We-ɛɛla 9 - mzwDBL

Sɔɔl charɛ o liire dɛ ba ɛ Yeesu torome

¹ Dɛ Sɔɔl ta swɛɛ siwi dɛɛ aah Yeesu habɔteŋra la ŋɔ wɛɛ kpo baa. O la Sɔfonomoa be

² dɛ ka soŋo ŋɔ ó tɛo o nɔn bini tɔn ásɛ o kpɔ ɡaaɡe bwɛɛ la baa dɛ yerɔ Damaskɔs la cheremi deene ta, ásɛ dɛ o na Yeesu ŋwɛnɛfale tena la bɛlbwa naa, baalee yoo, haahnee yoo, ó laɡ ba dɛ́ vɔɡ ba, dɛ́ kpɔ ba ba Jerusalam.

³ Sɔɔl aa dɛ kaa dɛ ka tel Damaskɔs la, kerabeŋkpoŋ dɛ nii le nyundua dɛ chaah o nɛ.

⁴ Belaa o chole harɛ dɛ no kɛŋɔ nomɛl aa dɛ yerɔ dɛɛ ŋɔ, “Oo, Sɔɔl! Ɛrɛɛ he che n nɛɛ ɡɛ nɔɔ?”

⁵ Asɛ Sɔɔl ŋɔ, “Henee umeo, n Dɔɔ?” Asɛ naate ŋɔ, “Menee Yeesu la haa dɛ yoo mɛ la.

⁶ Kɛ ir dɛ́ kaa bwɛjen Damaskɔs bini. Belaa hɛɛ ba ɡɛ aa chɛ kɛ he ɛ jema.”

⁷ Nɛra ba ne Sɔɔl aa dɛ kaa la no wobol ane, kɛ ba ta nɛn nae. Asɛ ba jaɡɛ che, ba ta jemɛ waa baa bol.

⁸ Sɔɔl iro che dɛ pili sie, kɛ dɛ waa na, asɛ ba lawɔ daa ba Damaskɔs.

⁹ A di tɔpera atoro, dɛ waa na. Dɛ waa kwaa di, waa nee ɡe nyɔ.

¹⁰ Dɛ asɔre te bɛl lɔ Damaskɔs baa yerɔ Ananias. O noɔ kɛŋɔ Yeesu aa dɛ yerɔ chaahna ta ŋɔ, “Ananias!” Asɛ o sɛh ŋɔ, “N Dɔɔ, menee la.”

¹¹ Asɛ Yeesu ŋɔ, “Ir la fɔɡbaah la baa dɛ yerɛ bela ‘Fɔɡtoɡre’ la ta, dɛ́ ka jo Judas dem dɛ́ bɔɔ Taasos baa bɛl baa dɛ yerɔ Sɔɔl la wa. O dɛ soŋe Korowii,

¹² dɛ na wepila bini kɛ baa bɛl baa dɛ yerɔ Ananias aa baa jo dea dɛ kpɔ nɔɔra dawɛ o nɛɛ asɛ o berɛ dɛɛ na ja.”

¹³ Belaa Ananias ŋɔ, “N Dɔɔ, nɛra baa bol baa nɔ waa n be warɔ. O wechɔɡdamanta waa ɛ he nɛra ba wa aa toɡra Jerusalam la bwa waa ba bol n be.

¹⁴ O taraken bala waa ba Damaskɔs nɔ, Sɔfonomonomee tɛo kpeɡri ŋɔ ó ba larawe ya nɛra yaa dɛ tomɛ la bwa la.”

¹⁵ Anee Yeesu ŋɔ o be ŋɔ “Kaa! Menee leo dɛɛ nyin n tomɔ, ásɛ nɛra baa wola Juu tena ɛɛ ne ba koranar ne Israel tena bwa ba che o nɛɛ dɛ́ jem mɛ.

¹⁶ Mɛɛ ɡeloo ó jemɛ wahala bwa waa dɛ ba n waa koeh dɛ́ na.”

¹⁷ Anomanta, Ananias kaa jo dem Sɔɔl aa lɔ o ta la ta, dɛ kpɔ o nɔɔra dawɛ o nɛɛ dɛ ŋɔ, “N dɔŋ Sɔɔl, ya Dɔɔ Yeesu ɡbaɡbaa tom mɛ he be. Onee kpɔ o te baɡle ɡɛ saŋ haa dɛ ba bonɔ la. O tom mɛ ŋɔ ń ba ásɛ he berɛ won dɛɛ na ja, ásɛ Korowii Domadɛɛɡe la ɡe so he nɛ.”

¹⁸ Buɡ la ta, dɛ kwaane le Sɔɔl sie lee harɛ kɛŋɔ pɛŋe pɛɡa ken, asɛ o berɛ won dɛɛ na ja. Anee o ir, asɛ ba sɔɔ Korowii ne,

¹⁹ asɛ o di kwa, o bwara do kpeɡri. O soɡe asɔre tena baa lɔ Damaskɔs la be tɔpera anɛ,

Sɔɔl Damaskɔs ne Jerusalam laŋa wa

²⁰ asɛ o den la bela cheremi deene bini dɛ kaa bol Yeesu waa dɛɛ baɡle nɛra dɛɛ ŋɔ Korowii Biee Yeesu.

²¹ Nɛra baa no o wobol la bwa nyoa kpoo, ba ŋɔ, “Baa nɔ laa fa dɛ ɛ nɛra baa lɔ Jerusalam dɛɛ tomɛ Yeesu la saɡasaɡa dɛɛ nyin o kpoo ba la aa? Aah a ɡɛ asɔre tena nɔ lawa sɔn laa o yerɛ dɛ ba bonɔ dɛ fe ba laɡ ba ka tɛ Sɔfonomonome la aa?”

