We-ɛɛla 22 - mzwDBL

¹ “N mɛɛwa ne n dɔɔranarwa, hé do deŋna n be ásɛ n bol n kon hé no.”

² Baa noa kɛŋɔ ba ɡbaɡba wobolee wɛɛ bol ba be la, ba tɔ nyoa jeiih ken, asɛ Pɔɔl ɛɛ bol o wa, dɛ ŋɔ,

³ “Juu tee men. Silisia harɛ bwɛɛ baa dɛ yerɔ Taasos la taa ba lol mɛ. Kɛ bwɛjen Jerusalam bonɔɔ ba dɛɛ mɛ, asɛ Gamaleɛl chaɡ mɛ kwa, dɛ baɡ mɛ ya naawa kii bwa, asɛ mɛɛ teŋɛ a ta. N sie beɡrɔ mɛɛ tomɛ Korowii ɡɛ he bɛlbwa aa dɛ tomɔ fini nɔ.

⁴ Dɛ n fa cheɡɛ nɛra baa teŋɛ ɡɛ ŋwɛnɛfale nɔ ta nɔ nɛɛ dɛɛ nyin ba dɛ́ kpo, dɛ lawɛ ba baala ne haahna bwa do deene.

⁵ Sɔfonomoa ne ya Juu tena nomonome bwa ɛɛ wonoo di danseɛ kɛŋɔ kpelaa n ŋɔ. Banee fa chwerɛ tɔne tɛ mɛ, ásɛ n won kpɔ la yabala Juu tena baa lɔ Damaskɔs la be, ásɛ ba tɛ mɛ ŋwɛnɛ ń won lawɛ ŋwɛnɛfale la tena baa lɔ bela, dɛ́ kpɔ ba ba Jerusalam ásɛ ba ka ɛɛ ba wahala.

⁶ Maa dɛ la dɛ ka tel Damaskɔs la, kerabeŋkpoŋ dɛ nii le nyundua dɛ chaah n nɛɛ kohona dɛ bar mɛ cheme. Dɛ wee cheɡɛ nyufala.

⁷ Belaa n chole harɛ. Maa chola la, n no taa bɛl o ŋɔ n be ŋɔ, ‘Oo, Sɔɔl! Ɛrɛɛ he che n nɛɛ ɡɛ nɔɔ?’

⁸ Belaa n ŋɔ, ‘Henee umeo, n Dɔɔ?’ Asɛ o ŋɔ, ‘Menee Yeesu waa le Nasarɛt la. Menee hɛɛ yo la.’

⁹ Dɛ n ne nɛra banee dɛɛ kaa. Ba na nii la te, kɛ ba ta naate waa dɛ bol waa n be la wobol te noɛ.

¹⁰ Belaa n pɛɛro ŋɔ, ‘N Dɔɔ, ɛrɛɛ mɛɛ ba ɛɛ yɔ?’ Asɛ o ŋɔ n be ŋɔ, ‘Ir la Damaskɔs ásɛ Korowii ka baɡle waa waa dɛ nyin kɛ he ɛ.’

¹¹ Nii la aa chaah n sie kohona la, a ɡelɔ n nyoŋe. Anomanta, nɛra n ne baa dɛ kaa laanee bera laɡ mɛ da dɛ ba n ne Damaskɔs.

¹² Damaskɔs bela la, dɛ baa bɛl lole baa yerɔ Ananias. Dɛ o ɛ nɛn waa dɛ tomɛ Korowii kɛrɛdɛ dɛɛ teŋɛ Mosis Mmara la ɡe ta kɛrɛdɛ, asɛ Juu tena baa lɔ bela la bwa ɛɛ tɛo duure kohona.

¹³ Ananias baa che n be dɛ ŋɔ, ‘N dɔɔ Sɔɔl, Korowii ɡel he sie pili.’ Buɡ la ta, dɛ n denɔ berɛ dɛɛ na, dɛ nao.

¹⁴ Asɛ o ŋɔ, ‘Korowii ya naawa fa aa dɛ tomɔ la, onee lee tɛ o te ŋɔ hé jemɛ waa waa dɛ nyin, dɛ́ won no o Bidɛɛɡe la ɡbaɡba wobol, dɛ́ nao ɡe.

¹⁵ O ɛ ɡɛ ásɛ he won di danseɛ tɛo nɛra bwa be waa haa naa bwa ta, ne waa haa noa bwa ta.

