We-ɛɛla 3 - mzwDBL

Pita chah boobi bɛl waa dɛ soŋe kwa

¹ Awola bɛl, Pita ne Jɔn la Korowii Dea wekee saŋ. A ɡɛ saŋ nɔɔ nɛra la bwa cheme dɛɛ soŋe Korowii webaŋa.

² Baa kaa tel dea la doonyoa la baa dɛ yerɔ Doonyodɛɛɡe la ta la, dɛ baa bɛl soɡe bela. Dɛ a ɡɛ baa la soɡe boobi o bechale saŋ bwa. Asɛ tɔpere bwa ba yon cheo ka so a ɡɛ doonyoa bela o kaa soŋe suuɡa nɛra baa dɛ jo Korowii Dea bela la be.

³ Pita ne Jɔn aa dɛ ba dea bela joe la, o soŋ ba ŋɔ bá tɛo komɛl.

⁴ Belaa ba pa sie o be, asɛ Pita ŋɔ, “Nyiŋi yaa!”

⁵ Anee o nyiŋ ba dɛɛ lii kɛŋɔ baa tɛo komɛlee.

⁶ Belaa Pita ŋɔ, “N ta suuɡa dɔe dɛ tɛɛ, kɛ mɛɛ tɛɛ kon n ɡe aa dɔa laanee. Yeesu Kristo waa le Nasarɛt la sɔn ta, ir dɛ́ valɛ!”

⁷ Asɛ Pita lawɛ boobi la nɔndiɡ dɛ ɡɔɔro ir. Buɡ la ta, dɛ baa la nakpale ne o nalurumi denɔ do kpeɡri,

⁸ o chuɡri ir che o naa anɛ la ta dɛɛ valɛ, asɛ o ne ba jo Korowii Dea bela. O kpɔ silɛɛ dɛɛ valɛ dɛɛ sa, dɛɛ kpɛɛ Korowii.

⁹ Nɛra baa lɔ bela la bwa nao kɛŋɔ waa dɛ valɛ dɛɛ kpɛɛ Korowii.

¹⁰ Baa naa kɛŋɔ boobi la o fa aa dɛ soŋe kwaa Doonyodɛɛɡe la ta laanee dɛɛ valɛ la, ba nyoa kpoo ba chara jeɡre kɛŋɔ waa bera won ir che dɛɛ valɛ la.

Pita bol waa baɡle nɛra Korowii Dea

¹¹ Baa la toɔh pɛl Pita ne Jɔn, asɛ ba ne o ka tel Korowii Dea la bobɛl baa dɛ yerɛ bela Solomɔn Pato la, asɛ nɛra la aa nao la, ba nyoa kpoo, asɛ ba bwa chwa biribiri ken dɛ ba Pita ne Jɔn ne baa la be bela.

¹² Pita aa na nɛra la, o bɔɔ ba ŋɔ, “Yabala Israel tena, ɛrɛɛ waa nɔ kpo he nyoa hɛɛ nyiŋi yaa ɡɛ nɔɔ? He dɛ lii ŋɔ ya ɡbaɡba kpeɡri ta kɛɛ ya nɛndɛɛɡa ɛɛ kohona waa baa nɔ won ir che dɛɛ valɛ nɔ kɛɛ?

¹³ Gɛ laa. Korowii ya nabaala Abraham ne Aesek dɛ Jekɔb aa tomɔ la, on tɛ o bonɔɔ Yeesu sɔn ɡɛ la. Onee he kpɔ tɛ nomonome ŋɔ bá bol o waa dɛ kpoo la. Harɛ nomoa Paelet aa ŋɔa ó tao la, he ta ŋɔe ŋɔ haa sɛah?

¹⁴ Wechɔɡa bɛlbwa toole o nɛ, wedɛɛɡa ɡboo o ɛ. Kɛ he ŋɔ haa on nyin, dɛ ŋɔ nɛn waa dɛ kpo nɛra laanee hɛɛ nyin kɛŋɔ Paelet foo ta dɛ́ ɡelo.

¹⁵ Korowii nɛn nɛwɛnyini aa che o nɛɛ dɛ́ dɔ mkpa la, onee he kpo la, asɛ Korowii lawɔ ir seo ta. Ya na a ɡɛ waa nɔ. A danseɛ yaa di la.

¹⁶ O sɔnee ya yerɛ asɛ baa nɔ ɡbaŋre la. Yarada yaa dɛ yarada Yeesu la, a taa a che waa nɔ haa naa nɔ won ɛ la. O waa la yaa dɛ yarada la, a ɡbosoroo chah baa nɔ he bwa aa jemɔ nɔ la. He bwa ɡee naa kɛŋɔ o ɡbaŋrɔ.

¹⁷ Yabala, n jemɔ kɛŋɔ bɛ jemaa ɡela he ne he nomonome ɛ Yeesu waa haa ɛo la.

¹⁸ Korowii tɔ sie ɡel o keamere la bwa baɡle ŋɔ o Kristo la waa baɡɛ nyoa ŋɔ wɛɛ tomɔɔ ásɛ o ba lɛ yaa la dɛ́ ba waa nae. A ɡɛ waa la, kenii Korowii cheɡa a ba ɛ.

¹⁹ Anomanta, hé charɛ he liire le he wechɔɡa ta dɛ́ kpɔ he te tɛ Korowii ásɛ o kpɔ he wechɔɡa kɛ heya, dɛɛ tɛ heyaa bambisɔɔhna, dɛɛ do heyaa ɡbemba.

²⁰ Wɛɛ berɔɔ tomɛ Yeesu waa ɛ Kristo la he be. Onee o le ŋɔ ó ba lɛ heyaa la.

²¹ A chɛ kɛŋɔ Yeesu do nyundua dɛ́ ka tel tɔɔ la wee Korowii aa ɛ wobɛlbwa kɛrɛdɛ ken, ɡɛ waa ɡela o keamere la baɡle la.

²² Mosis baɡlɔ ŋɔ, ‘N Naa Korowii ɛɛ tomɛ o keamee ó ba bol o waa dɛɛ tɛ heyaa ɡɛ waa tom mɛ la. He ɡbaɡba dwee binii wɛɛ ba o lee. A chɛ kɛŋɔ hé cheɡ deŋne dɛ́ no o wobol, dɛ́ ɛ ɡɛ bwa waa dɛ baɡle.

²³ Nomɛlbwa waa wola o wobol noɛ la, baa pero le Korowii nɛra binii dɛ́ kpoo!’

²⁴ Korowii keamere baa dɛ baɡle Korowii waa la, le Samoɛl bere saŋ ne banɔ la baa teŋɛ o nɛɛ bwa, ba bwaa baɡle waa aa dɛ ɛ fini nɔ wa.

²⁵ Korowii nyoa la waa baɡa dɛ ɡel o keamere bol la, heyaa o baɡɛ tɛ. Fɔo la Korowii ne he naawa aa fɔwa la laworomɛɛ hɛɛ di la. O ŋɔ Abraham be ŋɔ, ‘He naanar nɛɛ aa ba cheɡa n swee andɛɛɡa tɛ harɛ ta nɛra bwa.’

²⁶ A waa Korowii le o Bonɔɔ la dɛ tɔ sie tomɔ he be, ásɛ o ba swee heyaa andɛɛɡa dɛ́ ɡel bɛlbwa charɛ o liire dɛ́ le o wechɔɡa ta la.”