We-ɛɛla 7 - mzwDBL

Steeven nyoa wobol

¹ Belaa Sɔfonomoa la bɔɔ Steeven ŋɔ, “Kpelaa ba ŋɔ nɔ naa?”

² Anee Steeven chaŋe ŋɔ, “N mɛɛwa ne n dɔɔranar, hɛ́ɛ no waa nɔ maa dɛ ba bola nɔ! A ɡɛ saŋ la ya naa Abraham aa wola Haran kaalɛ mɔɔ la, Korowii waa ɛ jirima bwa dɔɔ la ba o be Mɛsopoteemea harɛ ta,

³ dɛ ba ŋɔ o be ŋɔ, ‘Gel he lolanar, dɛ́ le he harɛ haa lɔ o ta nɔ ta, dɛ́ ka so harɛ maa dɛ ba he baɡla la ta.’

⁴ Asɛ Abraham ir le o harɛ ta dɛ ka so Haran. O mɛɛ aa sewa habɔɔ laanee Korowii ɡel o ba so harɛ nɔ haa soɡe o ta fini nɔ ta.

⁵ A ɡɛ saŋ la, Korowii ta harɛ la pera teŋe tɛ Abraham kɛŋɔ ó ɛ o ɡe kon nɔ. O ta naɡale beŋkpoŋ del kwara teŋe tɛo. Kɛ Korowii baɡɔ nyoa ŋɔ wɛɛ kpɔɔ tɛo, ásɛ harɛ la ɛ o ne o naanar kon. A ɡɛ saŋ la Korowii aa baɡɛ Abraham nyoa nɔ la, dɛ o ta bii dɔe mɔɔ.

⁶ Waa Korowii aa bol Abraham be laanee kɛŋɔ o naanar ɛɛ ka berɛ hɔɔhra harɛ bɛl taa, ásɛ bela tena kpɔ ba ɛ yoma, dɛ́ fiɡ ba kohona bene lafraanaarɛ.

⁷ Dɛ ŋɔ wɛɛ bol a ɡɛ harɛ la tena waa dɛ́ pa ba bole, dɛ bɔ ba a kem, ásɛ a habɔɔ la o nɛra ba bonɔ dɛ baa tomɔ.

⁸ Asɛ Korowii baɡle Abraham ŋɔ wɛ́ɛ teŋe o bii pena, ásɛ a ɡɛ waa la ɛ nawee dɛ́ che tɛ o ne Abraham fɔo la baa fɔwa la wa. A waa Abraham aa lolɛ o bie Aesek o dɔ yawanyoa beŋkpoŋ la, ba teŋe o pen. Aesek ɡe aa baa lolɛ o bie Jekɔb la, o teŋe o pen. Asɛ Jekɔb ɡe teŋe o bii fi dɛ banɛ baa ɛ ya deene nomonome la bwa pena.

⁹ Dɛ Jekɔb bii la aa ba nime Josef la waa nyin, dɛ kpɔ bɔweela yoɡu tɛ Ijipt tena, asɛ ba ka kpɔɔ ɛ ba yom. Dɛ Korowii teŋɛ Josef nɛ,

¹⁰ anomanta, wobɛlbwa ta on ɛɛ o wahala waa naa la bwa ta. A balɔ kɛŋɔ Josef la Ijipt harɛ kooro be, Korowii tɛo jirima ne liire, asɛ o waa too kooro la tea kohona. Anomanta, o ɛ Josef o harɛ la bwa ne o dem tena bwa nomoa.

¹¹ Belaa lɔr ba chole Ijipt ne Keenan harɛ bwa ta, asɛ baa na wahala kohona. Dɛ ya naawa ta kondikwaa dɔe dɛ di.

¹² Belaa Jekɔb ba no kɛŋɔ kondikwaa lɔ Ijipt harɛ, dɛ tomɛ o bii baa ɛ ya naawa la ŋɔ bá la bela ka yawɛ ane ba. Dɛ ba loɡla laŋa baa dɛ la bela bwaa la.

¹³ Baa bera ba la bela nɛɛtena la, Josef kpɔ o te baɡ ba, asɛ ba jemɛ kɛŋɔ ba nime Josef laanee on. Ijipt harɛ kooro la ɡe baa jemɛ ba wa.