¹⁶ Anomanta, bɛ berɛ so kpa. Gel ba sɔe Korowii ne, ásɛ he yerɛ Yeesu sɔn dɛ́ soŋo ó kpɔ he wechɔɡa kɛɛ.’

¹⁷ A habɔɔ la, n berɔ kaa Jerusalam. Belaa n kaa soŋe Korowii o Dea bini dɛ na chaahna.

¹⁸ N na n Dɔɔ Yeesu, asɛ o ŋɔ n be ŋɔ, ‘Le Jerusalam warane. N waa nɔ haa dɛ di a danseɛ nɔ, Jerusalam tena aa a noe ba.’

¹⁹ Belaa n ŋɔ, ‘N Dɔɔ, ba ɡbabir na ɡɛ n fa aa la cheremi deene bini, dɛ kaa lɔɔ nɛra baa yarada he waa nɔ, dɛɛ do ba deene.

²⁰ Gɛ saŋ baa kpo Steeven o fa aa dɛ di he waa nɔ danseɛ la, dɛ n lɔ bela dɛ sɛh ŋɔ o chɛ kpoe. Hale baala la aa dɛ kaa bá ka kpoo dɛ wur ba yale la, men lɛa kpoŋe.’

²¹ Anee o ŋɔ n be ŋɔ, ‘Kaa! Mɛɛ ɡeloo he kaa bojaŋ, dɛ́ la nɛra baa wola Juu tena ɛɛ be.’ ”

²² Pɔɔl aa dɛ bol o waa la bwa dɛ nɛra la bwa cheɡ deŋne dɛɛ no o be. Kɛ waa ba dɛ bol nɛra baa wola Juu tena ɛɛ be laŋa waa la, ba baah diu baa nyɛɡ kohona dɛɛ ŋɔ, “Hé le o ne! Bɔkwaa he ɡel o che dɛɛ ɛɔ?”

²³ Ba baah diu, asɛ baa nyɛɡ, dɛɛ viwe ba yale, dɛ ɛ teera dɛɛ ta nyundua.

²⁴ Anomanta, soojanomonjen la ɡelɔ ba kpɔ Pɔɔl jo dea. Dɛ o ta wone jemɛ waa aa bala nɛra la ɛɛ nyɛɡ ɡɛ la. Anomanta, o ŋɔ bá lɔɔ Pɔɔl bampɔrɔ ŋwɛɛra ne, dɛ́ ɛo hɔhɔrɔwa ásɛ o fe sɛh chɔɡre dɛ bol kasinteŋ.

²⁵ Baa ŋɔa ba lɔɔro la, o pɛɛ ba bini nomoa la ŋɔ, “Ŋwɛnɛ lole kɛŋɔ he lɔɔ Rom te dɛ ba ta o waa bolɛ dɛ́ na wechɔɡa waa ɛa aa?”

²⁶ Pɔɔl aa ŋɔ ɡɛ la, sooja la kaa ŋɔ ba nomonjen la be ŋɔ, “Dɛɛ do baa nɔ dɛɛɡɔ, dɛ bɛ on wechɔɡa bɛlbwa ɛ. Rom tee on.”

²⁷ Belaa nomoa la ba pɛɛ Pɔɔl ŋɔ, “Rom tee hen aa?” Asɛ Pɔɔl sɛh ŋɔ Rom tee on.

²⁸ Anee nomoa la ŋɔ, “Bɛlee n ɡba, kɛ n bɔ kem taeh mɔɔ dɛ won ɛ Rom te nɔ.” Belaa Pɔɔl ŋɔ, “Rom tee lolɛ n te n ɛ Rom te.”

²⁹ Buɡ la ta, dɛ nɛra ba fe aa dɛ ba Pɔɔl lɔɔra la le habɔɔ. Nomoa la ɡe aa naa kɛ Rom tee Pɔɔl asɛ o ɡel ba do jɔɡrɔre la, o ɔmɔ.

Pɔɔl kaa che Juu tena nomonome sie

³⁰ Nomoa la dɛ nyin o jemɛ waa la Pɔɔl aa ɛa asɛ Juu tena la baah di o nɛɛ la kɛrɛdɛ. Anomanta, tɔ aa pera la, o ɡelɔ ba le Pɔɔl dea, dɛ ɡel Sɔfonomonome ne Juu tena nomonome baa dɛ bol waa la bwa cheme. Baa chema la, o ɡelɔ Pɔɔl ba che ba sie.