We-ɛɛla 27 - mzwDBL

Pɔɔl jo stiimae bini kaa Rom

¹ Ba vɔrɔwɔ ŋɔ yá kpɔ nee ta kaa Itali harɛ bela Rom Koojen aa soɡa la. Anomanta, ba kpɔ Pɔɔl ne nɛra bane baa do ba ɡe dea ja o nɛɛ la tɛ Rom Koojen soojanomoa bɛl baa dɛ yerɔ Juleɔs la.

² Stiimae bɛl le Adramitium ba, asɛ ya jo o ta dɛɛ kaa. Dɛ o dɛ kaa Eesia harɛ mpo nyoa bwɛɛre ta. Dɛ baa bɛl baa dɛ yerɔ Aristakus ja ya nɛ. Makidoonia harɛ bwɛɛ Tesalonika la taa o le.

³ Tɔ aa pera laanee ya jo Sidon. Juleɔs kpoŋe Pɔɔl kɛrɛdɛ, dɛ tɛo ŋwɛnɛ ó ka na o daamanar, ásɛ ba tɛo kwaa aa chɛ kɛ o dɔ o ŋwɛnɛ la ta.

⁴ Ya cheɡɛ bela dɛɛ kaa, asɛ peu ka ta dɛɛ cheme yaa. Anomanta, ya berɔ kaa Saepros waa ɛ ekwi la baŋ bobɛl peu la aa wola bela te ta la dɛ kaa.

⁵ Ya kpɔ mpo ta ɡɛ dɛɛ la dɛ ka fɛrɛ Silisia ne Pamfilia jwɛh, dɛ ka chuɡe Maera waa lɔ Lisia harɛ ta la.

⁶ Belaa sooja nomoa la na Alɛksandrea tena stiimae bɛl waa dɛ kaa Itali harɛ, dɛ kpɔ yaa do o ta.

⁷ Ya kaalɔ tama tama ken tɔpera anɛ, mɔɔ dɛ ta ba tel Kenaedes, dɛkalkɛ dɛ peu aa yaa ŋwɛnɛ tɛ. Peu la aa wola ŋwɛnɛ tɛ la, ya pa sie Kret ne Salmone a bwa aa ɛ ekwie la baah ta, dɛ fɛrɛ Kret baŋ bela peu la aa wola bela te ta la dɛɛ kaa.

⁸ Yaa fɛrɛ Kret harɛ baŋ pera bela kaa la, a no yaa kɛrɛdɛ, asɛ ya ba le leebɔɔ bɛl o ne Lasea aa wola jaŋɛ, baa yerɛ bela Leebɔdɛɛɡe la.

⁹ Yaa biɡri ŋwɛnɛ ta kohona la nomanta, ya ne leebɔdɛɛɡe tela dɛ ya Juu tena tɔpejen yaa dɛ vɔwɛ nyoa o ta la ɡarɔ. Gɛ tɔpere nɔ ɡe ɡaraa, dɛ ɡɛ mpo la ta vala aa were. Anomanta, Pɔɔl ja ba ŋɔ,

¹⁰ “Bwɛɛla, n nao kɛ le bonɔ dɛɛ kaa la, ya ŋwɛnɛ nɔ aa werii do tɛ yaa. Ya dɛ la naa, yaa ka na siswɛmee, asɛ ya ne ya stiimae nɔ ne ya bone nɔ ka nee ta.”

¹¹ Pɔɔl aa bol ɡɛ la, sooja nomoa la ta o be noɛ. O teŋɛ nɛn waa dɛ valɛ stiimae la ne, ne stiimae te la nyoa wobol ta.

¹² Leebɔdɛɛɡe leebɔɔ bela aa were ne stiimae la cheɡa peujena la saŋ. Ba ŋɔ stiimae leebɔdɛɛɡe lɔ Kret harɛ bwɛɛ bɛl baa dɛ yerɔ Finiks la ta, anomanta, ba kɛrɛdɛ ŋɔ bá takapɔ so stiimae la bini tama tama dɛɛ la bela dɛ́ ka so bela, ásɛ peujena la saŋ kaa mɔɔ. Dɛ Finiks leebɔɔ la chɔɔ kɛ korobifale ɡuri aa do ɡɛ la, asɛ o harɛ la nyoa bɛl sie chaɡɛ wee cholibɔr diɡ pera, asɛ bɛl ɡe chaɡɛ wee cholibɔr ɡal pera.