¹⁴ Belaa Josef kal o mɛɛ Jekɔb ŋɔ ó ne o bii ne o naanar bwa ba so o be Ijipt harɛ. Dɛ ba bwa lɔ nɛra fifraanuanɛ dɛ nɛra banue.

¹⁵ Asɛ Jekɔb ir kaa Ijipt harɛ dɛ ka so bela. Belaa o ne o bii la bwa ka serewe.

¹⁶ Baa serewa la, ba kpɔ ba kaa Sɛkem, dɛ ka huɡ ba lalbɔɔ la Abraham fa aa yawa Hamɔ dea tena be la ta.

¹⁷ Korowii nyobaɡa waa baɡɛ Abraham kɛ wɛɛ lee ba Ijipt harɛ taa dɛ tɛɛ ba harɛfale la aa tela la, ya naawa baa lɔ Ijipt harɛ la warɔ kohona.

¹⁸ Koofale waa wola Josef waa jemɛ baa di Ijipt kora.

¹⁹ Dɛ o dɛ neɡ ba dɛɛ ɛɛ ba nyubinikpeɡ, dɛɛ fiɡ ba, dɛ ɡel ba kpɔ ba bechasɔɔhne kaa ta baa serewe.

²⁰ A ɡɛ saŋ nɔɔ ba lolɛ Mosis. Dɛ o wer bonɔɔ kɛrɛdɛ. O nya nyiŋi o nɛɛ korobie atoro mɔɔ dɛ kpɔɔ ka ta.

²¹ Baa tao la, a ɡɛ kooro la bihaahnee nao dɛ kpɔɔ dɛ nyiŋu kɛŋɔ o ɡbaɡba bie.

²² Mosis hweli Ijipt tena waa bwa dɛ dɔ ba wejema bwa. Dɛ o wobol dɛ jo deŋne, o berɛ won wejena ɡe ɛɛ ja.

²³ Waa baa dɔ bene fifraanaarɛ la, a ba o nyu bini kɛŋɔ ó nyiŋi dɛ́ na ɡɛ baa dɛ ɛ o bala Israel tena la.

²⁴ Waa baa na Ijipt tena la bɛl wɛɛ fiiɡi o bwɛɛ te awola bɛl la, o lɛ o bwɛɛ te la nyoa dɛ kpo Ijipt te la bɔ kem.

²⁵ Dɛ Mosis dɛ lii kɛŋɔ o bwɛɛ tena la ɛɛ jemɔɔ kɛŋɔ Korowiirii dɛɛ nyin a che o nɛ dɛ́ lɛɛ ba ta, kɛ ba ta ɡɛ jemɛ.

²⁶ Tɔ aa pera la, o na Israel tena banɛ baa yo, dɛ la ŋɔ ó ka larawe ba yoi la. O ŋɔ ba be ŋɔ, ‘Nɛmbeŋkpoŋii heya. Bɔkwaa dɔ heyaa hɛɛ yo ken ɔ?’

²⁷ Asɛ ba bini onɔ la waa dɛ weɡre o dɔŋ nyoa la taɡɛ Mosis dɛ bɔɔro ŋɔ, ‘Umee cheɡe kora ta ŋɔ hé baa nyiŋi ya nɛɛ dɛ́ bol ya waa dɛɛ pa bole ɔ?

²⁸ He dɛ nyin he kpo mɛ ɡɛ haa kpo Ijipt te la kɛɛ?’

²⁹ Mosis aa no a ɡɛ waa nɔ la, o ɔmɔ, dɛ chwa le Ijipt harɛ dɛ ka so Midian harɛ ta. O lolɛ bibaala banɛ bela.

³⁰ Bene fifraanaarɛ aa baa ɡale Mosis nyu ta bela la, o la pua hɛŋle ɡbo harɛ bɛl ta, Sinai Bwejen la bɔr, dɛ ka na nyundua torome bela. Dɛ dawii ane aa dɛ lawɛ baahnee nyundua torome la che.

³¹ Dɛ dawii la dɛ lawɛ, kɛ dɛ aa fuh. Anomanta, a ɛ Mosis anebɛlbwa, asɛ o tuuh tel ninlao la bɔr dɛ́ won na kɛrɛdɛ. Waa tuuhna dɛɛ tel bela la, o noɔ kɛŋɔ Korowii aa dɛ bol ŋɔ,

³² ‘Menee Korowii he naawa Abraham ne Aesek dɛ Jekɔb aa tom mɛ la.’ Mosis ɔmɔ dɛɛ chel, o ta berɛ dɔ bambile dɛ nyiŋu.

