We-ɛɛla 5 - mzwDBL

Ananias ne o haah Safaera

¹ Dɛ baa bɛl sɔne Ananias, o haah ɡe sɔne Safaera. O ne o haah yoɡ ba harɛ bɛl,

² asɛ ba nyoa pɛ o kpɔ suuɡa la ane sɔh, dɛ kpɔ a kabora ba tɛ Yeesu toroma la.

³ Belaa Pita bɔɔro ŋɔ, “Ananias, ɛrɛɛ he ɡel Bɔnsam won neɡre dɛ ɡel he ba neɡre Korowii Domadɛɛɡe la, dɛ kwaa he suuɡa la pera sɔh nɔɔ?

⁴ Haa wola harɛ la yoɡe mɔɔ la, dɛ hen dɔ he kon. Haa yoɡu tonɛ la ɡe la, dɛ suuɡa la ɡe ɛ he kwa. Aah dɛ bɔkwaa ɡela he ɛ ɡɛ nɔɔ? Nɛwɛnyini laa he neɡre nɔ. Korowiirii he neɡre la!”

⁵ Ananias aa dena no waa nɔ la, o den chole, dɛ sewɛ ɡe. Nɛra baa no a ɡɛ waa nɔ la bwa ɔmɔ kɛrɛdɛ.

⁶ Belaa bonɔɔna bane ir dɛ ba vɔrɔwo, dɛ cheo le buse, dɛ ka huɡo.

⁷ A ta biɡre o haah ɡe den ba, dɛ waa jemɛ kɛŋɔ waane ɛ o jaa.

⁸ Anee Pita bɔɔro ŋɔ, “He ne he jaa harɛ la haa yoɡa la, o suuɡa bwaa nɔ naa?” Asɛ haah la sɛh ŋɔ, “Ɔɔh, a bwaa.”

⁹ Belaa Pita pɛɛro ŋɔ, “Ɛrɛɛ he ne he jaa nyoa pɛ asɛ he daah Korowii Domadɛɛɡe dɛɛ na nɔɔ? Bonɔɔna baa kaa huɡe he jaa laanee tel doonyoa la. Baa che he ɡee le buse.”

¹⁰ Buɡ la ta, o ɡe den chole chɔ Pita sie bela, dɛ ɡe sewɛ. Bonɔɔna la aa bala dɛ o ɡe sewɔ, asɛ ba cheo le buse dɛ ka huɡo o jaa jwɛh.

¹¹ A ɡelɔ asɔre tena la bwa ne nomɛlbwa waa no a waa ɔmɛ taeh.

Gɛ Yeesu toroma aa ɛ wekpeɡa ne nyokpowa

¹² Dɛ Yeesu toroma la dɛ ɛ wekpeɡa ne nyokpowaa nɛra la bini. Dɛ asɔre tena la dɛ cheme Korowii Dea la dahara bobɛl baa dɛ yerɛ bela Solomɔn Pato la ta.

¹³ Dɛ nɛra baa wola Yeesu waa yarada la dɛ kpɛɛ ba kɛrɛdɛ. Kɛ dɛ ba dɛ ɔmɛ kɛŋɔ bá ba puu ba dɛɛ so Solomɔn Pato ta bela.

¹⁴ Dɛ balaa nɛra ɡe den na dɛɛ ba, dɛ baa ja ba nɛ. Dɛ ba bini baala ne haahna bwaa dɛɛ ba, dɛ kpɔ ba te tɛ Yeesu.

¹⁵ Nɛra koh Yeesu toroma la toma baa dɛ ɛ la wa, dɛ che weela tena ne ba mpare ne ba kalaŋre ba bil ŋwɛnɛ nyoa, ásɛ dɛ Pita ba dɛ kaa laa, o lileo dawɛ bane nɛɛ ásɛ ba ɡbaŋre.

