Wiile 5 - mzwDBL

Suna dii wesoŋa

¹ N Naa Korowii, lii ya wa dɛ́ na waa aa pu yaa. Nyiŋi dɛ́ na ɡɛ sihiih aa kpo yaa.

² Harɛ waa ɛ ya kapɛrɛ kon kaa di nɛŋhɔɔhra nɔn ta, harɛfala nɛra lɛ ya deremi dɛ so a ta.

³ Ya mɛɛnanar serewɔ asɛ ya ɛ bilalbii, ya nyare ɛ luhaahna.

⁴ Ya dɛ bɔ nee kem mɔɔ dɛ́ dɔ nyɔ, ɡɛ tentenee yaa yawɛ damara ɡe.

⁵ Ya dɔma ti yaa dɛɛ di ya nafeena, ya koɔh kɛ baa yaa ɡel ya onɛ.

⁶ Ya koh kondikwaa yaa dɔ di wa, dɛ kpɔ ya te ka do Ijipt ne Asiiria tena lɔɡa.

⁷ Ya naawa fa ɛ wechɔɡa dɛ bwa serewe kaa, kɛ taraken yanee bera dɔ a deŋnetɛra.

⁸ Yomaa bera dɛɛ nyiŋi ya nɛ, nomɛlbwa toole dɛ́ won lɛ yaa le kpeɡri baa dɛ di ya nɛɛ ta.

⁹ Nɛŋkpoa aa lɔ kpɔɡ bini nomanta, ya dɛ sɛh seo kwara dɛ le kaa nyin kondikwa.

¹⁰ Lɔr ɡelɔ yaa we kabul, a ɡel ya bwadabii wɔrɔbe kɛŋɔ baa mar nii fononoo bini ken.

¹¹ Ba ɡuɡri haahna dɛ laɡ ba chɔ Saayɔn Bwejen ta, ɡɛɛ ba ɛ toli baa wola baala jemɛ ɡe Juda harɛ bwɛɛ bɛlbwa ɡe ta.

¹² Ba vɔrɔwe ya sitɔɔla nɔɔra ŋwɛɛra ne dɛ ka saɡ ba, baa duure kpɔe dɛɛ tɛ banjeni.

¹³ Ba ɛɡre bonɔɔna baa namɛ boyu kɛŋɔ yoma ken, bibaala ɡe che datɔɡa dɛɛ kɛŋle.

¹⁴ Nomonome aa bwɛjen la doonyojen ta bela so kpa, bonɔɔna ɡe ɡel yela ɡoe.

¹⁵ Silɛɛ toole ya bini kpa. Ya dɔ silɛɛ aa, anee ya yon dɛɛ sa, taraken te ya dɛ wi, dɛkalkɛ ya lɔ suna dii ta.

¹⁶ Komɛlbwa toole ya won dɛɛ tamane o waa kpa. Ya ɛ wechɔɡa nomanta, wenaale kohona ba ya nɛ.

¹⁷ Gɛ ɡelɔ ya bambili bwa chɔɡ, siniire nomanta, ya sibie swɛɛrɔ, yaa wone dɛɛ na kɛrɛdɛ kpa,

¹⁸ dɛkalkɛ Saayɔn Bwejen chɔ pɛɛ, asɛ kalampoŋare do o ta dɛɛ ɡaaɡe.

¹⁹ N Naa Korowii, he dɛ di kora saŋ bɛlbwa, hɛɛ teŋɔɔ di kora saŋ bɛlbwa dɛɛ la.

²⁰ Ɛrɛɛ he soh ya waa biɡri ɡɛ nɔɔ? He ta ɛɛ ba lii ya waa ja tenaa?

²¹ N Naa Korowii, berɛ lawɛ yaa ba he be. Berɛ ɡel ya dɔ silɛɛ o fa aa lole wubwa la.

²² Kɛɛ he deno vɛh yaa kwara kɛɛ? He bandia ta jaɡa dɔe ya nɛ aa?