Peuchɔɡe aa ta mpo sie wa

¹³ A ta biɡre dɛ peujeɡa bɛl tao le weekaŋle harɛbɔr dɛɛ ba, asɛ ba lii kɛ baa wonoo kaa ɡɛ ba fe aa liira wubwa la. Ba laa ba stiimae la buni baa kpɔa do nee bini dɛ ɡel stiimae la ɛɛ che la kpɔ dɛ fɛrɛ Kret harɛ dɛɛ kaa.

¹⁴ A ta biɡre bɛlbwa, asɛ bela peuchɔɡe bɛl o yon le wee leebɔr ɡal pera dɛɛ ba la ir kpeɡri nɛ, dɛ le Kret harɛ dɛ ta dɛɛ ba mpo ta.

¹⁵ Peu la aa taa dɛ ba lɔ yaa la, ya lawɛ ya stiimae la nyoa kahonɛ. Dɛ stiimae la aa wone dɛɛ kaa sie kpa, dɛ den dɛɛ kaa bela peu la aa taa chaɡɛ la.

¹⁶ Ya baa tel ekwi bɛl baa dɛ yerɔ Kaoda la weekaŋle harɛbɔr, asɛ o tɔ yaa bɔr peu la be tama, kɛ dɛ o ta dɛ vuuɡi yaa te.

¹⁷ Ya bwara nyɛɡɔ mɔɔ ba ta won ɡɔɔ ɡberjeɡa waa pɛl ya stiimae la do ya stiimae la bini, dɛ kwaa stiimae la ŋwɛɛra vɔrɔwe kɛrɛdɛ. Ba chweeh stiimae la ŋwɛɛra aa lɔ o keŋkeŋni la, asɛ a hamɛ kiŋkiŋ. Dɛ kechɛ bɛl lɔ bela baa yerɔ Sirtis, asɛ baa ɔmɛ kɛŋɔ peu la ɛɛ taɡ baa kaa bela ásɛ ba ka bela. Anomanta, ba ba stiimae la yajen la aa lɔ o doa la ne harɛ, asɛ peu la taɡ ba dɛɛ kaa.

¹⁸ Tɔ aa pera la, dɛ peu la ta dɛ ta kohona. Anomanta, ba pa stiimae la bini bone ane viɡri, ásɛ o fɛɡre.

¹⁹ Tɔ aa pera ja la, ba ɡbaɡba pa stiimae la laala ane ta.

²⁰ Tɔpera aŋwɛnɛ bwa dɛ yaa wee na, yaa weweela ɡe na, asɛ peu la ɡe na dɛɛ ta kpeɡri nɛɛ ɡɛ. Ate, dɛ yaa ya nyuune te waa lii kɛŋɔ yaa ɛ nɛraa kpa.

²¹ Baa lɔ ɡbera la bini biɡri baa wola kondikwaa dii la, Pɔɔl iro che dɛ ŋɔ ba be ŋɔ, “Yabala, maa ŋɔa ya bɛ Kret le la, a chɛ kɛ he fe no n kon ta. Laala aa chɔɡa ne anɔ la haa paa ta nɔ, a fe ta ɡɛ balɛ.

²² Kɛ he bɛ ɔmɛ. He bɛlbwa aa sewa ba. Stiimae nɔ ɡboo dɛɛ ba chɔɡa.

²³ Waa aa ɡela n ŋɔ ɡɛ laanee kɛ, dɛ jwaana ne la, Korowii waa dɔɔ mɛ dɛ ɡel mɛɛ ɛ o toma la, o torome ba n be,

²⁴ dɛ ba ŋɔ n be ŋɔ, ‘Pɔɔl, bɛ ɔmɛ! Hɛɛ la Koojen Siisa bee. Nɛra la bwa he ne baa dɛ valɛ nɔ, Korowii noɔ tɛɛ. Wɛɛ lɛɛ baa.’ ”

²⁵ Pɔɔl aa bol ɡɛ la, o ŋɔ ba be ŋɔ, “Anomanta, he bɛ ɔmɛ, dɛkalkɛ n dɛ yarada Korowii. N jemɔ kɛŋɔ ɡɛ waa bola la, ɡɛɛ aa ba ɛɛ.

²⁶ Kɛ peu nɔ ɛɛ taɡɛ yaa ka ta ekwi harɛ bɛl ta.”

²⁷ Tɔpere waa teŋa fi dɛ anaarɛ la harambaŋa ne la, dɛ peu la tao dɛɛ taɡɛ yaa ɡɛ. Dɛ ya lɔ mpo la baa dɛ yerɔ Mɛdetereenea la ta. Dɛ stiimae la tom-ɛɛra la liire ɛɛ ba kɛŋɔ ya ken dɛ tel harɛ bɛl ta.