¹⁶ Asɛ nɛra le Jerusalam bwɛjeɡre la ta dɛ ba pirim, dɛ che weela tena ne nɛra kwaa aa dɛ ir ba nɛɛ bwa ba, asɛ ba bwa dɔ bokpeɡa.

Ba lawɛ Yeesu toroma do dea

¹⁷ Kɛ Sɔfonomoa la ne o nɛra baa ɛ Saduki tena la bwa aa na toma Yeesu toroma la aa dɛ tomɛ la, a ɛɛ ba bɔweela kohona,

¹⁸ asɛ ba ir kpɔ ŋwɛnɛ bɛl dɛ lawɛ Yeesu toroma la do dea, bela baa dɛ do nɛra bwa la.

¹⁹ Awola jwaana la, Korowii nyundua torome bɛl baa ya dea la ɡbera, dɛ le Yeesu toroma la ne buse, dɛ ŋɔ ba be ŋɔ,

²⁰ “Hé la ka che Korowii Dea la bini dɛ́ ka bol Yeesu ŋwɛnɛfale nɔ waa bwa nɛra be.”

²¹ Yeesu toroma la no nyundua torome la waa la, asɛ tɔ aa pera chɔmbibi ne la, ba ka jo Korowii Dea la bini dɛɛ bol Yeesu waa la. Awola chɔɔ ne la, Sɔfonomoa la ne o nɛra yerɛ Juu tena nomonome la bwa dɛ ba cheme, dɛ tomɛ nɛra ŋɔ bá la dea la baa lawɛ Yeesu toroma la do la bini, dɛ́ ka lee ba ba.

²² Toroma la aa la dea la bini la, ba ta Yeesu toroma la ka nae, dɛ berɛ ba nomonome la be dɛ ba ŋɔ,

²³ “Yaa la bela dɛ koŋkarɛre baa kpɔa karɛ ɡbeni la ta lɔ a ta, dɛ nɛra baa dɛ nyiŋi doonyoone la ta la ɡe cheɡɛ bela. Kɛ yaa ya ɡbeni la la, ya ta nomɛlbwa nae dea la bini!”

²⁴ Sɔfonomonome la ne nomoa waa chɔ nɛra baa dɛ nyiŋi Korowii Dea doonyoo nyoa la aa no a ɡɛ waa nɔ la, a ɛɛ ba anebɛlbwa. Ba ta wone jemɛ waa la mun.

²⁵ Belaa baa bɛl ba dɛ ba ŋɔ. “Hé no bonɔ! Nɛra la haa do ba dea laanee lɔ Korowii Dea dɛɛ baɡle nɛra Korowii Waa la!”

²⁶ Asɛ nomoa waa chɔ nɛra baa dɛ nyiŋi Korowii Dea doonyoo nyoa la ne o nɛra la dɛ ka lawɛ Yeesu toroma la ba. Dɛ ba dɛ ɔmɛ kɛŋɔ dɛ ba kpɔ kpeɡri laɡ ba aa, ba bwɛɛ tena la baah ɛɛ diu bá ta bwea foɡ ba. Anomanta, ba laɡ ba kaa jeiih ken.

²⁷ Ba ba Yeesu toroma la ne dɛ ba ɡel ba che Juu tena nomonome la baah ta, asɛ Sɔfonomoa la bɔɔ ba ŋɔ,

²⁸ “Yaa kah heyaa ŋɔ he bɛ too ɡel ya na heyaa hɛɛ bol baa nɔ waa la, ɛrɛɛ he berɛ dɛɛ ɛ ja nɔɔ? Hé nyiŋi na kɛŋɔ haa bol o waa a perɛ Jerusalam bwa ɡɛ! Ɛrɛɛ he chaa o seo waa dɛɛ choɡ yaa ŋɔ yan ɡela ba kpoo nɔɔ?”

²⁹ Belaa Pita ne o bala troma la ŋɔ, “Korowii chɛ kɛŋɔ ya ɔmɛ ɡwaa nɛwɛnyini.