³³ Asɛ Korowii ŋɔ o be ŋɔ, ‘Foo he naŋɡawa, dɛkalkɛŋɔ n siee he che la.

³⁴ N na fiiɡa Ijipt tena aa dɛ fiiɡi n nɛra Ijipt harɛ ta, dɛ no ba wii baa dɛ wi la bwa ɡe. A balaa n ba ŋɔ ń ba lɛɛ ba ta la. Anomanta, n dɛ ba he toma Ijipt harɛ.’

³⁵ Mosis la Israel tena fa aa vɛoh dɛ ŋɔ, ó baɡle naate waa cheɡo kora ta ŋɔ ó baa nyiŋi ba nɛɛ dɛ́ɛ bol ba waa la, onee Korowii tomɛ ŋɔ ó ba tɔ ba sie dɛ́ lɛɛ ba ta. Nyundua torome la Mosis aa nao dawii nii ta la nɛɛ Korowii che dɛ tomɔ.

³⁶ Mosis ɛ nyokpowaa Ijipt harɛ ta mɔɔ dɛ kpɔ o nɛra le bela, dɛ ɛ nyokpowaa Mposwɛm la ta bene fifraanaarɛ baa dia pua hɛŋle ɡbo harɛ ta la bwa ta.

³⁷ Mosisii ŋɔ nɛra la be ŋɔ Korowii ɛɛ tomɛ o keame bɛlee ba be ɡɛ waa tomɔ la, dɛ ŋɔ wɛɛ le ba dwee taa.

³⁸ A ɡɛ Mosis nɔ ne ya naawa ne nyundua torome waa bol waa o be Sinai Bwejen ta laanee fa dɛ cheme pua hɛŋle ɡbo harɛ la ta. Belaa Korowii kpɔ o waa aa wola ɡarɛ, aa wola tonɛ ɡe la, tɛo ŋɔ ó ba ŋɔ ya be.

³⁹ Kɛ ya naawa ŋɔ baa o waa no, dɛ vɛh o nɛɛ teŋa dɛɛ wi Ijipt harɛ wa.

⁴⁰ Ba ŋɔ Arɔn be ŋɔ ó kwaa voɡa tɛɛ ba ásɛ a tɔ ba sie. Dɛ ŋɔ ba ta wone jemɛ kon la aa ɛ Mosis waa tɔ ba sie le Ijipt harɛ ta la.

⁴¹ Belaa ba ma voɡ bɛl kɛŋɔ nabii ken, dɛ kpoo kwaa dɛɛ tɛo, dɛ koh kon la ba ɡbaɡba aa maa la waa di kwa, dɛ sa dɛɛ lɛ ba sie.

⁴² Asɛ Korowii berɛ habɔɔ kpo ba, dɛ ɡel baa ɛ ba tetoowaa dɛɛ tomɛ wee ne korobie ne weweela aa lɔ nyundua la. Gɛɛ ba chwerɛ Korowii Keamere Tɔn ta la ŋɔ, ‘Israel tena, he fa aa lɔ pua hɛŋle ɡbo harɛ ta bene lafraanaarɛ la, menee he fa kpoo kondɛɛra dɛɛ tɛ la aa?

⁴³ Voɡ Molɛk la dea ne wewee haa mao dɛɛ tomɔ dɛɛ yerɔ Refan la laa he che dɛɛ ɡaaɡe la aa? He ɡbaɡbaa fa ma a ɡɛ voɡa nɔ dɛɛ toma. Anomanta, mɛɛ lawɛ heyaa kaa Babelɔn harɛ ta dɛ́ kaa he ne bojaŋ.’

⁴⁴ Ya naawa aa lɔ pua hɛŋle ɡbo harɛ ta la, dɛ ba dɔ tɔne ane baa dɛ baŋra kɛŋɔ dea ken, asɛ a ɡɛ dea la ɛ Korowii Dea Cheremibɔr. Gɛ Korowii aa baɡle Mosis laanee ba kwaaro.

