We-ɛɛla 21 - mzwDBL

Pɔɔl la Jerusalam

¹ Yaa le ba be la, ya jo stiimae bini dɛ pa sie kaa Kɔs, asɛ tɔ aa pera la, ya la Roods, dɛ ka che bela kaa Patara.

² Belaa ya na kɛŋɔ stiimae bɛl aa ba dɛ kaa Finiisia harɛ ta, asɛ ya jo o bini dɛ kaa,

³ dɛ ba le bobɛl dɛ na ekwi bɛl baa dɛ yerɔ Saepros la, dɛ berɛ pa sie weekaŋle harɛbɔr dɛ ka le Siiria harɛ ta, dɛ ka tu Taaya, dɛkalkɛŋɔ dɛ belaa stiimae la ɛɛ ba bone aa lɔ o bini la ne.

⁴ Ya nyin asɔre tena baa lɔ bela la bɔr, dɛ so ba be yawanyoa. Bela la Korowii Domadɛɛɡe la ɡelɔ ba ŋɔ Pɔɔl be ŋɔ o bɛ Jerusalam la.

⁵ Ya kaala aa tela la, ya le bela dɛ chiɡ ŋwɛnɛ ta dɛɛ kaa. Ba ne ba haahna ne bii bwaa baa do yaa ŋwɛnɛ dɛ le bwɛɛ la ta, dɛ ka tel nee nyoa, asɛ ya ɡuŋi harɛ nee nyoa bela dɛ soŋe Korowii dɛ kal dɔŋa.

⁶ Yaa kal dɔŋa tonɛ la, ya jo stiimae bini, asɛ ba kaa dem.

⁷ Ya le Taaya ba Tɔlemaes dɛ ba chɔɔ bela asɔre tena, dɛ so ba be tɔpebeŋkpoŋ.

⁸ Tɔ aa pera la, ya le bela dɛ ba Sisaaria, dɛ ba choɡ Felep. Dɛ o ɛ nɛra banuanɛ ba fa aa lee ba Jerusalam ŋɔ báa nyiŋi suuɡa waa ta la bɛl. Dɛ o dɛ ɡaaɡe dɛɛ bol Korowii Wa.

⁹ Dɛ o dɔ bihaahna banaarɛ baa wola yalɛ bwa, asɛ Korowii Domadɛɛɡe la cha ba ba yon dɛɛ bol Korowii Wa.

¹⁰ Ya biɡri bela tama, asɛ Korowii keame bɛl baa dɛ yerɔ Aɡabus la le Juda harɛ ba.

¹¹ Waa ba ya be la, o baa kpɔ Pɔɔl kiriso, dɛ vɔrɔwe o ɡbaɡba nɔɔra ne nakpale dɛ ŋɔ ya be ŋɔ, “Kenii Korowii Domadɛɛɡe ŋɔ, Juu tena ɛɛ vɔrɔwe kiriso nɔ te kenii Jerusalam, dɛ kpɔɔ do nɛra baa wola Juu tena ɛɛ nɔn ta.”

¹² Yaa no ɡɛ waa nɔ la, ya ne asɔre tena baa lɔ bela la soŋe Pɔɔl ŋɔ o bɛ Jerusalam la.

¹³ Belaa o ŋɔ, “Ɛrɛɛ hɛɛ wi ken dɛɛ nyin kɛŋɔ he do mɛ bɔhwaah nɔɔ? Baa vɔɡ mɛɛ Jerusalamee yaa, n sɛh ɡɛ. Baa kpo mɛɛ ɡe kwaraa naa, n sɛh ɡɛ. Baa koh n Dɔɔ Yeesu waa dɛ ɛɛ mɛ anɔ bɛlbwa naa, n waane laa. N sɛh ɡɛ waa nɔ wubwa bambile bwa ne.”

¹⁴ Ya bol harɛ bini waa nɔ bwa o be, o ta noɛ. Anomanta, ya ɡelo dɛ ŋɔ, “Gɛ Korowii aa dɛ nyin a ɛ la, á ɛ ɡɛ.”

¹⁵ A habɔɔ la, ya kpɔ ya bone dɛ kaa Jerusalam.

