl ta naa, dɛ ba kaa bɛl ta.

¹⁴ Kɛ Korowii ta ɡelɛ nomɛlbwa fiɡ ba, ba lɛɛ nomanta, o kah koranar ŋɔ,

¹⁵ “Nomɛlbwa bɛ nɔn kpɔ leɡe n bonɔɔna maa lee ba cheɡ tɛ n te nɔ, he bɛ n keamere nɔ bini bɛlbwa ha.”

¹⁶ Korowii ɡelɔ lɔr chole harɛ la ta, kondikwaa bwa chɔɡ.

¹⁷ Kɛ dɛ o tɔ sie ɡel ba yoɡ Josef, Ijipt harɛ ta kɛ yom.

¹⁸ Ba kpɔ bune jɔɡrɔre do o nakpale ne o baŋa,

¹⁹ ka tel kɛŋɔ waa waa bola aa ɛa. Korowii waa laanee baɡla kɛŋɔ o waa la ɛ kasinteŋ.

²⁰ Belaa Ijipt kooro waa dɛ di kora harɛre nɛra nɛɛ la, ɡel ba ka leo ba tɛo.

²¹ O kpɔɔ chɔ harɛ la nyoa, wɛɛ nyiŋi o kwaa bwa ta,

²² dɛɛ di kpeɡri o nomonjena bwa nɛ, dɛɛ baɡle o nomonome baa dɛ jao la wa.

²³ Ate, Jekɔb ne o bii ir dɛ kaa Ijipt harɛ ta ka so kɛŋɔ hɔɔhra ken.

²⁴ Korowii kpɔ ba ɛ o nɛra, dɛ ɡel ba mun ya ɡwaa ba dɔma.

²⁵ O berɛ Ijipt harɛ tena liire, dɛ ɡel ba hah o nɛra, dɛ dɔ liichɔɡa tɛɛ ba.

²⁶ Belaa o tomɛ o bonɔɔna Mosis ne Arɔn waa lee ba tɛ o te la.

²⁷ Ba kaa ɛ nyokpowaa ne wekpeɡa ba bini Ijipt harɛ ta.

²⁸ O ɡelɔ biro tenten ba tɔ harɛ la bwa ta, kɛ Ijipt tena ta o waa ta teŋɛ.

²⁹ O ɡelɔ ba neerare berɛ chal a pɛŋa bwa serewe.

³⁰ Sapone baa su harɛ la ta bobɛlbwa, hale koodem ne ba chɔɔbɔra bwa.

³¹ Korowii bol wa, asɛ chwɛɛhne ne konjeɡre ba su harɛ la ta bwa,

³² dɛ ɡel dombwea ber ba bwaala, asɛ bwaala kɔɡre dɛɛ nyɛɡle.

³³ O chɔɡ ba daa kooni, dɛ kuuɡi harɛ la daa bwa.

³⁴ O bol waa asɛ tontombɛ ba su harɛ la ta bwa, baa wola won kura.

³⁵ A di harɛ la ta konlwɛɛ te bɛlbwa, hale koo kondikwaa bwa.

³⁶ O kpoo Ijipt tena bibanloɡla bwa, dem bɛlbwa bibanloɡle ta kae.

³⁷ Belaa Korowii tɔ Israel tena sie le Ijipt harɛ ta, ba cheɡɛ suuɡapoŋa ne suuɡaswɛm ba bwara do kpeɡri.

³⁸ Ijipt tena la sie lɛo kɛŋɔ Israel tena la aa dɛ kaa, dɛkalkɛ dɛ ba dɛ ɔm ba.

³⁹ Korowii ɡelɔ bam bɛl waa do jaŋne kaa nyundua tɔ Israel tena sie, dɛɛ baɡ ba ŋwɛnɛ, asɛ nii waa tɛra kaa nyundua ɡe tɔ ba sie jwaana, dɛɛ chaah ba ba vala bini.

⁴⁰ Ba bɔɔro kondikwaa baa di wa, asɛ o tɛɛ ba chayambwibwi ba chwe, dɛ le kondikwaa ne nyundua ba tɛɛ ba ba di vaɡre.

⁴¹ O ɡelɔ bwe bini pere, asɛ nee le dɛɛ palɛ kɛŋɔ, nenapale ken, pua hɛŋle ɡbo harɛ ta.

⁴² Korowii lii nyoa waa baɡɛ o bonɔɔ Abraham, o do ɡoroŋ la wa.

⁴³ Gɛɛ a do Korowii tɔ o nɛra waa lee ba tɛ o te la sie le Ijipt harɛ, asɛ ba ɡo yela dɛ do lɔŋɔre dɛɛ hɛɡre.

⁴⁴ O kpɔ nɛra bane harɛre ne ba kooni tɛɛ ba a berɛ ba kapɛrɛ kwa,

⁴⁵ ɡɛ aa ɛ ásɛ baa teŋɛ o Mmarare, ne waa waa do ba a ta la ta. Hé kpɛɛ Korowii!