Yela 104 - mzwDBL

Korowii waa ta komɛlbwa kpɛɛra yel

¹ N dɛ kpɛɛ Korowii n bambile bwa ne, Korowii maa dɛ tomɛ, he kan kohona! He kpɔ he kan ne he jirima tɔ kɛŋɔ yal ken,

² asɛ nii bare cheme, dɛ paɡri nyundua kɛŋɔ tɛnte,

³ dɛ ma he sobɔr baama baŋ nyundua. He kpɔ baama berɛ kon waa do kɛŋɔ torɔɡo, dɛ so o bini dɛɛ kaa, a do kɛŋɔ peu aa dɔ kena dɛɛ kaa he ne la ken.

⁴ He ɡelɔ he nyundua toroma do kɛŋɔ peu ne ninlao.

⁵ He kpɔ harɛ chɔŋɛ kwaa ta a lawɔ kpoŋe, o che kiŋkiŋ waa wola yiiɡi bwa.

⁶ He kpɔ mpo bɔle o ta kɛŋɔ yal ken, asɛ nee la bɔle bwejena ta.

⁷ He kɔr neerare dɛ ɡel a hweeh, he kɔra la ɡelɔ a nee la palɛ kaa warane.

⁸ A palɔ kpɔ bwejena ta dɛ kaa fɛlembɔjena ta, dɛ kaa bela haa kwaara cheɡa la.

⁹ He maɡɛ bela aa jaɡɛ tɛa, ásɛ a bɛ won su bɔle harɛ bwa ta kpa.

¹⁰ He ɡelɔ buli bule jo fɛlembɔjena bini, neerare palɛ dɛɛ kpɔ bwejena baah.

¹¹ A ɡel kpɔɡ bini ola dɔ nee dɛɛ nyɔ, kpɔɡ bini keeɡore nyɔɡre aa dɛ kpoa ɡe dɔ ane nyɔ.

¹² Jumbii sɔh a kɔne, daa aa cheɡɛ neerare la nyoo ta dɛɛ si.

¹³ He ɡelɔ bwaala le nyundua, dɛ nɛ bwea dor, asɛ harɛ bwa vaɡɛ ne.

¹⁴ He ɡelɔ kpɔɡa moɡɛ nae dɔ dɛɛ di, dɛ ɡel nɛwɛnyina dɔ koo kwaa ɡɛ aa ɛ bá dɔ kondikwaa dɛɛ di,

¹⁵ dɛ́ dɔ sen nyɔ ba sie lɛ, ne noo baa kpɔ fɔɡle ba siebɔra á do wer, dɛ kondikwa aa tɛɛ ba bokpeɡa ɡe.

¹⁶ Peleme daa aa lɔ Lɛbanɔn, Korowii aa dua la, dɔ bwaala nee kohona.

¹⁷ Jumbii sɔh kɔne a ta, hale chaŋɡale bwa so dakpeɡa la ta.

¹⁸ Kpɔɡ bini boohna soɡe bwejena dor, asɛ kukubane ɡe dɔ sɔɔhbɔra bwea baah.

¹⁹ Henee ta korobie wɛɛ baɡle saŋ, dɛ ɡel wee ɡe ɛɛ jo o saŋ ta.

²⁰ He ɡelɔ bɔr bir dɛ ɛ jwaana, asɛ kpɔɡ bini ola bwa le dɛɛ valɛ.

²¹ Nyujentena bii kpaahnɔ dɛɛ kɔɡre, dɛɛ nyin kondikwa hen Korowii aa tɛa.

²² Wee baa le aa, dɛ a bwa berɔ ka jo a bɔɔne bini chɔ,

²³ mɔɔ nɛra le kaa ɛ ba tomare ka tel jɔmɔra.

²⁴ N Naa Korowii, he cheɡɛ he wejema ta, dɛ ɛ wejena taeh, harɛ nɔ bwa su he kontaala haa taa.

²⁵ Mpo ɡe kan dɛ do paɡri chɔ, he kontaala anjeɡre ne anjena, aa wola nyoa dɔe bwa su o bini.

²⁶ Stiimaere kpɔ o sie dɛ la dɛɛ ba, asɛ mpo bini oljen Lɛvayatan, haa tao la ɛɛ hɛlɛ o bini.

²⁷ Hen Korowii nɛɛ a bwa sie dawɛ kɛŋɔ, he tɛa kondikwaa á di a saŋ ta.

²⁸ He dɔɔ dɛ tɛa aa, anee á ɡe dɔ di, he nɔn ta kondikwaa a dɔ di dɛɛ vaɡɛ.

²⁹ He laa sie kpɔ a be naa, dɛ ɔmee chole a nɛ, he lɛ hweera haa kpɔa tɛa la aa, a dɛ serewe, dɛ́ berɛ kaa teera haa kpɔa maa la ta.

³⁰ Hweeraa he hwee do a bini dɛ taa, dɛ ɡel kwaa haa taa bwa dɔ mkpa harɛ ta.

³¹ N dɛ soŋe kɛŋɔ, N Naa Korowii jirima do le saŋ bɛlbwa dɛɛ la! N dɛ soŋe kɛŋɔ, o sie lɛ kwaa waa taa la ta.

³² O nyiŋi harɛ aa, o dɛ jiɡri, o leɡe bwejena chuu ɛɛ le a ta.

³³ Mɛɛ ɡo yelaa kpɛɛ Korowii n soɡa bini bwa, n ta soɡe le tenaa, mɛɛ ɡo yelaa dɛ́ kpɛɛ Korowii maa dɛ tomɔ.

³⁴ N dɛ soŋe kɛ Korowii sie lɛ yel maa dɛ ɡo nɔ ta, dɛkalkɛ onee dɛɛ tɛ mɛ silɛɛ.

³⁵ N Naa Korowii, n dɛ soŋe kɛ he chɔɡ wechɔɡ-ɛɛra le harɛ nɔ ta, nyubinikpeɡ tena bɛ le do kpa. N dɛ kpɛɛ Korowii n bambile bwa ne! Hé kpɛɛ Korowii.