Yela 102 - mzwDBL

Bonɔɔ o bwara aa dɛ nyɛɡ wesoŋa

¹ N Naa Korowii, no n wesoŋa, no n wii maa dɛ wi dɛ́ cha mɛ.

² Dɛ waa puu mɛ naa, bɛ sie laa kpɔ n nɛ. Cheɡ deŋne no n be, dɛ́ chaŋ mɛ warane.

³ N tɔpera dɛ kaa warane kɛ chuu, n hoɡa bini ɛɛ wee mɛ kɛŋɔ hɔla aa dɛ fuh ken.

⁴ N do kɛŋɔ kpɔɡa aa hola dɛ kuuɡi chɔ la ken, n pɛla aa kondikwa bɛlbwa lawɛ.

⁵ N hima kohona nomanta, n ɡwaŋɔ ka hoɡa ɡbo.

⁶ A ka n ɡbo kɛŋɔ kwiu beŋkpoŋ waa lɔ pua hɛŋle ɡbo harɛ ta ken, n do kɛŋɔ kwiu waa lɔ bwɛɛ waa paɡra ta.

⁷ N chɔɔ n sie kpaŋe, n do kɛ jumbibeŋkpoŋ waa joŋi dea doa.

⁸ Saŋ bɛlbwaa n dɔma ɛɛ chɛɡ mɛ, n sɔnee ba yerɛ dɛɛ taah nɛra.

⁹ Tɔɔ ber mɛ kondikwa, siniire koo nee ta mɛɛ nyɔ,

¹⁰ he bandia kohona nomanta, he laɡ mɛ dɛ ɡɔɔ mɛ viɡri.

¹¹ N tɔpera dɛ ba warane kɛŋɔ wee yon le harɛ, bɔr ɛɛ bir la, n holɔ kɛŋɔ kpɔɡa ken.

¹² Kɛ hen Korowii te, he di kora saŋ bɛlbwa dɛɛ la. Naanar baa ka ba bwa ɛɛ lii he waa.

¹³ Hɛɛ sune bwɛjen Saayɔn tena nɛɛ, saŋ haa lea cheɡ la telo kɛ he dɔ tedoma tɛɛ ba.

¹⁴ Yan yaa ɛ he toroma sie dɛ lɛ bwɛjen Saayɔn wa, a lole kɛŋɔ o bwa paɡrɔ kwaraa.

¹⁵ Harɛre nɛra bwa ɛɛ ɔmɛ Korowiirii, ásɛ koranar baa lɔ harɛ nɔ ta bwa ɡe kpɛɛ o jirima waa dɔa.

¹⁶ Wɛɛ berɔ ba kwaa ma bwɛjen Saayɔn ja, ásɛ dɛ forɛ le o jirima ne.

¹⁷ Wɛɛ no he nɛra baa vɛɛh ba la bee, dɛ́ no ba wesoŋa.

¹⁸ Hé chwerɛ waa Korowii aa ɛa nɔ bil tɛ naanar baa ka ba kerekere, ɡɛ aa ɛ nɛra baa wola ban lolɛ mɔɔ la kpɛɛro.

¹⁹ Korowii lɔ o sobɔr waa do ɡoroŋ nyundua, dɛɛ nyiŋi harɛ,

²⁰ dɛɛ no nɛra baa laɡ ba do dea hima, dɛ́ lɛɛ ba le kpoora baa dɛ ba ba kpoora ta, dɛ́ ɡel ba dɔ ba te.

²¹ Anomanta, baa kpɛɛ Korowii sɔn bwɛjen Saayɔnee, dɛ́ kpɔ duure tɛo Jerusalam,

²² awola harɛre nɛra ne ba koranar aa cheme, dɛɛ tomɛ Korowii la.

²³ N taa dɔ bokpeɡa maa wola hwɛɛhrɛ mɔɔ la Korowii ɡelɔ n ɡwɛɡre, dɛ teŋe me mkpa tɔpera ta.

²⁴ Anomanta, n ŋɔ, “N Naa Korowii, bɛ ɡel ń teŋe sewɛ. He lole saŋ bɛlbwa, dɛ́ kpoŋe ka le naanar baa ka ba bwa.

²⁵ Wobɛlbwa mumpar la, henee ta harɛ, kwaa aa lɔ nyundua ɡe, he nɔn tomaa a bwa.

²⁶ A bwa ɛɛ chɔɡoo, aa wola lee do kpa, kɛ he te ɛɛ do lee dɛɛ la. A bwa ɛɛ ba ɛ kombenaa ba kpɔ ta kɛŋɔ yal yon hɛh la.

²⁷ Kɛ he te, hɛɛ do ɡɛ haa doa saŋ bɛlbwaa, ásɛ he bene ɡe aa jaɡaa dɔ bwa.

²⁸ Ya bii ɛɛ so he siee ásɛ he kpɔ nɔn tɔ ba nɛ, ásɛ dɛ nyiŋi ba naanar nɛ ba bwara sɔɔh ba.”