Yela 10 - mzwDBL

Korowii soŋa ó bol waa aŋwɛnɛ ta

¹ N Naa Korowii, ɛrɛɛ n ne he baah do jaŋne ken nɔɔ? Ɛrɛɛ waa puu mɛ, he sɔɔh mɛ nɔɔ?

² Nyubinikpeɡ tena mbarafo, ba cheɡɛ nyaara nɛ, ɡel ba liichɔɡa ɡure ba nyu ta.

³ Nyubinikpeɡ tena dɛ maŋkura ba te ba pɛlchɔɡa ta, nɛra baa dɛ nyin kafo dɛ bol Korowii bwara wechɔɡa dɛɛ vɛoh.

⁴ Nyubinikpeɡ tena waane laa Korowii wa, ba mbarafo, dɛɛ lii kɛŋɔ, Korowii waa ta hiaih.

⁵ Ba we-ɛɛla bwa dɛ do wer dɛɛ tɛɛ ba, baa ŋwɛnɛ Korowii aa cheɡɛ o ta, dɛɛ pa bole mun no, dɛɛ mamɛ ba dɔma.

⁶ Ba dɛ lii ba nyu bini ŋɔ, ba wobɛlbwa ɛɛ do werii dɛɛ tɛɛ ba, wobɛlbwa aa ban pu bwa ɡe.

⁷ Nɛra taahna ne nɛra neɡra, dɛ nɛra aahra ɡboo ba bwa, wobochɔɡa ne musuwaa ɡboo baa bol.

⁸ Ba yon sɔh bwɛjeɡre dahare, dɛ́ pɛɡle dɛɛ kpaah nɛra baa wola nomɛlbwa dɔe ó lɛɛ ba, dɛ́ kpoo.

⁹ Ba dɛ sɔh dɛɛ kpa kɛŋɔ nyujente ken, dɛ́ pɛɡle lawɛ nɛra baa wola nomɛlbwa dɔe ó lɛɛ ba, dɛ́ laɡ ba, dɛ́ tɛɡ ba kaa.

¹⁰ Nɛra baa wola nomɛlbwa dɔe ó lɛɛ ba la ɡwɛɡrɔ, nyubinikpeɡ tena la kpɔ ba bokpeɡa la pɔ ba nɛ.

¹¹ Nyubinikpeɡ tena la yon lii ba nyu bini ŋɔ, “Korowii waane laa. O laa sie kpɔ, waa yaa na bwa!”

¹² N Naa Korowii, tɛr nyubinikpeɡ tena nɔ deŋne, dɛ bɛ nɛŋɡwɛɡra waa soh.

¹³ Ɛrɛɛ nyubinikpeɡ tena ɛɛ ba wona ɛ hen Korowii sisawa ɔ? Ɛrɛɛ baa lii ba nyu bini kɛŋɔ, hen Korowii aa ba deŋnee tɛr ɔ?

¹⁴ N Naa Korowii, he dɛ na nɛra siswɛm ne lokua wa, dɛ yon dɛɛ cha ba. He nɔn taa nɛŋɡwɛɡra kpɔ ba nyu dɛɛ do, hɛɛ cha ba saŋ bɛlbwa.

¹⁵ Sɔɔh kpeɡri nyubinikpeɡ tena ne wechɔɡ-ɛɛra aa dɔa la nyoa, ba wechɔɡa baa ɛa la wa, tɛr ba deŋne ka tel kɛŋɔ, baa ɡela kwaraa.

¹⁶ N Naa Korowii, henee kooro saŋ bɛlbwa dɛɛ la. Nɛra baa dɛ tomɛ voɡa ɛɛ heo le he harɛ ta.

¹⁷ N Naa Korowii, he dɛ no nɛŋɡwɛɡra wesoŋa, dɛɛ do ba ɡbemba,

¹⁸ dɛɛ lɛ bilalbii ne nɛra baa dɛ fiɡ ba, dɛ́ bol ba waa tɛɛ ba ɡɛ aa ɛ nɛwɛnyini waa won sewa nɔ bɛ on aah kpa.