²² Sɔɔl aa dɛ bol Korowii Waa la, dɛ name kwaraa o wobol la bini ɛɛ do kpeɡri. O baɡlɔ le Korowii wobol la ta kɛŋɔ Yeesuu Kristo la kasinteŋ, anomanta, Juu tena baa soɡe Damaskɔs la ta wone tɔŋlo kpa.

²³ Aa biɡra tama la, Juu tena la chemo dɛ vɔrɔwe ŋɔ bá fe kpo Sɔɔl,

²⁴ asɛ o no ba waa baa vɔrɔwa la. Dɛ ba dɛ daah bwɛjen la doonyoone chɔɔ ne jwaana bwa dɛɛ nyin bɔr dɛ́ kpoo.

²⁵ Belaa o habɔteŋra la doo wɛɡrɛ bini jwaana dɛ che danjwɛɛ la tokoro bɛl ta kpɔɔ tu bwɛɛ la dahara, o kaa Jerusalam.

²⁶ Sɔɔl aa la Jerusalam la, o laŋɔ ŋɔ ó fe ka ja Yeesu habɔteŋra baa lɔ bela la nɛ, kɛ dɛ ba bwa dɛ ɔmɔ, ba ta on yaradae kɛ asɔre tena la bɛlee on.

²⁷ Belaa Banabas tɔ o sie dɛ kpɔɔ ba Yeesu toroma la be, dɛ baɡle ɡɛ Sɔɔl aa dɛ ba ŋwɛnɛ ta dɛ ba na Yeesu asɛ o bol waa o be. Banabas baɡle ɡɛ Sɔɔl aa wona bol waa Damaskɔs bambile ne Yeesu sɔn ta.

²⁸ Ate, dɛ Sɔɔl ne asɔre tena laanee dɛɛ ɛ wobɛlbwa Jerusalam bela. O bol waa bambile ne Yeesu sɔn ta.

²⁹ O ne Juu tena baa dɛ bol Grik wobol la bol waa dɛ tɔŋle waa kɛrɛdɛ, asɛ baa nyin bɔr dɛ́ kpoo.

³⁰ Sɔɔl bala asɔre tena la aa baa na ɡɛ la, ba kpɔɔ kaa Sisaaria, dɛ ka doo ŋwɛnɛ bela o kaa Taasos.

³¹ A habɔɔ la, asɔre tena baa lɔ Juda ne Galilia ne Samaria harɛre la bwara sɔɔh ba, asɛ Korowii Domadɛɛɡe la cha ba, nɛra baa ja ba nɛ, baa dɛ ɔmɛ Korowii dɛɛ teŋɛ o ŋwɛnɛ ta nomanta.

Aeneas ne Dɔkas

³² Dɛ Pita dɛ valɛ bwɛɛre ta taeh. Awola bɛl, o ba Korowii nɛra ba wa aa toɡra be Leda.

³³ Belaa o ka na baa bɛl baa dɛ yerɔ Aeneas. Dɛ o kuuɡo so harɛ bene anuatoro.

³⁴ Pita ŋɔ o be ŋɔ, “Aeneas, Yeesu Kristo chaeh. Ir che dɛ́ ɡuɡri he kalaŋ buɡ nɔ ta.” Buɡ la ta, dɛ Aeneas iro che.

³⁵ Nɛra baa lɔ Leda ne Sarɔn bwa na baa la dɛ charɛ ba liire, dɛ teŋɛ Yeesu nɛ.

³⁶ Dɛ haah bɛl lɔ Jopa dɛ ɛ asɔre te baa yerɔ Tabita. Grik tena ɡe dɛ yerɔ Dɔkas. Dɛ haah la dɛ ɛ wedɛɛɡa taeh dɛɛ cha nyaara.

³⁷ A ɡɛ saŋ Pita aa lɔ Leda la, Tabita bwara weo o sewɛ, asɛ ba sɔɔ ne dɛ kpɔɔ bil abrɔsane bɛl doa.

³⁸ Dɛ Jopa ne Leda aa jaŋɛ, anomanta, asɔre tena baa lɔ Jopa la aa noa kɛŋɔ Pita lɔ Leda la, ba tomɛ baala banɛ o be dɛ ŋɔ bá ka ŋɔ o be ŋɔ ba dɛ soŋo kɛ ó ɡel wobɛlbwa dɛ́ ba ba be warane.

³⁹ Toroma la aa laŋa la, Pita kpɔ o te dɛ puu ba kaa. Waa laŋa la, ba kpɔɔ deeh abrɔsane la. Dɛ luhaahna baa lɔ bela la bwa baa chwa baro dɛɛ wi, dɛ kpɔ batakaani ne yale Tabita aa sɔah ɡɛ saŋ waa wola sewɛ mɔɔ la dɛɛ baɡle Pita.

⁴⁰ Pita doŋi ba bwa le buse dɛ ɡuŋi harɛ, dɛ soŋe Korowii, dɛ berɛ sie lale la be dɛ ŋɔ, “Tabita, ir!” Haah la pili o sie. Waa na Pita la, o iro so.

⁴¹ Belaa Pita tel o be dɛ lawɔ ir che, dɛ ka yerɛ asɔre tena ne ba bini luhaahna la bwa dɛ kpɔ haah la waa iru la tɛɛ ba.

⁴² A ɡɛ waa nɔ perɛ Jopa bwa, asɛ nɛra kɛrɛdɛ che a ta dɛ yarada Yeesu waa la.

⁴³ A habɔɔ la, Pita soɡe Jopa bela biɡri. Dɛ ɡbansabate bɛl baa dɛ yerɔ Seemɔn la deaa o do.