⁴⁵ A ɡɛ Korowii Tɛnte Dea nɔ baa kpɔ tɔne baŋro nɔ baa di ya naawa nɔn ta saŋ bɛl. Ba ɡe naanaree serewa dɛ kpɔ tɛɛ ba. Ba ne Josua aa dɛ valɛ la bwa, dɛ ba cheɡɛ a ɡɛ debaŋre la tɔne. Baa dɛ kaa la bwa dɛ Korowii dɛ doŋi nɛra baa lɔ ba sie bwɛɛre la ta la asɛ baa so a ta. Gɛɛ dea la do ba be ka tel saŋ la Devid aa baa di kora la.

⁴⁶ Dɛ Korowii dɛ nyin Devid wa. Dɛ Devid dɛ nyin o ma dea ásɛ o ɛ Korowii o naa Jekɔb fa aa dɛ tomɛ la dea. Belaa o soŋe Korowii ŋɔ ó tɛo ŋwɛnɛ ásɛ o ma a ɡɛ dea la.

⁴⁷ Korowii ta on a ɡɛ ŋwɛnɛ tɛɛ. Devid bie Solomɔnee bera ba ma Korowii Dea la.

⁴⁸ Gɛ Korowii keame la aa baɡla la, Nemenɛ Korowii aa deene nɛwɛnyini aa maa la ta so. Korowii keame baɡle ɡɛ Korowii aa ŋɔa ŋɔ,

⁴⁹ ‘Nyunduaa n kara, asɛ harɛ ɡee n natiɡribɔr. Debesoo siwii hɛɛ ba wona ma ń jo o ta nɔ? Debesoo taa ń won jo dɛ́ chɔ onɔɔ?

⁵⁰ N ɡbaɡba laa ta kwaa nɔ bwa kɛɛ?’ ”

⁵¹ Asɛ Steeven ɛɛ bol waa dɛ ŋɔ, “Deŋnekpeɡ tena, ɛrɛɛ he bambili do kpeɡri kɛŋɔ nɛra baa wola Juu tena ɛɛ nɔɔ? Ɛrɛɛ haa wola Korowii Waa no ken? He ne he naawa bwa beŋkpoŋ, haa Korowii Domadɛɛɡe la waa nyin dɛ́ no saŋ te bɛlbwa.

⁵² Korowii keamere la bini ume nɛɛ he naawa aa wola cheɡɛ dɛ ɛo saɡasaɡa nɔ? Ba ta nɛra Korowii aa toma ŋɔ bá ba bol o Bonɔɔ la bala waa la kpooraa? Waa bala la, he ɡe ta on yoɡe dɛ kpoo wa aa?

⁵³ He nɔn taa nyundua toroma kpɔ Korowii Mmarare la ba do, kɛ he ta a ta teŋɛ!”

Ba foɡre Steeven bwea

⁵⁴ Nomonome la aa no ɡɛ Steeven aa bola la, dɛ ba baah diu, baa pwee dɛɛ chwee bobɛlbwa.

⁵⁵ Korowii Domadɛɛɡe aa soɡe Steeven nɛɛ kpeɡri nɛɛ nomanta, o nyiŋi nyundua dɛ na kɛŋɔ bɔr aa chaahna werwer ken Korowii be. Asɛ o na Yeesu cheɡa nomombɔr Korowii diɡ ta bela,

⁵⁶ asɛ o ŋɔ, “Hé na! N na nyundua aa pila asɛ Nɛn Bie la che nomombɔr Korowii diɡ ta bela!”

⁵⁷ Belaa nomonome la nyɛɡ o nɛɛ bab! Dɛ kpɔ nɔɔra tɔɔɡe ba deŋna dɛ́ bɛ o wobol la no kpa. Buɡ la ta, dɛ ba bwa lɔɔ ba tɔ o nɛ,

⁵⁸ dɛ tuuɡu le bwɛɛ la dahara. Nɛra baa no o wobol la foo ba laala bil bonɔɔ bɛl baa dɛ yerɔ Sɔɔl sie mɔɔ, dɛ la ka foɡre Steeven bwea.

⁵⁹ Baa dɛ foɡro bwea la, dɛ o yerɛ Yeesu, dɛɛ ŋɔ, “N Dɔɔ Yeesu, n kpɔ n lileo dɛɛ do he nɔn ta dɛ́ sewɛ!”

⁶⁰ Belaa o ɡuŋi harɛ dɛ bol waa takpeɡ ne ŋɔ, “N Dɔɔ, bɛ ɡel a ɡɛ wechɔɡa nɔ ɡure ba nɛ.” Waa ŋɔ ɡɛ tonɛ, o den sewɛ.