¹⁶ Yeesu habɔteŋra baa le Sisaaria la bane ɡe teŋɛ ya nɛɛ la, dɛ tɔ ya sie la ya ne baa la ya fe aa dɛ ba o dea choɡa la dem. O le Saepros, dɛ ɛ nɛnloɡla baa lɛ Yeesu waa la bɛl, asɛ baa yerɔ Meesan.

Pɔɔl kaa tel Jerusalam

¹⁷ Yaa ba Jerusalam la, asɔre tena la lɛ yaa silɛɛ ne.

¹⁸ Tɔ aa pera la, Pɔɔl kpɔ yaa la Jems be, dɛ asɔre tena nomonome la bwa lɔ bela.

¹⁹ Pɔɔl ne ba lea dɔŋa, asɛ o baɡle waa bwa Korowii aa chao o won ɛ nɛra baa wola Juu tena ɛɛ la harɛre ta.

²⁰ Baa no Pɔɔl waa la, ba jam Korowii taeh. Belaa ba ɡe ŋɔ o be ŋɔ, “Nomoa, taraken nɔ, yaa won jemɛ Juu tena baa yarada ya Dɔɔ Yeesu nɔ nyoa baɡle. Ba warɔ kohona. Ba sie beɡre Mosis Mmara la ɡe ta taeh.

²¹ Gɛ nɛra nɔ bwa noɔ kɛŋɔ haa dɛ ɡaaɡe la, he ka dɛ baɡle Juu tena baa lɔ harɛre aa wola Juu tena harɛre ɛɛ ta la ŋɔ bá ɡel Mosis Mmara la ta teŋa. Hale ba ŋɔ he ŋɔ bá ɡel ba bii pena teŋa, dɛ ŋɔ ba bɛ Juu tena kii te bɛlbwa ta dɛɛ teŋɛ. Mosis Mmara ɡe ta ŋwɛnɛ ɡɛ tɛɛ.

²² Gɛ nɛra nɔ ɛɛ noo kɛŋɔ he balɔ. Anomanta, ɛrɛɛ hɛɛ ba ɛɛ yɔ?

²³ Yaa baɡlee ɡɛ aa chɛ kɛ he ɛ. Baala banaarɛ bane baɡɛ Korowii nyoa bonɔ.

²⁴ Kpɔ ba la Korowii Dea, ásɛ he ne ba ka pɛ ɛ we-ɛɛla haa dɛ ba ɛɛ, ásɛ dɛ laa doŋa kpɔ he nɛɛ la. He laŋaa, hé bɔ ba kem aa chɛ kɛ ba bɔ waa la ta la tɛɛ ba, ásɛ ba won fonɛ ba nyuune. He ɛ ken aa, nɛra bwa ɛɛ jemɔɔ kɛŋɔ haŋaa ba haŋɛ he nyoa. Baa nao kɛŋɔ he ɡbabir dɛ teŋɛ Mosis Mmara la ta.

²⁵ Asɛ nɛra baa wola Juu tena ɛɛ dɛ yarada Yeesu waa la ɡe la, ya chwerɛ tɔn ka tɛɛ ba ŋɔ ba bɛ voɡ kwaa ne chal ne ol baa wola o baŋa teŋe o sewɛ la dɛɛ di, dɛ ŋɔ bá laa ba te dɛɛ kpɔ jwamane waa ta.”

²⁶ Baa ŋɔ ɡɛ la, Pɔɔl lɛ nɛra banaarɛ la, asɛ tɔ aa pera la, o ne ba ka ɛ we-ɛɛla la ásɛ ba doŋa le ba nɛ. Baa tona la, Pɔɔl kaa jo Korowii Dea bini dɛɛ baɡle tɔpera aa di mɔɔ ba kpoo ba bɛlbwa koŋkwaare, ásɛ ba we-ɛɛla la tonɛ. Dɛ a lɔ tɔpera anuanɛ.

Ba lawɛ Pɔɔl Korowii Dea

²⁷ Tɔpera anuanɛ la aa ba dɛ tel a jaɡa la, Juu tena bane baa le Eesia harɛ pera la na Pɔɔl Korowii Dea, dɛ bol waa dɛ ir nɛra bwaawee, dɛ lawɔ,

²⁸ dɛ kpɔ takpeɡ dɛɛ ŋɔ, “Israel tena, hé ba cha yaa oo! Baa nɔɔ vala dɛɛ bol waa bobɛlbwa dɛɛ yaɡɛ ya Israel tena ne Mosis Mmara ne Korowii Dea nɔ la. Name te kwara doŋaa o kpɔ baa jo ya Korowii Dea nɔ bini. Nɛra baa wola Juu tena ɛɛ, Grik tena baa wola chɛɛ kɛŋɔ ba jo Korowii Dea la, banee o lawɛ baa jo o bini!”

