Wiile 2 - mzwDBL

Korowii tɛr Jerusalam tena deŋne

¹ Na ɡɛ Korowii aa kpɔ o bandia ba bɔle bwɛjen Saayɔn ta kɛŋɔ bam, dɛ tɛr o nɛra deŋne. O le nyundua taɡɛ Israel wer ta harɛ. O ta o natiɡribɔr waa ɛ o Dea la ɡba waa dawɛ o bandia tɔpere la ta.

² O chɔɡ Juda harɛ bwɛɛre bwa o ta bɛlbwa nɛɛ sune, dɛ chɔɡ dekpeɡa aa lɔ harɛ la ta bwa bandia ne. O ɡelɔ sihiih kpo koranar ne ba harɛre.

³ O cheɡɛ o bandia kohona ta, dɛ sɔɔh Israel nɛŋkpeɡa nyoa. Gɛ saŋ ba dɔma aa ba ba nɛɛ la, o berɛ habɔɔ kpo ba, o ta ban chae. O baah di Israel tena nɛɛ kohona, o chɔɡ ba kɛŋɔ nii yon fuh dɛ chɔɡ komɛlbwa la.

⁴ O do kɛŋɔ dɔm waa harɛ o to pa ba nɛ, dɛ kpoo nɛra ba sie aa dɛ lɛ ba nɛ dɛɛ nyin ba kohona. O bandia kohona la ba Jerusalam tena nɛ.

⁵ Korowii do kɛŋɔ dɔm dɛ ba chɔɡ Israel harɛ. O ɡelɔ o dekpeɡa ne kooderemi bwa berɛ dimɡbeeni, dɛ kpɔ wii ne suna dii aa wola jaɡa dɔe ba ta Juda tena nɛ.

⁶ O kuuɡi o Dea baa dɛ tomɔ o bini burbur ken, dɛ ɡel tɔpejena baa lea cheɡ a do ɡoroŋ, ne Ona Tɔpera bwa ba a jaɡa. Kooroo yoo, sɔfoo yoo ba bwa nyɔ o danana ne.

⁷ Korowii vɛh kon baa ɛ saraha dɛɛ tɛo ta, dɛ ɡel o Dea waa do ɡoroŋ la. O ɡelɔ dɔma ba kuuɡi kooderemi danjwɛɛre. Dɔma la do silɛɛ lɔŋɔre bela ba fa aa dɛ tomɛ, kɛŋɔ tɔpejen baa lea cheɡ tɔpere bɛl ta ken.

⁸ Korowii siwi beɡrɔ kɛŋɔ Saayɔn danjwɛɛ kuuɡi. O maɡɔ cheɡ kɛŋɔ ó chɔɡo kwaraa. Danjwɛɛre la do kɛŋɔ nɛra aa dɛ wi ken, a ta bokpeɡa bɛlbwa dɔe kpa.

⁹ Bwɛjen la doonyojena choɡlo dɛ huɡe harɛ, bune baa kpɔa dɛɛ kaɡra ɡe kuuɡi dɛ chɔɡ. Ba lawɛ o koranar ne nomonjena bwa laa ta kaa harɛfala ta. Sɔfore aa nɛra Korowii waa baɡle, asɛ Korowii keamere ɡe aa won wepila na dɛɛ le Korowii be kpa.

¹⁰ Jerusalam banjeni helɔ dɛ so harɛ jeiih ken, ba ɛ teera do ba nyuune ta dɛ kpɔ lweyale tɔ, a baɡle kɛ ba dɛ di suna. Bitoli ɡe ɡure nyuune su harɛ.

¹¹ N wio kohona n sie bwa ɛɛ wee mɛ, n loo ɡe ku. N di suna dɛ ba koh, n nɛra chɔɡa baa chɔɡa wa, dɛkalkɛ bechale ne bechasɔɔhne bwa ɡwɛɡrɔ chɔ bwɛjen la fɔɡbaahna.

¹² Lɔr ne nyɔɡre ɡelɔ ba wi dɛɛ yerɛ ba nyare, dɛɛ choɡli bwɛɛ la fɔɡbaahna kɛŋɔ baa do ba bola ken, dɛ serewe dawɛ ba nyare nɔɔra ta.

¹³ Akwe! Ee, Jerusalam maa dɛ nyini kohona, ɛrɛɛ ń bol he waɔ? Ɛrɛɛ mɛɛ ba wona larawe he bwara ɔ? Nomɛlbwa ta he wenaale nɔ dɔŋa nae bwa. He wenaale nɔ bini luŋri kɛŋɔ mpo vil ken, he ta hwɛɡa bɛlbwa dɔe.

¹⁴ Wepila he keamere aa naa dɛɛ baɡle la ɛ nyosone, ba webaɡla la neɡre, ba ta ɡelɛ he jemɛ he wechɔɡa, ásɛ he charɛ he we-ɛɛla, ba bɛ hen lawɛ kaa harɛfala ta.

¹⁵ Bwɛjen Jerusalam, nɛra baa teŋa baa kaa nyiŋi dɛɛ mamɛ. Ba viiɡi nyuune dɛɛ mamɛ, chɔɡa haa chɔɡa waa dɛ ŋɔ, “Akwe, bwɛjen Jerusalam waa wera kohona, asɛ harɛre nɛra bwa sie fa ɛɛ lɛ o nɛɛ laanee nɔ naa?”

¹⁶ He dɔma bwa dɛ mamɛ dɛɛ muɡli he baah. Ba mile nyoo dɛɛ pwee ŋɔ, “Ya wono chɔɡo! Tɔpere yaa dɛ kpa laanee fini!”

¹⁷ Korowii teŋɛ o nyobaɡa ta, dɛ ɛ waa o fa aa vɔrɔwa bil ŋɔ wɛɛ ɛo la. O chɔɡe, o ta he nɛɛ sune, dɛ ɡel he dɔma pɔ he nɛ, dɛɛ di he loro, he chɔɡa la wa.

¹⁸ Bwɛjen Jerusalam, wi yerɛ Korowii. He danjwɛɛre do kɛŋɔ nɛn o lole bɛl aa sewa wɛɛ wiu ken. Gel siniire ɛɛ yɔɔre chɔɔ ne jwaana kɛŋɔ nenapale, bɛ suna dii ne wii ɡel.

¹⁹ Ir jwaana bɛlbwa dɛ́ɛ wi, dɛ́ɛ yerɛ Korowii ó chae. Pili he bambile dɛ́ɛ soŋo ó sune he bii nɛ, bechale lɔr aa kpo ba ba serewe chɔ fɔɡbaahna la wa.

²⁰ N Naa Korowii, nyiŋi na. Umee he ɛ ken bwa nɔ? A chɛ kɛ haahna chwe ba bii baa dɛ nyin ba ola aa? A chɛ kɛ bá kpoo sɔfore ne Korowii keamere he Dea la bini naa?

²¹ Bechale ne nomonome bwa serewɔ chɔ fɔɡbaahna, ya dɔma kpoo bonɔɔna ne toli laa ta. He ta ba nɛɛ sune dɛ kpoo ba awola he baah aa dia la.

²² N Naa Korowii, he ta nɔn yerɛ nɛra cheme kɛŋɔ kondikonjena dii tɔpere, asɛ ɔmee kohona bar mɛ cheme. Awola he baah aa dia la, nomɛlbwa ta wone chwa kɛɛ dɛ le a nyoa. Dɔma kpoo n bii maa dɛɛ ba, dɛɛ nyin ba kohona.