Wiile 4 - mzwDBL

Jerusalam aa paɡra habɔɔ

¹ Na ɡɛ ya suuɡaswɛm sie aa chɔɡa, suuɡaswɛm tenten o fa aa dɛ nyɛɡle kohona la, o ta berɛ do ɡɛ kpa. Korowii Dea bwedɛɛɡa a yoɡ aa kpeɡa, peɡrɔ dɛ chɔ fɔɡbaahna.

² Na ɡɛ bwɛjen Saayɔn bonɔɔna ba fa aa do kɛŋɔ suuɡaswɛm a yoɡ aa kpeɡa aa doa, kɛ taraken, ba berɔ do kɛŋɔ vii baa kpɔ choh mao ken.

³ Kalampoŋa ɡba jemɛ ɡɛ waa ɔr o bie dɛ́ nyiŋi o nɛɛ ó kpeɡ. Kɛ n nɛra Jerusalam tena nyu bini kpeɡri ba bii nɛɛ, kɛŋɔ taataa ken.

⁴ Ba ɡelɔ nyɔɡre ne lɔr kpo bechasɔɔhne baa serewe. Bechale ɡaaɡɔ dɛɛ soŋe kondikwa, kɛ nomɛlbwa aa ban tɛ.

⁵ Nɛra ba fa aa dɔ kondikondɛɛɡa dɛɛ di la, lɔr kpo ba ba serewe chɔ fɔɡbaahna. Banɔ la baa dɛ di yɛɛ ɡe kam kompuɡreri puldoa dɛɛ di.

⁶ N nɛra deŋnetɛra ɡwaa Sodom tena Korowii aa ɡela ba chɔɡa piɡ ba, nomɛlbwa aa wola wone lɛɛ ba la.

⁷ Jerusalam sitɔɔla waa fa do chasee kɛŋɔ yabi aa toa ken. Ba fa dɔ bwadabii dɛ dɔ bokpeɡa, dɛ je ɡe kohona.

⁸ Kɛ taraken ba serewɔ chɔ fɔɡbaahna baa wola ban jemɛ. Ba bwadabii holɔ kɛŋɔ da, dɛ marɛ ba hoɡa.

⁹ Banɔ la baa sewɛ laa ta la, bɔ banɔ la lɔr aa kpoo ba. Kondikwa bɛ toole waa lɔr kpoo ba.

¹⁰ Wenaale aa chiɡ n nɛra nɛɛ nɔ, a ba wedoŋa kohona ne taeh, hale haahna baa dɔ tedoma tɛ ba bii daa ba ola chwe.

¹¹ Korowii baah diu kohona, asɛ o choŋi nii dɛ fuh Saayɔn bwa dɛɛboo ken.

¹² Harɛre koranar, kɛɛ harɛ nɔ ta nɛn bɛlbwa, ta liire kɛŋɔ dɔma ɛɛ won kpɔ Jerusalam doonyojena ta jo o bini.

¹³ Kɛ a ɡɛ waa nɔ wono chiɡ, dɛkalkɛ a cheɡɛ Korowii keamere ne o sɔfore wechɔɡa ta, nɛra baa wola wechɔɡa bɛlbwa ɛɛ serewe.

¹⁴ A ɡɛ keamere ne sɔfore la dɛ ɡaaɡe fɔɡbaahna kɛŋɔ nyoŋa ken. Nɛra aa cheɡɛ ba nɛɛ ba serewe, ba chale do ba nɛɛ la ɡelɔ ba kah doŋa, anomanta, nomɛlbwa aa won leɡ ba.

¹⁵ Asɛ nɛra la nyɛɡ ba nɛɛ ŋɔ, “Hé le ya be kaa! Hé kah doŋa! He bɛ yaa leɡe!” Gɛɛ baa ba harɛre ta doe dɛɛ ɡaaɡe, nomɛlbwa aa wola won lɛɛ ba.

¹⁶ Korowii ɡbabirii lɔ ba peɡre, o laa sie kpɔ ba nɛ. Nɛra aa sɔfore duu, baa nomonome ɡe kpɔe dɛɛ ɛ wobɛlbwa.

¹⁷ Ya ta sie nyiŋi ŋɔ ya ken ɛɛ dɔ chae, dɛ ba kahonɛ. Ya cheɡɛ ya dejaŋa ta nyiŋi kɛŋɔ, yaa dɔ harɛ bɛl nɛraa bá ba lɛ yaa le ya dɔma nɔn ta kahonɛ.

¹⁸ Ya dɔma dɛ nyiŋi ya vala bwa bini, a ɡel yaa won fɔɡbaahna kwaaraa valɛ. Ya tɔpere telo tonɛ, a ka tamaa ken ya serewe.

¹⁹ Ba ɡbaŋre ɡwaa kɛŋɔ kee yon le nyundua la ken, dɛ ba tɔ ya nɛ. Ba ti yaa bwejena dor, dɛ ka sɔh dɛɛ kpaah yaa pua hɛŋle ɡbo harɛ ta.

²⁰ Ba lawɛ kooro Korowii aa leo tɛ yaa. Ya liiro kɛŋɔ o nɛɛ yá che dɛ́ dɔ mkpa. Onee ya yarada kɛŋɔ wɛɛ lɛ yaa le nomɛlbwa waa ba lɔ tɔ ya nɛɛ la be.

²¹ Edom ne Us tena, hé hɛɡre dɛ́ ɡel he sie lɛ. He ɡe chɔɡa dɛ ba, hɛɛ yɛɛɡoo mumɡbal ne, ásɛ sihiih kpo heya.

²² Saayɔn tena dɔ deŋnetɛra ba wechɔɡa wa, Korowii aa ɡel ba lawɛ heyaa laa ta kaa bojaŋ harɛfale ta kpa. Kɛ he Edom tena te, wɛɛ tɛr he deŋnee, dɛ́ le he nyubinikpeɡ we-ɛɛla ne baŋ.