We-ɛɛla 20 - mzwDBL

Pɔɔl berɔ la Makidoonia ne Grik tena harɛ

¹ Gbɔɡa la nyoa aa sɔɔhna la, Pɔɔl yerɛ bela asɔre tena la cheme, dɛ do ba ɡbemba, dɛ kal ba, dɛ kaa Makidoonia harɛ.

² O kpɔ baah bela bwɛɛre la ta, dɛ bol waa baɡ ba taeh dɛ ja ba, dɛ le bela ba Grik tena harɛ ta.

³ O di korobie atoro bela mɔɔ dɛ kpɔ o te, dɛ́ fe kpɔ stiimae kaa Siiria harɛ. Waa dɛ kpɔ o te dɛ́ kaa la taa o na kɛŋɔ bela Juu tena dɛ vɔrɔwe dɛ́ lawɔ. Belaa o berɛ laa berɛ kpɔ Makidoonia harɛ dɛ kaa.

⁴ Perɔs bie Sopata waa le Bɛrea la teŋɛ Pɔɔl nɛɛ kaa. Aristakus ne Sɛkondos baa le Tesalonika la ɡe la bɛl. Gɛɛ Gayos waa le Dɛɛbe la, ne Tichikos ne Trɔfemos baa le Eesia harɛ la ɡe la bɛl. Timoti ɡe la bɛl.

⁵ Gɛ nɛra nɔ tɔ sie dɛ ka so kpa Pɔɔl ne men maa dɛ chwerɛ waa nɔ Troas.

⁶ Ya tɔpejena yaa dɛ di Paanoo Iisi Aa Wola Toole a ta la ɡarɔ mɔɔ ya che Felepae jo stiimae bini. Yaa le Felepae la, a tɔpera anuee ya ba puu ba Troas. Ya di yawanyoa Troas bela.

Pɔɔl berɔ la Troas

⁷ Memene wee jɔmɔra ne la, ya asɔre tena la chemo dɛ di kondikwaa ya Dɔɔ aa kpɔa ja yaa ŋɔ yá kpɔ dɛɛ lii o waa la, asɛ Pɔɔl bol Korowii Waa dɛɛ baɡle yaa. Dɛ o fe dɛ nyin kɛŋɔ tɔɔ peraa ó kaa, anomanta, o bol waa ka tel harambaŋa.

⁸ Dɛ abrɔsane bɛl doaa ya cheme, asɛ kandere do bela pirim.

⁹ Dɛ bonɔɔ bɛl soɡe tokoro ta baa yerɔ Yutikus. Pɔɔl aa bol waa biɡri la, dom lawɛ Yutikus kɛrɛdɛ. Waa dɛ chɔ la, o le tokoro la ta abrɔsane la doa le harɛ. Dɛ ɡɛ dea laanee chɔŋa tooro abrɔsane la deene aa chɔŋra la ta. Baa ɡɔɔro, dɛ o sewɔ.

¹⁰ Anee Pɔɔl tu harɛ dɛ ka pi o nɛ, dɛ ɡbaaro pɛl o bambile, o berɛ wee. Asɛ Pɔɔl ŋɔ ba be ŋɔ, “He bɛ ɔmɛ, o siwi lole.”

¹¹ Asɛ Pɔɔl berɛ deeh abrɔsane la dɛ ka di kwa, asɛ o ne ba bol waa la sie ka tel kɛ tɔ aa pera mɔɔ o kaa.

¹² Ate, nɛra la sie lɛo kohona kɛŋɔ bie la aa ira la, dɛ kpɔɔ kaa dem.

Pɔɔl le Troas dɛ ba Miletus

¹³ Ya kaa kpɔ ya stiimae la kaa bwɛɛ bɛl baa dɛ yerɔ Asos la ta. Dɛ ya fe dɛ lii kɛ ya ka kpɔ Pɔɔl Asos bela, dɛkalkɛ dɛ ya ne o vɔrɔwɔ asɛ o ŋɔ wɛɛ kpɔ harɛɛ dɛɛ cheme yaa bela.

¹⁴ Waa baa pu yaa Asos la, ya kpɔɔ ya stiimae la ta, asɛ ya ne o ba Mitiliini.

¹⁵ Tɔ aa pera la, ya berɔ kpɔ stiimae la le bela dɛ ba chɔ ekwi bɛl baa dɛ yerɔ Keɔs la jwɛh. Tɔ aa pera ja la, ya ba bwɛɛ bɛl baa dɛ yerɔ Samos la ta. Asɛ tɔ aa bera per ja la, ya ba bwɛɛ bɛl baa dɛ yerɔ Maeletus ta.

¹⁶ Yaa dɛ ba la, ya ta Ɛfesos cheɡɛ, dɛkalkɛ dɛ Pɔɔl aa nyin kɛ o ba biɡri Eesia harɛ ta. O dɛ nyin kɛ o won tel Jerusalam warane mɔɔ ba Pɛntekɔs Tɔpejen la tel.

¹⁷ Pɔɔl cheɡɛ Maeletus kal Ɛfesos asɔre tena nomonome ŋɔ bá ba o be Maeletus.

¹⁸ Baa bala la, o ŋɔ ba be ŋɔ, “Le awola maa ba he be Eesia harɛ bonɔ la ba le fini, he na n da maa kpoŋa bwa.

¹⁹ N kpɔ n te kɛ n Dɔɔ Yeesu bonɔɔ dɛɛ ɛ o toma nɔ sipwɛra ne. N koh he nyoɡra haa nyoɡre Korowii ŋwɛnɛ waa dɛ yon dɛɛ wi. Juu tena aa dɛ vɔrɔwe n vɔrɔwa la, a noo mɛ taeh.