²⁹ Dɛ ba na o ne baa bɛl waa le Ɛfesos baa yerɔ Trɔfemos la bwɛjen Jerusalam bela. A waa ba ŋɔ ɡɛ la, dɛkalkɛ dɛ ba dɛ lii kɛŋɔ Pɔɔl jo o ne ba Korowii Dea la bini.

³⁰ Ate, bwɛɛ la tena bwa lɛ ɡaeh, dɛ chwa le bobɛlbwa dɛ lawɛ Pɔɔl, dɛ tuuɡu le Korowii Dea la bini. Buɡ la ta, dɛ ba tɔɔɡe Korowii Dea la ɡbeni bwa.

³¹ Nɛra la aa cheɡɛ Pɔɔl kpoe naa ta la, nɛra kaa ŋɔ Rom soojanomonjen waa dɛ nyiŋi bela soojare nɛɛ la be ŋɔ Jerusalam tena bwa lɛ ɡaeh.

³² Ate, nomoa la ɡel wobɛlbwa ɛɛ dɛ kpɔ soojanomonome bane baa lɔ o lɔɡa ne soojare bane dɛ chwa la bela baa dɛ lɔɔ Pɔɔl la. Nɛra la aa na nomoa la wɛɛ ba soojare ne la, ba ɡel Pɔɔl lɔɔra.

³³ Nomoa la baa lawɛ Pɔɔl dɛ ɡel ba doo jɔɡrɔre, dɛ bɔɔ nɛra la ŋɔ, “Nɛn besoo baa nɔɔ? Webesoo o ɛɔ?”

³⁴ Ate, dɛ ba dɛ nyɛɡ bobɛlbwa, bane ɛɛ bol anɔ, bane ɡee bol ane soo siwi. Baa dɛ do ɡbɔɡa ɡɛ la, o ta wone jemɛ waa la kasinteŋ, dɛ ŋɔ bá lawɛ Pɔɔl ka do soojare dejen bini.

³⁵ Ba dɛ kaa dɛ ka tel dea la sanjol baa cheɡɛ o ta dɛɛ jo o bini la ta, asɛ nɛra la ɛɛ nyin ba kpo Pɔɔl. Anee soojare la lɛo le ba be, dɛ ɡɔɔro dawɛ ba vaama ta.

³⁶ Dɛ nɛra teŋɔ dɛ kpɔ takpeɡ dɛɛ ŋɔ, “Hé kpoo! Hé kpoo!”

Pɔɔl bol waa baɡle nɛra pirim

³⁷ Soojare la aa dɛ ba Pɔɔl ne dea la bini joe la, o bol waa ba nomonjen la be dɛ ŋɔ, “Nomoa, n dɛ nyin n bol waane he be tama.” Belaa nomoa la ŋɔ, “He dɛ no Grik wobol aa?

³⁸ Jamɔ Ijipt te la waa bala baah bɛl ta, dɛ ba wetɔŋla ne, dɛ yo Abane nomonome asɛ dɛ jo nɛŋkpoora kaɡboŋa banaarɛ baa kpoŋe dɔmkwaa la ne kpɔɡ bini laanee hen kɛɛ?”

³⁹ Anee Pɔɔl ŋɔ, “Juu te e men. Silisia harɛ bwɛjen baa dɛ yerɔ Taasos la biee men. N poori, tɛ mɛ ŋwɛnɛ ń bol waa nɛra nɔ be.”

⁴⁰ Waa ŋɔ ɡɛ la, nomoa la tɛo ŋwɛnɛ, asɛ o che dea la sanjol ta dɛ kpɔ nɔn ɛɡɛ nɛra la ŋɔ bá tɔ nyoa. Ba tɔ nyoa surumm ken, asɛ Pɔɔl kpɔ Aram tena wobol dɛɛ bol waa ba be, dɛ ŋɔ.