²⁸ Anomanta, ba maɡɛ nee la dɛ na kɛŋɔ o luŋri tel naɡale fifraanaarɛ. Aa ɛ tama la, ba berɔ maɡɛ na ja, dɛ na kɛŋɔ o luŋri tel naɡale fifraatoro.

²⁹ Dɛ ba dɛ ɔmɛ kɛŋɔ ya stiimae la ɛɛ chuɡe bwea anee dɛ́ peɡri, dɛ koh a waa ɡɔɔ o bune anaarɛ bwa do nee ta stiimae la mun ta. Dɛ ba dɛ soŋe Korowii ŋɔ bɔ́r chaah warane.

³⁰ Ate, dɛ stiimae tom-ɛɛra la fe dɛ nyin bɔr dɛ́ le o bini dɛ́ chwa. Ba pur o ɡberjeɡa la do nee ta, dɛ teŋe nyosone ŋɔ ba fe dɛ la ka kpɔ stiimae la sie dɛ́ ka tɛr o bune ŋwɛɛra ane do nee ta.

³¹ Belaa Pɔɔl ŋɔ soojanomoa la ne soojare la be ŋɔ, “Dɛ stiimae tom-ɛɛra nɔ ta o bini soɡaa, he bɛlbwa aa he nyuu dɔ.”

³² Asɛ soojare la chaa ŋwɛɛra aa vɔwɛ ɡberjeɡa la pɛl stiimae la, dɛ ɡel o kaa.

³³ Tomun aa ba dɛ kpɔ la, Pɔɔl soŋ ba ŋɔ bá bwa di kwa, dɛ ŋɔ, “He tɔpera fi dɛ anaarɛɛ nɔ he tea bini aa chɔɡa he so dɛɛ kpa waa aa dɛ ba chiɡa, haa wola kwaa dii.

³⁴ N poo heya, hé di kwaa tama, dɛ́ won yo lɛ he nyuune. Haa waa nɔ nyoa kae ba. Wobɛlbwa aa he bɛlbwa ɛɛ ba.”

³⁵ Waa ŋɔ ɡɛ la, o kpɔ paanoo dɛ jam Korowii ba bwa siwi ta, dɛ mɔn dɛ di.

³⁶ Waa ɛ ɡɛ la, ba bambile ba harɛ, asɛ ba dɔ ɡbemba dɛ won di kwa.

³⁷ Dɛ ya bwa lɔ nɛra lafraanɛ fifraanuanɛ dɛ nɛra banumɛl.

³⁸ Yaa di kwaa vaɡre ɡɛ yaa dɛ nyin la, ba ɡɔɔ men baa kpɔa dɛɛ ɛ paanoo la ta mpo la ta, ásɛ stiimae la do fɛɡre.

³⁹ Tɔ aa pera la, stiimae tom-ɛɛra ta wone jemɛ harɛ la yiso baa tel o ta. Ba na leebɔjen bɛl, dɛ na o nyoa bwea ne hɛŋle, dɛ ɛ ba liire kɛŋɔ dɛ aa maɡroo waa, baa kpɔ stiimae laanee chaɡɛ leebɔɔ la ta.

⁴⁰ Ba chaa stiimae la bune la do mpo la bini. Dɛ ba fe vɔwɛ stiimae la ŋwandaa ɡe dɛɛ pɛlo, kɛ ba pur a ɡe, dɛ paɡri stiimae la sie yatɔɡ waa saɡɛ nyundua la, asɛ peu taɡɛ stiimae la dɛɛ kaa bela o sie aa chaɡa la, dɛ taɡɔ ka chuɡe.

⁴¹ Stiimae la kaa chuɡe hɛŋle ane ta asɛ o sie la karɛ che a ta dɛ kaa kahonɛ. Waa cheɡɛ bobeŋkpoŋ ɡɛ la, dɛ nehɛma dɛ lɔ o habɔɔ la kohona. Nehɛma la paɡre o habɔɔ la bwa.

⁴² Soojare la fe vɔrɔwɔ ŋɔ baa kpoo nɛra baa do ba dea dɛɛ kaa ba ne laanee, dɛ ŋɔ a waa laa aa, baa wa nee le dɛ chwa kaa.

⁴³ Dɛ ba nomoa la aa Pɔɔl kpoe nyin dɛ koh o waa ŋɔ bá ɡel ba. O ɡelɔ nɛra baa jemɛ nee la tɔ sie le nee dɛ wa kaa baŋ,

⁴⁴ asɛ ba kar la dawɛ dapɛɡre ne stiimae la puɡrere ta dɛ wa le. Kenii ya bwa ɛ dɛ le.