³⁰ Korowii la ya naawa aa dɛ tomɔ laanee ir Yeesu la haa kpaaro pɛl daɡaɡre ta dɛ kpoo la.

³¹ Korowii iru seo ta dɛ kpɔɔ ka so nomombɔr o diɡ ta, dɛ ɛo nɛra bwa Sitɔɔ ne ba Lɛɛ, asɛ dɛ koh o waa dɛ kpɔ Israel tena baa charɛ ba liire le ba wechɔɡa ta la wechɔɡa kɛ ba.

³² Nae yaa na waa nɔ la waa yaa di a danseɛ la. Korowii Domadɛɛɡe waa kpɔa tɛ nɛra baa dɛ teŋɛ o ŋwɛnɛ ta la ɡe cheɡɛ ya nɛɛ dɛɛ di waa nɔ danseɛ.”

³³ Nomonome la aa no Yeesu toroma la waa nɔ la, ba bwaawee iro kohona, ba fe ɛɛ nyin kɛŋɔ ba kpoo ba.

³⁴ Dɛ Farisii te bɛl lɔ bela baa yerɔ Gamaleɛl. Dɛ o dɛ baɡle nɛra Mosis Mmara, nɛra bwa ɡe ɛɛ tɛo duure. O iro che ba baah dɛ ŋɔ bá le Yeesu toroma la ne buse tama.

³⁵ Anee o ŋɔ nomonome la be ŋɔ, “Yabala Israel tena, hɛ́ɛ do nɛra nɔ dɛɛɡɔ kɛrɛdɛ.

³⁶ Baa la baa dɛ yerɔ Teɔdas fa aa bala dɛ ba kpɔ o te ɛ nɛnjen la, nɛra dɛ ɛ lafraanaarɛ fa ta o nɛɛ teŋaa? Baa kpoo la, o habɔɔ tena la bwa ta lɔe peɡre, asɛ o waa waa kpoŋa dɛɛ ɡaaɡe la bwa sɔɔh naa?

³⁷ A habɔɔ la, Galilia te baa dɛ yerɔ Judas la fa ta leɛ a ɡɛ saŋ baa dɛ kure nɛra la, dɛ ɡe ba yo Abane nomonome dɛ dɔ nɛnlaa kohona naa? Ba ta o ɡe kpoe asɛ o nɛra la ɡe bwa peɡre aa?

³⁸ Anomanta, n poo heya, he bɛ nɛra nɔ wobɛlbwa ɛ. Hé ɡel ba jeiih ken. Dɛ ba ɡbaɡba liire ne ba bokpeɡa binii baa ɛ ba waa nɔ naa, ba waa nɔ ɛɛ sɔɔhnoo.

³⁹ Kɛ dɛ Korowii be ɡee a le aa, ate haa won sɔɔh ba waa nɔ nyoa. He ta kɛrɛdɛ nyiŋaa, Korowiirii hɛɛ yo laa la oo!” Nomonome la teŋɛ Gamaleɛl waa la ta.

⁴⁰ Ba yerɛ Yeesu toroma la jo dea, dɛ lɔɔ ba chweremi ne, dɛ kwaa aah ba ŋɔ ba bɛ too kpɔ Yeesu sɔn bol waa kpa, dɛ kpɔ ba ta.

⁴¹ Baa le nomonome la be, dɛ ba sie lɛo kohona kɛŋɔ Korowii aa tɛɛ ba sɔn dɛ ɡel ba ɡe maɡa nɔ dɔŋ won koh Yeesu waa dɛ di sihiih ne weweele la.

⁴² Anomanta, tɔpere te bɛlbwaa baa bol Amanesoma la Korowii Dea la bini, ne nɛra deremi kɛŋɔ Yeesuu Kristo la Korowii aa baɡɛ nyoa ŋɔ wɛɛ tomɔɔ ásɛ o ba lɛ o nɛra la.