²⁰ N ta wobɛlbwa kpɔe sɔh heya. Wobɛlbwa aa le tɔnɔ tɛ heyaa la, n ta a ta tɔe. N baɡle nɛra Korowii Waa cheremibɔra, dɛ baɡle o waa he deremi.

²¹ Juu tena ne Grik tena bwa bee n bol, dɛ ja ba ŋɔ bá charɛ ba liire dɛ́ le ba wechɔɡa ta dɛ́ ba Korowii be, dɛ́ yarada Yeesu dɛ́ kpɔ ba te tɛo.

²² Taraken nɔ, Jerusalamee mɛɛ kaa la, dɛkalkɛŋɔ Korowii Domadɛɛɡe kpɔ bela laŋa do n bambile ta maa wola won vɛh. Dɛ waane ɛɛ puu mɛɛ belaa yaa, maa jemɛ.

²³ Waa maa jema bwaa kɛŋɔ bwɛjen bɛlbwa ta maa la la, ɡɛɛ Korowii Domadɛɛɡe che nɛra nɛɛ dɛ ŋɔ wahala ne dea chɔe chɔ n sie dɛɛ kpaa mɛ.

²⁴ N waane laa n ɡbaɡba hweera wa. Waa aa swɛɛ n siwi laanee kɛ, ɡɛ maa ɛ dɛ tonɛ toma n Dɔɔ Yeesu aa tɛ mɛ ŋɔ ń ɛ la. N tomaa kɛ ń bol Amanesoma la nɛra be bá jemɛ kɛŋɔ Korowii dɛ sune nɛra nɛɛ dɛɛ nyin ba chae.

²⁵ Taraken nɔ, n jemɔ kɛ he nɛra maa valɛ he nɛɛ dɛ bol Korowii Kora nɔ waa he be nɔ, haa men na kpa bwa.

²⁶ Mɛɛ di heyaa kasinteŋii fini. He bɛlbwa baa nyoɡre Korowii ŋwɛnɛ aa, n laa ɛ waane,

²⁷ dɛkalkɛŋɔ n ta waa Korowii aa dɛ nyin la wobɛlbwa kpɔe sɔh heya.

²⁸ Hɛ́ɛ nyiŋi he te kɛrɛdɛ, dɛɛ nyiŋi nɛra Korowii Domadɛɛɡe aa kpɔ ba do he nɔn ta ŋɔ hɛ́ɛ nyiŋi ba nɛɛ la kɛrɛdɛ. Korowii Bie ɡbaɡba chalee o kpɔ yawɛ o nɛra asɛ ba ɛ o kwa, anomanta, hɛ́ɛ nyiŋi ba nɛ.

²⁹ N jemɔ kɛŋɔ maa dɛ kaa nɔ, nɛnchɔɡa ɛɛ jo he binii kɛŋɔ peteɡre toole naa, ɡboli yon jo peera baah dɛɛ larawa la.

³⁰ N jemɔ kɛŋɔ he ɡbaɡba bini bane ɛɛ dɛɛ bol waa aa wola weree, dɛ́ neɡre nɛra ásɛ ba ɡel Yeesu nɛɛ teŋa dɛɛ teŋɛ ba nɛ.

³¹ A waa n ŋɔ hɛ́ɛ nyiŋi kɛrɛdɛ ŋɔ he bɛ ba soh kɛ n fa aa lɔ he be bene atoro bwa dɛ yon dɛɛ ja heyaa Korowii waa ta tɔpebii te bɛlbwa, dɛ koh he waa dɛɛ wi la.

³² N kpɔ heyaa do Korowii nɔn ta ásɛ o kpoŋe heya, ásɛ o nɛra nɛɛ suna waa la won do he bambile bini ásɛ he do kpeɡri, dɛ́ won di kapɛrɛsom la waa ɛa cheɡ nɛra waa laa ba doŋa bwa kpɔ ba nɛɛ asɛ ba ɛ o ɡbo nɛra la.

³³ N sie ta nomɛlbwa suuɡa kɛɛ o yal ta beɡrɛ.

³⁴ He ɡbabir jemɔ kɛŋɔ ɡɛ saŋ maa lɔ he be la, bɔwɔbee n kwee mɔɔ n ne nɛra baa teŋɛ n nɛɛ la ɛɛ dɔ ya komɛlbwa.

³⁵ N cheɡɛ n we-ɛɛla ta dɛ baɡle heyaa kɛŋɔ a chɛ kɛ ya swɛɛ siwi ɛ toma ken, ásɛ dɛ won dɛɛ cha nɛra baa wola kpeɡe la. A chɛ kɛ yaa lii waa ya Dɔɔ Yeesu ɡbaɡba aa bola ŋɔ, ‘Nɛn waa dɛ kɛ nɛra kwaa la, o dɛ na som o bwara ɛɛ sɔɔhno, dɛ ɡwaa nɛn baa dɛ kɛo kwaa’ la.”

³⁶ Pɔɔl aa bol waa tonɛ la, o ɡuŋi harɛ, asɛ o ne ba soŋe Korowii.

³⁷ Baa ira la, ba lawɔ ɡbaa ba bambile, dɛ kpɔ wii dɛ kalo.

³⁸ Waa la aa ɡela ba loo ku kohona laanee kɛŋɔ waa ŋɔa baa on na kpa bwa la. Baa ɡwao tonɛ la, ba doo ŋwɛnɛ la stiimae la bɔr.