We-ɛɛla 4 - mzwDBL

Ba lawɛ Pita ne Jɔn ka che nomonome sie

¹ Pita ne Jɔn aa cheɡa dɛɛ bol waa nɛra la be la, sɔfore bane ne nɛra baa dɛ daah Korowii Dea la nomoa ne Saduki tena bane balɔ. Dɛ Saduki tena la aa yarada kɛŋɔ nɛra bwa ɛɛ ir seo taa tɔpebɛl.

² Ba baah diu kɛŋɔ Pita ne Jɔn aa dɛ bol nɛra la be ŋɔ Yeesu ir seo ta la. A ɡɛ la baɡlɔ kɛŋɔ serewa ɛɛ ba ir seo taa.

³ Anomanta, ba lawɛ Pita ne Jɔn ka do dea ásɛ bɔr chaah mɔɔ, dɛkalkɛŋɔ ɡɛ saŋ baa laɡ ba la, dɛ jɔmɔraa.

⁴ Nɛra baa lɔ bela dɛɛ no waa la dɛ yaradaa warɔ. Dɛ baala baa yarada waa la lɔ nɛra kaɡboŋa banue.

⁵ Tɔ aa pera la, Juu tena nomonome, ne bwɛɛ nomonome, ne Tɔnjerema bwa cheme Jerusalam.

⁶ Ba ne Sɔfonomoa Anas ne Kaefas, ne Jɔn, ne Alɛksanda ne Sɔfonomoa dea nɛra la bwaa chema.

⁷ Asɛ ba kpɔ Pita ne Jɔn ba che nɛra la baah ta, dɛ bɔɔ ba ŋɔ, “Kpeɡri besoo he dɔ dɛ ɛ ɡɛ nɔɔ? Ume sɔn taa he che ɛ ɡɛ waa nɔɔ?”

⁸ Belaa Korowii Domadɛɛɡe la ir Pita nɛɛ kpeɡri nɛ, asɛ o ŋɔ ba be ŋɔ, “Bwɛɛla sitɔɔla ne nomonome,

⁹ dɛ bɔɔraa hɛɛ bɔɔ yaa dɛ́ jemɛ ŋwɛnɛ la ta aa cheɡa ya won ɛ boobi nɔ wedɛɛɡe nɔ dɛ won chaoh weela aa,

¹⁰ amɔ te hé no, ásɛ Israel tena bwa no, kɛŋɔ Yeesu Kristo waa le Nasarɛt, haa kpoo daɡaɡre ta asɛ Korowii iru seo ta la, o sɔn kpeɡri taa a che baa nɔ waa cheɡa nɔ dɔ bokpeɡa la.

¹¹ Yeesu nɔ bwara waa ba baɡle Korowii Tɔn bini ŋɔ, ‘Bwe la he mamaala aa vɛoh dɛ liiru konsala laanee bera ba lawɛ dea la kpoŋe la.’

¹² Dɛ Yeesu laa aa, nomɛlbwa toole dɛ́ won lɛ yaa. Nomɛlbwa toole harɛ nɔ ta bobɛlbwa yá yerɔ o won lɛ yaa ka ja Yeesu nɛ.”

¹³ Dɛ Pita ne Jɔn aa tɔn jemɛ kohona bɛlbwa, dɛ ɛ nɛmpɛɛne baa wola Korowii waa hwele kohona bɛlbwa. Nomonome la aa na bambile la soo baa wona kpoŋe dɛɛ bol waa la, dɛ a ɛɛ ba anebɛlbwa. Belaa ba sie chaah ba nɛɛ kɛŋɔ ba fa teŋɛ Yeesu nɛɛ dɛɛ hwelu. An ɡela ba jemɛ waa dɛ dɔ bambile ɡɛ la.

¹⁴ Nomonome la ta berɛ won bol wobɛlbwa kpa, dɛkalkɛŋɔ dɛ ba ɡbabir na baa la baa chaoh la. Dɛ o cheɡɛ Pita ne Jɔn be.

¹⁵ Asɛ ba ŋɔ Píta ne Jɔn le dea la bini ka che dahara. Dɛ ba dɛ bɔɔ dɔŋa ŋɔ,

¹⁶ “Aah ɛrɛ tenee yaa ba baala nɔ ɛɛ yɔ? Jerusalam tena bwa nao dɛ jemɛ kɛŋɔ nyokpowaa ba ɛ ɡɛ nɔ. A te ta tɔŋla dɔe.

¹⁷ Hé ɡel ya aah ba ŋɔ ba bɛ wobɛlbwa bol Yeesu sɔn ta bobɛlbwa kpa, ásɛ waa nɔ bɛ won kaa bojaŋ kpa.”

¹⁸ Asɛ ba berɛ yer ba jo dea dɛ aah ba ŋɔ ba bɛ too bol wobɛlbwa bobɛlbwa Yeesu sɔn ta kpa!

¹⁹ Anee Pita ne Jɔn chaŋe ŋɔ, “Hé ɡbabir di kasinteŋ. He ɔma ne Korowii ɔma, amee maɡra Korowii be nɔ?

²⁰ Waa ya ɡbaɡba aa naa dɛ no la, yaa won ɡel a bola bwa!”

²¹ Belaa nomonome la kwaa aah ba kohona ɡwaa loɡla la, dɛ ɡel ba. Ba nao kɛŋɔ ba ŋɔ bá ham ba ŋwɛnɛ bɛlbwa ta naa, nɛra la aa ban sɛh,

²² dɛkalkɛŋɔ baa la baa chaoh la ɡwaa bene fifraanaarɛ o weela la ta, asɛ nɛra la bwa na ɡɛ baa chaoh la dɛɛ kooɡa dɛɛ jam Korowii.

Asɔre tena la wesoŋa

²³ Baa ɡel Pita ne Jɔn la, ba la ba bala la be dɛ ka baɡle ɡɛ Sɔfonomoa ne nomonome la aa bola la.

²⁴ Ba bala la aa no waa la, ba bwa pɛo soŋe Korowii ŋɔ, “Nemenɛ Korowii haa ɛ komɛlbwa dɔɔ, hen ta nyundua ne harɛ ne mpo ne kwaa aa lɔ a ta bwa!

²⁵ He cheɡɛ he Domadɛɛɡe ta dɛ ɡel ya naa Devid waa ɛ he bonɔɔ la ŋɔ, ‘Ɛrɛɛ harɛre nɛra baa wola Juu tena ɛɛ la lɛ ɡaeh, dɛɛ le jina dɛɛ koh ba te pɛɛ nɔɔ?

²⁶ Ba koranar kpɔ ba te, dɛ ir che dɛɛ vɔrɔwe Korowii ne o Kristo la vɔrɔwa.’

²⁷ Kpela ɡe, Hɛrɔd, ne Pɔnteɔs Paelet ne nɛra baa wola Juu tena ɛɛ, ne Israel tena bwa cheme bwɛjen nɔ ta. Ba yo Yeesu, he ɡbaɡba bonɔɔ waa wola wechɔɡe bɛlbwa dɔe la. Onee he ɛ he Kristo la.

²⁸ Ba bwa chemo dɛ ɛ waa he ɡbaɡba aa kpɔ he kpeɡri ne he tetoora vɔrɔwe ŋɔ aa ɛo la.

²⁹ N Naa Korowii, berɛ na ɡɛ baa dɔa aah he bonɔɔna, dɛ́ tɛɛ ba kpeɡri bá won bol he waa bansua bwa ne.

³⁰ Tɛɛ ba kpeɡri bá won dɛɛ chah weela, dɛ́ ɡel ba che he ɡbaɡba bonɔndɛɛɡe Yeesu nɛɛ dɛ́ ɛ wekpeɡa ne nyokpowa.”

³¹ Baa soŋe Korowii tonɛ la, dea baa lɔ o bini la jiɡro. Korowii Domadɛɛɡe baa so ba nɛ, asɛ baa bol Korowii Waa la bansua bwa ne.

Yeesu toroma nyina dɔe tɛ dɔŋa

³² Dɛ nɛra baa yarada Yeesu waa la dɛ ɛ asɔre tena la bwa dɔ nyopɛo ba liire bwa ɡe ɛ beŋkpoŋ. Bɛlbwa ta o ɡbaɡba kondɔɔla kpɔe ɛ o ɡbo kwa. Dɛ bɛlbwa dɔ kon aa, o dɔŋ konee.

³³ Kpeɡri tenten nee Yeesu toroma la di o seo ta ira la danseɛ. Asɛ Korowii cha ba, dɛ ɡel o nyanyini ba so ba nɛ kohona.

³⁴ Dɛ ba bɛlbwa toole aa noo, dɛkalkɛŋɔ dɛ banɔ la baa dɔ deene ne harɛre la dɛ yoɡa,

³⁵ dɛ kpɔ a suuɡa dɛɛ ba Yeesu toroma la be, asɛ baa bɔna ɡɛ aa chɛ kɛ bɛlbwa dɔ.

³⁶ Dɛ ba bini bɛl le Lewi dea, ba lolɔ Saepros, asɛ baa yerɔ Josef. Dɛ Yeesu toroma la dɛ yerɔ Banabas. O sɔn la munii “Nɛn waa dɛ do nɛra ɡbemba.”

³⁷ O kaa yoɡ o harɛ bɛl dɛ kpɔ a suuɡa ba tɛ Yeesu toroma la.